ماذا أفعل مع شك زوجي وغيرته /البليغ
السلام عليكم ورحمة الله وبركاته
والدي البليغ/
انا كنت محجوزة لولد عمي وامه اخت امي يعني يصير ولد خالتي بنفس الوقت
في ليلة كنا مجتمعين مع خالاتي وكانوا خالاتي يتكلمون عن عيالهم وعن من بيزوجون ومن بيخطبون ووو....
فقالت اكبر خالاتي انا عندي ولدي ....يبي فلانه ....واشرت علي باأصبعها وانه يقول ان شاء الله انا بتزوجها وقالت خالتي ان شاء الله بتاخذها وبإذن الله وبإذن الله تكون من نصيبك
وان كودك تبينه والكلام موجه لي ابد اصبري عليه بس الين يخلص جامعته واشرت لها براسي
يوم كنا صغار كنت احبه بجنون وكنا نلعب سوا
قالت وحدة من خالاتي ليش هو شايفها قالت لا ماشافها لكن يقول ابيها لأننا يوم كنا صغار كنا نلعب مع بعض قالت امي ابد هي محجوزه له
وماراح نزوجها غير فلان
وبحكم انه ولد خالتي كان لنا اجتماع اسبوعي مع خالاتي وكان ابوي ينام بدري ويقول لامي خلي احد من عيال اختك يوصلكم
واكبر خالاتي بيتهم قريب من بيتنا
اذا دقوا على عيالهم قالو جيب الجيب لأن معنا خالتي فلانه
والمفآجأه كل مره يجي فلان صاحبنا واذا ركبنا السياره يتميلح ويسولف ويمزح على امه
ولازم من نظرات الاحظه عليه صوبي
وتمر ثلاث سنين
ويجي هذاك اليوم وتقول امي تراك مخطوبه لولد عمتك وصرخت وقلت لها وفلاااان لأني صراحه حبيييييييييته
وخواتي وامي يدرون بحبنا لبعض
قالت ماعليك منه توه يدرس وووو
تجي اختي الكبيرة وتقنعني بولد عمتي وانه صاحب درسات عليا وانه مطوع وانه شاريك
وقلت عطوني فرصه اسبوع افكر
واختي تبي اعطيها الرد بنفس الليله وابوي كل شوي يتصل عليها ويسألها وقدرت تضغط علي وقالت انتي ماعطيتينا الموافقه وقلت خلاص انا موافقه رغم اني مو مقتنعه فيه
وانخطبت له وطووووول فترة الخطوبه كنت مهمومه وحزينه ودمعتي على خدي
وكنت خايفه منه لأنه شديد رافض زواجي يكون فيه طقاقات وامي تقولي الحب يجي بعد الزواج واختي تقولي الحب يجي بعد الزواج وصديقتي تقولي الحب يجي بع الزوااااااج
وتزوووووووجت
اول موقف كرهني فيه ليلة الدخله
كنت مرعوبه وخايفه من ... وكان يتهمني بإني ماابيه يقرب مني
وكان يحلفني بالله ويقولي انتي شكلك مغصوبه على الزواج
والموقف الثاني الي كرهني فيه تأخرت ماحملت وكان يضغط علي كل شوي رايحه للدكتورة وكاشفه عندها وكلهم يقولون لي انتي سليمه وكل مره اجي من دكتورة ابككككي حسبي الله ونعم الوكيل
وحملت وتوني طالعه من النفاس ويضغط علي ويقولي احملي وجيبي لنا طفل ثاني وانا اقوله انت صاحي ولدي توه صغير انتظر اقل شي الين يكمل سنه ووووويضغط علي الين حملت على ولدي وهو عمره 6 شهور بس وتعرضت لنزيف وتعب والحمدلله جبت بنيه
والموقف الي كرهني فيه غيرته المفرطه انا مولدتني دكتورة ويحلفني بالله انتي من مولدك رجال ولامرة
والموقف الي كرهني فيه جميع اسرار بيتي وسوالفي عند امه
والموقف الي كرهني فيه يزعل على اتفه الأسباب كنه طفل وماعنده حلم وصبر
اذا جيت اعزم صديقاتي يضيق
واذا جيت اروح لصديقاتي يضيق
وماعنده ثقه فيني
واذا جاني اي اتصال من رقم غريب يتكهرب ويتنرفز
رغم انه يقول انه يحبني ويموت علي ووو
لكن افعاله متناقضه مع تصرفاته وانا مو مقتنعه فيه
ولد عمي تخرج وتعين وانا مازلت افكر فيه ومازلت احبه
وهو كره الزواج عقب ما اعرست
وكل ما اشوف امه تخنقني العبره
زوجي عمره 31
وعمري 25
زواجنا له 4سنوات
__________________
علـق القَلب بـ الخالق وأجعل الحُب اﻷعظم له
أما البشر فـَ غداً ربما تبغض من أحببت وتحب من أبغضت
فﻶ تبالغ بـ مشاعرك وﻵ تعلق قلبك بهم | ♥"
التعديل الأخير تم بواسطة مارد الجنوب ; 06-12-2012 الساعة 05:32 PM
السبب: تم تغيير العنوان ليتناسب مع مضمون الموضوع