تصفحت هذا المنتدى كثير ولمست الكثير من النصائح اللي فيها الخير إن شاء الله لذلك حبيت اعرض مشكلتي هنا لأجد ضالتي..

انا و زوجي واجهنا سنة صعبة كلها مشاكل واهمال من الطرفين وأعترف بذلك. كنت اشتكي له الوحدة كثير وانه ابي ارجع اكمل دراستي لانشغل بشيء مفيد بدل قضاء الوقت 24 ساعة بالمنزل.
قدمت للدراسه وانقبلت واخبرته اول شخص وقال لي بالحرف يصير خير. ولم يعطي اعتراضا واضحا، وبدأت الدراسة وحاول استفزازي كثير الى ان خرجت من المنزل و خبرته اذا وافق على دراستي برجع ان شاء الله.
الان لي مايقارب السنة لكنه لم يأتي للسؤال عن بنته الا مرة او مرتين ورافض رجوعي الا بعد ترك الدراسة ، علما ان المتبقي لي في الدراسه قليل جدا
ويقول انني عاصية وانا كاتبة في عقد الزواج شرطي الوحيد اكمال الدراسة فقط.

عذراً ما اعرف اصيغ الموضوع لكن ان شاء الله ان الكلام اللي كتبته مفهوم، انا استغرب فقط كيف ما يسأل عن بنته مع انه كان متعلق فيها بشدة.
هل معقول ان بعض الرجال بهذهِ القسوة.

انا اخطأت بخروجي من البيت ، لكن ما كان في الا هذا الحل عشان اكمل دراستي،

على حسب فهمي
هناك الكثير من الازواج ما يحبون طريقة لي الذراع والذهاب لبيت الاهل
وان حدث وذهبت المراة فلن يرجعها ترجع وحدها حتى لا تتخذها وسيلة تهديد وتذهب كل كرة
ويضفط على مشاعره ولا يبينها حتى اشتياقو لبنته

انا قلت له اذا وافقت اني ادرس وبدون ماتتعمد تضايقني اني اترك الدراسه انا ارجع بنفسي، لكن يقول البيت مفتوح لك اذا تركتي الدراسه واثبتي لي. مُصر إني اترك الدراسه بحجة خايف اني اهمله واهمل بنتي ، علما انه شبه غائب اغلب يومه عن البيت و دوامي خفيف يومين بالاسبوع حتى ماراح يلاحظ اني مو موجودة. ما اعرف ليه هو كذا

ما دام الشرط مدوّن في عقد النكاح , فما له حق يزعل أو يمنعك , وحتى لو زعل مالك دخل في مراضاته في هذه النقطة , يزعل بكيفه ويرضى بكيفه , لا تعطين أي ردة فعل تجاه أي تصرف له يمنعك أو يضايقك في هذا الشرط , وبإمكانك أن تفتحي معه حوار وإتفاق على الاهتمام بالبنت في حال غيابك , وإذا كان مشغول تودون البنت عند أهله أو أهلك ,

الموضوع ما هو مستاهل يكبر ويوصل لهالمرحلة , لازم تجلسون وتتفقون في أسرع وقت ,



,

__________________

هذا اللي أنا مستغربته ، للدرجة هذهِ صعب عليه يتقبل اني ادرس ! وش فيها اذا الزوجة عندها طموح وقادرة انها نكمل دراستها! استغرب من هالنوعية

لا فكر يتصل ولا يسأل ولاشيء مدري وش السواة معه

زوجك على ما يبدو انه غير مستغني عليك وصابر لم يطلق ولم يتزوج
لكنك اخطاتي بخروجك
كنت قادرة تحلين المشكل وانت هناك وتصبرين
يوم حبيت اتوظف جلست سنين وانا اقنع في زوجي ويوم توظفت وضع كل العراقيل في وجهي عشان اتعب واتوقف اولادك الطبخ الملابس صرت اجري داخل البيت كي لا ابين له اني عاجزة عن التوفيق
والان حقا تعبت


ما اردته ربما لمس منك بعض التقصير او لا يريد ان يراك متعبة وهذا وارد جدا
الحل هو التفاهم معه بهدوء لانه على ما يبدو زوجك عنيد لن يلين الا باللين
طبعا هو شرطك لكن ما عساك تفعلين ان يبس راسه
اتصلي به واخبريه انها فترة قصيرة وتعدي وستتفرغين له بعدها ويجب ان يصبر عليك

