السلام عليكم ورحمة الله وبركاته

كيف احوالكم يا مسلمين ؟؟ بإذن الله بخير ورضا من رب العالمين..

اتوقع كتابة موضوعي بتكون اسهل من العنوان .. اذكر لكم سبب تسميته ان شاء الله

واولا سبب كتابتي للموضوع..مساعدة العقلاء والمجربين في توجيهي وما علي فعله !!..

انا طالب هندسة آخر سنة..متزوج من سنتين تقريبا وعندي بنت ولله الفضل والمنة..
ملتزم ولله الحمد والتزامي ورطني بقراءة مواضيع الزواج المبكر وما ارتحت الى وانا مسوي اللي براسي..
على بالي الزواج مصدر سعادة و راحة بال..وانه راح يساعدني في زيادة مستوى دراستي..واحصل في البيت من يطبخ لي اذا رجعت متعب من الدوام..واطلب من الزوجة تسوي لي حلى مثل الناس..لأن عندي والدة كبيرة في السن ما أحب اتعبها
على فكرة..كنت اقول في نفسي قبل الزواج..الوالد والوالدة كبار في السن..الأعمار بيد الله..ولكن هل اذا انجبت اطفال .. بكونوا معاي يشاركوني فرحتي ؟؟!!..وفضل من رب العالمين جاتني بنت ويغلونها اللحين اكثر مني..

لكن..ابتليت بزوجة ملأت قلبي حزنا وهما وغيظا..واعوذ بالله من امراءة تشيبني قبل المشيب..
عمرها 23..من بداية الزواج..وهي تخلق المشاكل من لا شئ..ولكن لجهلي وضعف ادراكي..ماصبرت حتى اعرف اخلاقها وهل هي بتنفع تكون لي شريكة مدى الحياة..بل تفاجأت بالحمل بعد الزواج بثلاث شهور تقريبا..

حساسة جدا جدا.. تحسب كل صيحة عليها..تحسب كل نصيحة ذم فيها ,, نفذ أوامري ولا عش معي بجحيم , جاهلة , لا تقل لي حلال حرام (كتفكير كبار السن ) , تمنيت رجل طويل انت قصير..انت حلو بس قصير..اخي فلان اطول منك
الممثل الفلاني طوله ممتاز ( تقوم مشكلة هنا..واقعد يومين حلقي مبحوح ) / طبعا طولي عادي تقريبا..وحتى لو كنت قصير..احذر من طأطأ الأرض انت ووياه

كلامها..لابد يكون فيه تجريح..الله اعلم,,هل بقصد ام جهل فيها ؟؟
وانا ايضا..حساس تجاه الكلمات..فاقعد مهموم مغموم على تأثير كلمه..

كنت اتمنى زوجة صالحة..نعيش مع بعض روحانية ايمانية..اذكرها وتذكرني..نستمع لشريط ديني مع بعض..نقرأ القرآن مع بعض
هذي الله يهديها..فقط تصيح وتزعل دور لنا فلم نشوفه..اذا كان الفلم فاشل تزعل وتذم ذوقي..اذا ماكملته معها ماتكلمني ساعات..
اجيب لها القران..ابغاها تشاركني..تقول لا تجبرني على شئ
اذا حبيت اذكرها..او اقول لها اللي يعجبني..قال الله قال رسوله صلى الله عليه وسلم..تبدأ تستحقرني بنظراتها
او تقول..اوووه بدينا
لباسها لا يعجبني..اقول لها مايجوز..وبعض الأحيان امنعها..فترفض وتقول كل البنات كذا
او ما احب احد يتحكم فيا...الخ

اذكر في بداية الزواج..سمعت محاضرة آثرت فيا..ترفع همم الرجال..تحذر من شر الفضائيات..فقلت انا رب البيت ومسؤول..شلت الرسيفر واشتركت سنتين بالمجد..زن زن زن على راسي حتى رجعته..ولأن ايضا وجدت بديل وهو اللابتوب..قلت ماينفع المنع..ماعلي الا التذكير

لاتطبخ..80% مطاعم 10% انا اسوي لنفسي..10% طبخها الغير متقن << امها مشهورة بالطبخ على بالي بتطلع مثلها..لكن ماعلمتها

مع ذلك اكل وانا اقحقح ملح..لذيذ..ماشاء الله عليك موهوبة..استمري ,, لا تحرمينا من اكلك

دائمة رفع الصوت..يافلاآآآن ,, اقول آآآه بدأ النكد..ايش عندك ؟؟!!!! المخده هذي ماتطلعها من الغرفة الفلانية..سروالك ماترميه هنا..شيل مناديلك..اغراضك شيلها..مواعينك مثل ما استخدمتها غسلها
وانا اكون حاط الملابس..ابيها تشوفها عشان تغسلها..وهي لا تطبخ ولا ترضى اني اطبخ..عشان مافيها حيل تنظف المواعين..واذا طنشتها واستخدمت المطبخ..او جبت اكل من برا..تقعد المواعين والأكل اسبوع حتى تتكون عليه طبقات بكتيريا..

ماتقدر تقول بكل هدوء..يافلان لا تسوي كذا او ابغاك تسوي كذا وكذا..لازم مدعومه بصوت عالي ونكد..

وانا عندي صفة..ما ادري هي حسنة ولا سيئة..الا وهي اني نساااااي ,, انسى مواقفي معها
اذكر فقط انها دائما معبيه قلبي هموم واحزان..اذكر اني كنت ادعي بدموعي ان اللي في بطنها يسقط
ودااائم الدعاء عليها..وحياتي كلها معها نكد..لكن ما اذكر ليش..ممكن لرفع صوتها وعصبيتها وعدم طاعتها لي..وعلى اقل المشاكل..وديني لأهلي..فصارت عادة اذا ..قالت وديني لأهلي..اخذت فيها فره بالسياره..ورجعتها البيت..

