السلام عليكم ورحمة الله وبركاته

أولا اشكر القائمين على هذا المنتدى والاعضاء الكرام وفقهم الله

في البداية احب اشرح مشكلتي لعل وعسى ان تدلوني على الطريق الصحيح ( لا خاب من استشار ) .

اولا عمر زواجي سنتين تقريباً ..

تزوجت وعمري 29 وزوجتي 18 سنة بدأت المشاكل من ليلة الدخلة كانت متخوفه جداً من تلك الليلة و اتعبتني نفسياً وتعبت معها وتم الأمر بعد 3 اشهر من زواجي مع اني لم ااتيها بالقوة وكنت دايم احاول ان اسهل عليها الامر ..

ومازالت مشكلتي في الفراش معها ودائماً تتهرب مني ولا تعطيني حقي واذا اعطتنياه تعطيني وهي كارهه وبدون نفس وفي حال اخذة حقي في الفراش بعد ما اخلص تجيها حالة من الإنهيار من البكاء بدون سبب مع اني احاول بشتى الطرق ما اجرحها والبي رغبتها لكن حالتها النفسية سيئة وانا ماادري وش اسوي .

كنت احاول بشتى الطرق اتقرب منها اذا طلعت من البيت اسأل عنها اكون معها في كل لحظة لكن تعبت وانا اشوف الاهتمام من طرف واحد

.. وبعدها صارحتني انها لاتعلم مابها بالضبط فكل ما اريد ان المسها تتعب وهذا الشئ ليس بيدها واذا جلست في البيت يجيها ضيقه واخذتها عند شيخ يقرا عليها وقال لابد ان تستمر بالقراءه وجلست لمدة سنة وانا اذهب بها للشيخ فهي تعاني من مرض روحي حسب كلامه وصار يعطيها من الزيت الزيتون الماء المقري واستمرينا لمدة سنه .


( مره جلست معها جلسة مصارحه وقلت انتي ماتبيني كارهتني علميني انا ما اجبرك تعيشين مع شخص كارهته .. جلست تبكي وقالت والله مدري وش فيني ولا ادري وش مصدر النفور الي عندي منك مع انك طيب معي ما مره اذيتني )


امورها تأزمت اكثر صارت ماتحب تطلع دائماً في حالة نفسية سيئة احاول اطلعها من البيت ماتبي تطلع ..

اخر ثلاث شهور ماعاد صرت اتحمل الوضع بيتي صار جحيم وكئيب وصرت حاد الطبع متنرفز منها على طول ومشحون وفيني طاقة سلبية هائلة ما عاد صرت اقدر امسك نفسي وهي حالتها النفسية إلى اسوء وانفجرت عليها غصب عني وسمعتها كلام يابنت الناس ارحميني انا تعبت معك ما ادري وش تبين اذا كارهتني لاتجبرين نفسك شوفي صحتك شوفي وضعك وإكرام النفس هواها لاتتعبيني معك ترا ماعاد فيني طاقة ولا تحمل لهذي العيشة .. قالت وش تبيني اسوي الشئ مو بيدي وبعدها رحمتها وقلت خلاص روحي عند اهلك ولا تقولين لهم شئ واقعدي عندهم مته ماحسيتي ان نفسيتك تعدليت مريت اخذتك انا والله ما اقدر اسوي شئ واتعذب اذا شفتك بهالحالة بدون سبب . ( سويت هالشئ قلت يمكن وجودها عند اهلها يخفف عنها شوي )
وديتها عند اهلها جلست اسبوع وكانت حالتها النفسية من سيئ الي اسواء عند اهلها

بعد ما مر الاسبوع اشتقت لها ودقيت عليها وقلت ماتبين ترجعين لبيتك قلت مرني قالت انا تعبت وهذي المره بحاول اعيش ولا ابي اظلمك معي لكن اذا انت ماتبيني ودني عند اهلي قلتلها انا ابيك ويوم اني انفعلت وقلت هالكلام بسبب الوضع الي حنا فيه شايفه .

( بمختصر العبارة حياتنا فوق تحت بدون سبب وانا صرت اخاف اني اظلمها ولا يجي يوم واجرحها بالكلام بسبب تقصيرها معي في الفراش وفي امور كثيرة وانا ما عاد صرت اتحمل بصراحه واخاف اني ما اقدر امسك بإحسان الفترة الأخيرة ردات فعلي ماعاد اقدر اسيطر عليها وهي في ذمتي وانا مسؤل عنها وعن حالتها النفسية التي تزيد سوء لا ادري ماسببها )

( ولا تقولون تزوج ثانيه لأن ما عندي القدره المادي الي تخليني اتزوج ثانيه )



بصراحه حياتي جحيم في جحيم لكن ثقتي بالله كبيرة بأن يحدث بعد ذلك امرا وهل الطلاق في حالتي رحمه لنا افيدوني بالحلول الي تصبرني وتصبرها على هالوضع الذي لا يطاق ؟؟


مستجدات الرد 19

http://66n.com/forums/showpost.php?p...4&postcount=19

الله يفرج همك ويشفي زوجتك ارقوا انفسكم بسورة البقره يمكن عين صابتكم

__________________
اللهم اني استودعك اولادي وبناتي دينهم وآمانتهم اللهم جنبهم الخمر والمسكرات والمخدرات والزنا واللواط والفتن ماظهر منها وما بطن يامن لاتضيع ودائعه

وعليكم السلام ورحمة الله وبركاته..

