اختي ... الله يعينك ويفرج همك يارب ..

شوفي عن تجربة وعلم ... الضرب والتهديد والصراخ والعصبية ما تنفع ابدا ابدا مع اطفال بهذا السن .. مع الايام بيتعودون
على هذا الاسلوب وما بيجيب معاهم اي نتيجه وبيعاندون اكثر ... ويبدأون بالصراخ فنصيحتي
اشغليهم بأي شي ( العاب + تلوين + يشاركونك في اعمال البيت ) حطي لهم صندوقين ... واكتبي اسم كل واحد على
صندوقه .. وقولي لهم : اللي يمسك إيده عن اخوه ..ويكون هادئ في هذا اليوم ... ويسمع كلامي وكلام بابا ...
بحط في صندوقه حلوى .. او ملصقات بشخصيات يحبونها او اي شي يحبونه ... اتبعي معهم هذه الطريقة ...
جربي لمدة اسبوع وبإذن الله بترتاحين من هالناحية .. واللي يخالف امرك .. عاقبيه بحرمانه من الهديه واعطاء
الطرف الاخر ... واطلبي منه الاعتذار ...واكثري من عبارات المدح والتشجيع ...

بالنسبة لزوجك هو يشوف طريقته في التربية هي الصح وانتي
تشوفين طريقتك الصح ... بالتالي بتزيد المشاكل بينكم ... انتي تشدين بزيادة وهو مرخي معاهم بزيادة .. فخير
الامور الوسط ... هو عارف انك امهم ومن حقك تربينهم بس هو ملاحظ ان طريقتك مبنيه على الشدة والصراخ ..
وانتي تشوفينه متساهل جدا وما يساعدك في التربية ... برأيي اولا لازم تراضين زوجك .. لازم تعتذرين لانه بادر
وحاول يراضيك وانتي صديتيه وللعلم ( في من الازواج يعتبر العلاقة الحميمية طريقة للاعتذار ) ..
لا تجلسين تلومينه وانا اعمل علشانك وانته ما تعمل لي شي ومن هذا الكلام ... شوفي وقت مناسب وناقشيه ابدئي
نقاشك باسم الله وبعدين قولي له : انا عارفه انك ابوهم واكيد تربيتك لهم مهمة وما نستغني عنك .. بس صراخ الاطفال
وفوضويتهم توترني وما اعرف اتصرف حزتها ... لكن اوعدك اني من بكرة بتبع معهم اسلوب جديد .. بعيد عن
الصراخ والضرب ... ولازم تساعدني في هذا الشي ... لاني مستحيل اسوي شي بدونك يا حياتي ...
وبس ... اكرر ابتعدي عن الاتهامات واللوم والعتاب ...

والله يوفقك ويسعد ويحفظ لك عيالك وزوجك ... ويجمعكم على المحبة والخير ...