لكن كما قال الرسول صلى الله عليه وسلم : (ثلاثة يدعون الله فلا يستجاب لهم: رجل كانت تحته امرأة سيئة الخلق فلم يطلقها.....) والعلماء يقولوا دعاءه عليها لا يستجاب..

انا ما أدري..لماذا ؟؟ هل لانتشار مسلسلات تسيطر فيها المراءة على الرجل ام لماذا..
حصلت مره بجوالها.صورة امراءة كاشفه ساقها وتجعل الرجل ينحني ويقبلها..هل كل هذا لأجل السيطره ؟؟ وتتعلم هالصفات من المراهقات الفاسدات !!!!

انا في البداية..قدمت الكثير من التنازلات..كنت اسكت واعفوا..واتجاوز..واقول تكبر وتتحسن مع الوقت وتفهم
اسكت بريح راسي من المشاكل..اسكت خوفا من كلام الناس ورغبة في السمعة الطيبة..اسكت حياءً من اهلها من قبلوا بطالب غير موظف..اسكت لأني ما احب البيت يكون فيه كدر وضيق

لكن سكت وسكت وسكت..حتى اتضح لي اني اصبحت ( زوج خروف )

انحرمت من الطلعة مع الشباب..لأنانيتها..اسمح لها تروح عند اقاربها و استراحات مع اهلها و زواجات..ولا عمري قلت لها لا..واصلا فرضا حتى لو كنت برفض..بتعيشني بجحيم حتى تسوي اللي براسها
وبالنسبة لي انا طبعا ما احب الخروج كثير..لكن تجيني فرص نوادر..بطلع مع الشباب رحلة او استراحة..
صياح ومنع وتوقف على الباب..وانواع التهديد كل هذا تقول ماتروح انت تنبسط وانا اقعد طفشانة..

دائمة غضبانة..وردها جافي موحش..

بذكر لكم موقفي اليوم..واصبح اعتيادي ومتكرر بالنسبة لي..لكن اليوم قلت مافيه تنازل..ما ابغى الغي شخصيتي من كثر التنازلات
خرجت من صلاة الفجر..وذهبت لمحل التميز..اخذت الفطور..حطيته على الطاوله..وطلبتها تسوي شاهي مع الفطور..فيه كرسيين..كنبة كبيرة وكرسي صغير..الكنبة هذي في الغالب مكان جلوسي..
فقالت لي قوم بجلس عليها..طبعا جلوسها دايم رجل على رجل,,(فتصورت نفسي قاعد على الكرسي الصغير..وهي جالسه رجل على رجل على الكنبة الضخمة..ياحبيبي,,ماتقبلتها نفسي )..قلت لا
قالت مافيه شاهي اذا..قلت مافيه فطور..اخذت الشاهي زعلانه..وما اسمع الا طبعة الباب..زلزال

<< موقفي هذا اشبه بتخاصم اطفال..لكن الكلام على ردة الفعل والجفاء والعصبية الزايدة..وطول اليوم يكون نكد وهم

وايضا مما يزعجني..رغم انها شابة صغيرة وبصحة الحمد لله..الا انها تجيها شغالة..بس متطبحه على الجوال والتلفزيون وتركم في الزبايل..حتى تجي الشغاله تنظف كل شئ..ايش ناقصها ترتب بيتها بنفسها..

بالنسبة لعنوان الموضوع..ابتلاء الأخيار بالنساء الأشرار..هذا كتاب كنت اجد فيه متنفس لي..اذا تهممت منها وضاق صدري,, رغم رفضي لبعض ماجاء في الكتاب عن النساء
لأني أؤمن بوجود جواهر من النساء..كما قال النبي صلى الله عليه وسلم :{ الدنيا متاع وخير متاعها المرأة الصالحة }
ولكن من المحظوظ اللي بياخذ احد هذه الجواهر النادرات..

اقول في نفسي..والله لولا بنتي كان ماصبرت كل هذا الصبر..واني كاره الاستمرار معها ,, ,وادعوا الله يخلصني منها ليل نهار..
وحاليا..حريص اشد الحرص..اني ما اجيب منها ابناء
لأني رافض الاستمرار معها..وبنفس الوقت كاره عشان بنتي

طبعا..كل شخص له سيئات وحسنات..
وحسناتها..ماتترك صلاتها..وان تتهاون بأدائها بعض الأحيان..لكن لا تتركها
اذا كانت مروقة..تكون جدا ظريفة وكثيرة الضحك وللأسف نادرا..والزعل والعصبية تطغى على هذا الجانب بشكل كبير
اقتصادية من حيث الطلبات مقارنة بأقرانها..رغم اول سنة كانت عكس..كثيرة الطلبات , بعد الزواج بأشهر قليلة تطالب بالسوق..تبي ملابس..قلت توك مجهزه جهازك واشوف الشقة كلها بتطيح من كثر الملابس..بعد تبين ملابس..قالت كل هذا صيفي..وما شريت شتوي..قلت تعرفين اني طالب..مفروض تكوني مجهزه حالك لصيفك وشتاك وخريفك
لكن الظاهر امها دايم وراها تصبرها..حتى خفت علي شوي..وصارت تقتصد بطلاباتها
ومن حسناتهم..ان امها كثيرة الاعتذار عن بنتها وعن تصرفاتها..

مع ذلك..لا اتمنى يكون مستقبلي كما هو الآن..ماهو الحل برأي العقلاء والمجربين..
ومازلت مصر على البحث عن خير متاع هذه الدنيا..ان لم تكن الأولى جوهرة
فما زلت مستمر بالتنقيب