الأستاذ الكريم مسفر /

تعلم أين الخلل الحقيقي الذي يحدث :

هو عدم إدراكك لإحتياجات زوجتك وخاصة في العمر، في هذه المرحلة تعتبر صعبة ولابد أن تراعي الفارق العمري الذي بينكما

أنت تريد أن تراعي إحتياجك وتلبي رغبتك الخاصة لكن هل أنت علمت ماذا تريد؟!

زوجتك تعتبر في سن تريد الفتاة تعيش هذه المرحلة ومتيقن ولو تعاملت معها وأن تنزل لمستوى عمرها

نفسيتها ستصعد..

فلا تضغط عليها من أجل العلاقة سيجعله تنفر منك أكثر بهذا الأسلوب،

اليوم اعمل لها مفاجأة واخرجها ملاهي تلعب أحضر لها غزل البنات وأنت كل معها والعب شاركها إهتمامتها بالشعر بالكتابة بأي شيء تحبه..

احتضنها شاكس معها وهكذا سينكسر الحاجز الذي بينكما..

لا تستصفر هذه الأمور الصغيرة اللاوتي في عمر زوجتك تعني لها الكثير،

خليها تشترك معك في الأشياء اللي أنت تحبها..

كلما انطوت على نفسها سيزداد الأمر سؤء، اخرجا ليلا مارس رياضة المشي واثناؤه

ستخرجا السلبية التي في داخلكما..

تكرار كلمة الطلاق خطأ فادح ترتكبه ويكبر الفجوة الذي بينكما ولا يشعرها بالأمان معك..
الأمر بتاتا لا يستحق الطلاق...

اجعلها تنظر للحياة بءيجابية واحرص على أن يكون حديثك إيجابي فقط..

وفق كما الله..

اولا اخي باين انك انسان عاقل وحكيم ماشاء الله تبارك الله والله يزيدك نور وهدى وحكمة

انت حاولت بكل ما أوتيت من قوة وماقصرت مع زوجتك لم تكن قاسي عليها ولا فظ وجزاك الله خيرا على مافعلت
نصيحتي لك انه تحاول تسأل انسان مقرب منها بشكل كبير ويعرف كل شي عنها لانه ربما البنت يكون فبالها امر معين وماتقدر تتكلم معاك فيه والعلم عند الله
ايضا لا استبعد الأمراض الروحية من سحر وعين كفانا الله واياكم الشرور جميعها

__________________
تَلَوْا باطِلاً، وجلَوْا صارِماً، وقالوا: صدَقنا! فقلتم: نعَم!

زوجتك فيها حاله نفسيه علاجها مو عند الشيخ علاجها عن طبيب نفسي

العين حق والسحر موجود بس مو كل امورنا نكطها على الغيبيات كاهم الاجانب شحلوهم و لا عمرنا سمعنا احد منهم مطكوك عين او فيه سحر

اتفق معك
الاستشارة النفسية في وضعكم افضل

أنفق مع هذا الرأي

مع الاسف

كثير ممن يسمون نفسهم مشايخ , هم كاذبين دجالين همهم يسرقوك بمويه مقري عليها ولا زيت يبصق فيه من وسخه وعفنه .

وهذا منتشر بكثرة الان , ووزارة التجارة صادرت كثير منتجات " مقري عليها " واكتشف انها غير صالحة للاستخدام الادمي .

لا تسلم نفسك لهؤلاء الكاذبين , ارقي نفسك بنفسك , اقرأ سورة البقرة , حافظو على اذكار الصباح والمساء , مو كل شي تروحو لشيخ وغالبا يكون كاذب دجال يستغل الدين للكسب .

زوجتك بحاجة الى دكتور نفسي فاهم ومتخصص في هذه الامور , اسأل احد قريب لها عن ماضيها , ممكن تكون لا سمح الله تعرضت لتحرش جنسي وصارت تكره الرجال او تكره الفعل نفسه , اسأل امها او ابوها واشرح لهم الوضع كاملا .

والله ييسر امرك

جميع الطرق جربتها لكن حالتها تزداد سوء والي جالس يخوفني اكثر اني ماعاد عندي القدره والصبر مثل اول الاشياء الي كنت اسويها من تدليعها من محاوله صنع البسمه لها تلاشت نفسي انكسرت اكثر من مره كل محاولاتي ماتجيب نتيجه ...

والله اوقات احس اننا جالسين نظلم بعض وان مالله كاتب لنا نعيش مع بعض وحاس اني اضلم نفسي وهي جالسه تضلم نفسها بالعيشه معي اوقات الومها علي تصرفاتها واوقات ارحمها لما تقول مو بيدي والي يصير لي غصب عني تقول ودي اموت انا كارهه نفسي ليش انا كذا ... ولما اسألها وش المطلوب مني هل انا مقصر في شئ تقول انت تجي اوقات ماتسأل عني اقولها انتي تقولين لي ابعد عني انا متضايقه انجرح احس اني مني مرغرب فيه اذا حاولت احضنها اخفف عنها تبعدني اغلب الوقت تنام لحالها

اتا ما ادري وش تبي مني ولاهي تدري وش ناقصها


حياه متعبه ومرهقه والخيره دائما فيما اختاره الله ... مالي الشخص الا المكتوب

اوقات اتمني اني ماحبيتها حتي يكون طلاقها سهل علي قلبي لكن خايف اندم ... بصراحه مدري وش اسوي صحتنا راحت والعمر يمشي اوقات اندم اني تزوجت كنت مرتاح وانا عزوبي ... ياجماعه جد انا مدري وش جالس اقول مشحون ومنقهر ومغبون وضايقه فيني الدنيا ولا فيه حل واضح لمشاكلنا

الله يعينك ويكتب لك الخير اسعى في علاجها اولا واطرق كل الابواب المشروعة واصبر واحتسب