السلا م عليكم ورحمة الله ا خواني واخواتي
انا عضوه جديده وانا من زمان متابعه لكم بصراحه واليوم قررت اسجل لسبب واحد
بحثا عن حل عندكم لمشكلتي
في البدايه انا متزوجه من خمس سنوات ولدي بنت من بداية زواجي مشاكل طبعا الرجال عنيد حارمني اقل حق وهو اني ازور اهلي مع انهم معاي في نفس البلد بس كل مره اروح لهم تخيلو انه يجلس له اسبوع اوسبوعين زعلان ولا يكلمني ويهجرني حتى في الفراش ولما يصير عزيمه كبيره واقول له نفسي اروح يابو فلان يقول لي لا تدرون ليه يقول لي حركات الحريم هذه اعرفها انتي تبين تمشيني على نظام معين
امنت بالله واقتنعت بهالحياة الي تجيب الهم والسبب في اقتناعي بذلك لما شفت تعامل ابوه مع امه وخواته عندهم النسوان ولا شي
المهم تعبت كثير وفيه احيان كثيره احس ان نهايتي مستشفى الامراض العقليه من تصرفاته طبعا الاخ عاطل باطل لا شغل ولا دراسه ولا شي تطورت حياتنا في الثلاث سنوات الاخيره بطريقه مضحكه تعرفون الفراغ الله يكفيكم شره طبعا الرجال في البدايه اشترى لاب توب زعم انه بيشتغل في سوق الاسهم اشتغل له ثلاث شهور ويبقى الحال كما هو عليه طبعا كان عنده ايميل مايعرف يغير الرقم السري حقه
فجاءه تعرف على شباب عند شباب يعني جمعة سوء فجاءه صار الرجال يدخل شات وكامات
وفجاءه وبعد تطور رهيب وصار لي سنه على هالحال صار يكلم النسوان قدامي ويشجعهم بالكامات
طبعا عشان ايش عشان يعرضون وتعالو خذو يابشر طبعا لا صلاة ولا عباده جالس على هالكمبوتر
تعبت ورب البيت تعبت تركت البيت اكثر من مه وهددته واخر شي ارجع عندي بنت وقطعت قلبي
تعبت كل يوم يجلس له 12 ساعه وهذا اذا ماكان اكثر مع هالبنات وقلة الادب ولا حاجيته قال لي امتع عيوني واخر مشكله صارت بيني وبينه زودها بالكلام وقال لي عاجبك عاجبك موعاجبك الباب يفوت جمل
ولا اجلسي وانتي ساكته
......... عذرا اتعبتني الكلمه بكيت طول اليل من القهر
كل يوم اصحى من النوم اصلي الفجر اسمعه يكلم شكل ولون
وطبعا كله وين في الشات الي قائم عليه احد شاببنا الطيبين ونفسي اذكر اسمه كل ماشوف عجوز اقول لها ياخاله انتي دعائك مستجاب لا قالت ايه اقول لها ادعي على فلان الي مشتغل شغل دعاره على بنات الناس
تعبت يابشر واحيانا تدرون احيانا انقهر اسمعه يقول كلام مايقوله لي ابدا طبعا الا خ في الله كل شهر اوشهرين يسمعني كلام يسم البدن مثل انتي على ايش شايفه نفسك انا شفت نسوان تفتح النفس مو انتي (وانا الحمد لله اي احد يشوفني يقول لي ماشاء الله عليك الله يهني ابو فلان فيك )
اخر مره صارت بيني وبينه مشكله قال لي كلام يجرح قال لي يابنت الناس انا حتى النوم انام معك بس استعطاف لك وانا شايف نسوان قد شعر راسي
امي دايم لما اشتكي لها تقول لي كل الرجال كذا تعبت والله العظيم احس اني ولا شي بسببه
مره من المرات كنت في مكان عام ذبحتني وحده بنضراتها اخر شي قالت لي خذي رقمي وخلينا على اتصال حسييت اني ملكه صراحه ومااخفيكم كنت ابسوي شي بس عشان اقهره بس انا لي دايم يمنعي شيئين واحد اسمه الله وواحد اقترن اسمي باسمه من اول ماطعلت من بطن امي ولا احب اخذل الاثنين هذولي
ورب البيت احس في داخلي كلام كثير نفسي اقوله اليوم الخميس والحين الساعه 10 وهو طبعا نايم ليه لانه بيصحى في اخر الليل في الوقت الي تنزل الملائكه لسماء السابعه عشان يشجع البنات احيانا اقول يارب طالبتك لا غضبت عليه لا تبلاني لا في بنتي ولا في بيتي طبعا لو قلت له خلني اروح لاهلي يقول لي لا انتي ماتستاهلين شايفه انك تستاهلين اني اخليك تروحين وتجين طبعا كل هذا ولا يطلعني انا وبنتي ولا حتى نشوف الشارع احيانا اكمل الاربع شهور ماشوف الوالد وربي تعبت من الجفاء من الي عنده حل وش اسوي انا احيان افكر اروح لابو متعب واقول له طالبتك الفرج يابو متعب
لا تقولون وش حادك الي حادني الي حد الحريم الضنا تعبت كل مره يلوي ذراعي في بنتي
انا عارفه اني طولت عليكم بس تكفون ابي حل وش اسوي لا تقولون امه وابوه امه مسكينه ارحمها يبي لها من يعونها على هالحياة وابوه رجال كبير حتى مايقدر يمشي ولا حب اغثهم مساكين وربي ارحمهم لانه قاسي حتى مع امه وابوه صار لي فتره الحمد لله احيانا احس بضيقه كبيره منه ومن البيت ومن العالم كله واجلس الحالي في غرفتي استغفر واكبر وادعي الله يفرجها وارتاح واحيانا احس برغبه كبيره اني اهرب من هالعالم لعالم ثاني بس ماني عارفه وين مشكلتي كبيره والاكبر منها اني ماقدرت اتكيف مع هالحياة ومع طريقته ولا اقدر اعيش حياتي بالطول وبالعرض واتركه بس ماقدرت اعرف حريم كثير تنتقم منه بعلاقات مع غيره صحيح تكون مو مقتنعه بس اهم شي تقهره وتحس بداخلها انها استغفلته وهذا اكبر عقاب له بس ماقدرت اخاف من الله اخاف اموت وانا على شي خطاء جفاف في كل شي حتى الكلمه الحلوه ماسمعها منه تذكرون اخر موجة غبار جت الرياض دقيت عليه لانه كان براء قلت له يابو فلان انتبه لنفسك قال لي اقول يالله بس يالله وقفل السماعه في وجهي بلاهي وشلون اتعامل معه عارفه اني طولت وقلت كلام يسوى ومايسوى بس احيانا اتمنى اسجل في جل المنتديات بس اتكلم واقول الي عندي وبس اهم شي ارتاح
دمتم احبتي
اختكم تعبت من الجفاء
تم تعديل العنوان
الإشراف
26-03-2009, 10:04 PM
ضوابط المشاركة
العرض المتطور