الله يحقق امانيك

مايقبل النقاش في موضوع الدراسة ابدا مهما اقدم من وعود اني ماراح اقصر معه او مع الاولاد ، حتى جت فترة اخوانه اتصلوا بأخوي قالوا اذا ماتبي ترجع وتترك الدراسة خلاص بنزوج اخونا مانقدر نشوفه عزوبي من جديد ونسكت،
حتى هو ارسل لي كذا مره اذا مارجعت خلال كم يوم بيتزوج ، وانا قلت له يا بو فلان سو اللي يعجبك انا قلت لك توافق على دراستي واجيك لو مشي لكن اذا منت راضي خلاص سوو اللي يريحك وانا اسوي اللي يريحني دامني ماسويت شي غلط الحمدلله.
علما انه حتى لو درست والله ماراح يحس اني ادرس دوامي قصير جدا ، وهو اغلب وقته خارج البيت واذا داوم دوامه طويل

من المهم، تدخل العقلاء من أهلك، كوالدك أو غيره من الكبار، الحريصين على تسوية الأمور، لا الحريصين على الانتقام والأنفة.
فزوجك هداه الله أخطأ في حقك حيث قد شرطت عليه في العقد إكمال الدراسة، بل لو لم تشرطي عليه في العقد ذلك، لكان حقيقا أن يتسامح في الأمر، فالعلم لا شيء يعدله.
ولا شك أن شيئا من حقه وحق عياله سينقص بسبب انشغالك، ولذا ينبغي الحرص على عدم إبداء ذلك، وسيكون الأمر امتحانا صعبا عليك.

في النهاية كما هي البداية: أرى أن يتدخل أهلك العقلاء ليبينوا له أن هذا شرط في العقد، وواجب عليه الوفاء به شرعا، فإما يكلمونه هو أو يكلمون عاقلا من ذوي قرابته يقدره ويحترمه.
واسألوا ماذا سيفعل القضاء لو حول الأمر عليه.

__________________
كثير من المشاكل الأسرية والمعقدة لا تنتهي تماما، وإنما تبقى لها بقايا.
أي أنها قد يبقى منها 20% مثلا

مشاكلنا الأسرية المعقدة كثير منها لا ينتهي بصورة نهائية وإنما تبقى لها بذور يمكن أن تنمو في يوم ما، ما لم نتعاهدها بالحصاد.

مشاكلنا المعقدة لا يمكن حلها بضغطة زر، وإنما تحتاج إلى ممارسة ومجاهدة وضغط نفسي ومدة أطول مما نتوقع ليأخذ الحل مجراه.
المهم الصبر، فقد يكون بينك وبين الحل غشاء رقيق، فلا تتوقف.

المشكلة يا ابو اسامة انه مافي عقلاء ، اخوي كان واقف معي وداعمني لكن اخوان زوجي كلموه وقالوا بنزوج اخونا ، جاني يقول لا تهدمين بيتك ارجعي واتركي الدراسه ! تغير رأي اخوي من مكالمة وحده، والان يقول لي مصير زوجك يتزوج خلاص انا مالي دخل بالموضوع. وماعندي غيره اخوي الثاني صغير..
اخوانه واخته كلهم يقولون لي طاعة الزوج واجبة وانتي غلطانه مو لازم تدرسين، علما انهم كلهم شايفين وعارفين الوضع انه مايجلس بالبيت. غير هذا لي مايقارب 7 اشهر الان خارج المنزل وماصرف على بنته ولا ريال ، اذا طلبته مصروف بنته يقول ما اصرف عليها برا البيت.
تعبت والله يعني امي هي اللي متحملة تصرف على بنتي واحتياجاتها من راتب ابوي التقاعدي وانا صحيح استلم مكافأة لكن تروح على المواصلات. الله يعين بس مدري كيف اقنعه يصرف على بنته او يوفر احتياجاتها اقل شيء، خصوصا ان موضوع رفع قضيه مرفووض من الوالده تماما

" المسلمون على شروطهم"