يا هلا والله فيكم حبايب قلبي يامنتدى الاسرة والمجتمع الغالين والله اني من زمان ابي اطرح موضوع والحين تمكنت ولله الحمد

مشكلتي : هي عن والدي طبعا ابوي عمره 53 سنة اي ماهو صغير ابدا ابوي متزوج من 31 سنة وانا اكبر عياله وهذا وعمري 30 سنة والله تعبت منه للاسف مايسمع الكلام والدتي متوفية من سنتين وعاشت حياة سيئة جدا معه والحين اقولكم ليش ابوي انسان داشر

اولا : ابوي والعياذ بالله يشرب الخمر من زمان ومن اقولة يايبة انت في اخر عمرك في الدنيا صدقني اخرتها راح تكون في الجحيم يجي يسبني وكل شوي في حالات للاسف سيئة

ثانيا : ابوي مايصلي ابدا بتاتا وان قلت يايبة يلا امش صلي يعني اغصبه بعض الشي يجي يصلي وصلاتة كل غلط وغلط هذا ان كان استغفرالله والله ما ابي اتكلم على ابوي كذا لان مهما يفعل يبقى ابوي

ثالثا : ابوي حاط عينه على الخادمة بشكل كبير جدا والله العظيم اني مرة شايفه فتح غرفة الخادمة وشافني وعلى طول ولم سالته قال وهو يتعلثم عشان تسوي لي قهوة ؟ طيب كانت القهوة في المطبخ جاهزة وحارة ؟ وكمان شفته يوم من الايام يوم جت الخادمة عنده عطته الشاي قالها وش رايك تجلسين جنبي اعلمك عود وللاسف ابوي ناوي على شي ثاني والحمدالله الخادمة رفضت والى الان ابوي حاط عينه عليها

وللاسف انا تعبت مع التحدث معه وزي ماقلت لكم في الموضوع ابوي انسان للاسف بشكل كبير داشر حولنا ننصحة يعيئ لا صلاة لا قيام لا ولا ولا وكلامه والعياذ بالله بذيئ وطفشنا منه انا واخواني واخواتي وللعلم ابوي متقاعد قبل 3 سنوات اي تقاعد في سن 50 سنة والله صرت انحرج يوم يسالني ولدي ليش جدي يسوي كذا ما اعرف ارد والله فضحني ابوي جدا زوجتي صارت ماتسلم عليه ابدا كل الناس ابتعدو عن ابوي

وبمشيئة الله انكم تقدرون تساعدوني بما افعله مع الوالد

الله يهديه
لاتقول عنه داشر قول ضال عن سبيل الله واسال عنه الهدايه
كلم شيوخ يكلمونه لعل وعسى يهتدي
ادع له بالهدايه
ماطلب الزواج بعد وفاه امك
الله يرحمها ويغفر لها

السلام عليكم

اخي ابوك ما نو كبير بالعمر

زوجوه و ان شاء الله يتغير، و حاولوا تزوجوه و اختاروا وحدة تكون حلوة المعشر و علموها على حاله حتى تكون عونا لكم

بالنسبة للخمر يحتاج مساعده طبيه

و بالنسبة للصلاة فما عليك غير الدعاء له بالهدايه و هذي ايام بركه فلا تدع اليأس يصل الى طريقك

لا تتهربوا منهو استحملوه، كلم اخوانك و اخواتك

و كلما تعبت تذكر انه ممكن يروح النار بعمايله،

اكيد هو ما يشرب لوحده، حاول تفصله عن رفاقه السيئين

الله يرفع عنه البلاء و يصلح حاله

السلام عليكم و رحمة الله وبركاته
يا من تنصحون بتزويج ابيه
من منكم يقبل يزوج اخته او ابنته او قريبته لرجل شارب للخمر و مفرط في الصلاة؟؟؟

حرام لا تنصحوا بتزوييييييجه

الوحدة هنا تجي مخطوبة لشاب عمره 25 سنة و تبغى تغيره
و نحن ننصحها انه صعب تغيره

تبغوا وحدة تغير ابوهم و عمره قريب يصير 60 ؟؟؟
ايش ذنب المسكينة تتورط بواحد مثل كذا !؟

.
.

الحمدلله و الشكر انه ( والدتهم ) إمراءة عظيمة
قدرت تتحمل و تصبر و تربي اولادها و بناتها

الله يرحمها و يغفر لها ..

.
.

غيروا مكان سكنه ياخوي اذا تقدر
و غيروا المدينة الي هو ساكن فيها لو تقدروا

بلغوا واحد من الهيئة .. يتعاون و يتفق معاك على ابوك
بحيث ممكن يتفق معاك انه يقبض عليه متلبس وًهو يشرب
ثم ياخده بالهيئة و يوقع على ورقة تعهد و كذا
و خليه يخووووووووفه .. و جاهدوا على تخويفه حتى يبططططططل المهلكات هذه


من لم يزع بالقران .. يزع بالقانون

الي بالهيئة ممكن يتفق معاك

لكن ما يتسجل البلاغ على ابوك بشكل رسمي و لا ينفضح
الي بالهيئة ممكن تلاقي واحد يتعاون معاك

مجرد تخوييييييف و حتى يصحى لنفسه

زوجوه؟!!!!!!

ايه انا انصح بذلك

دام انه بيصوم رمضان يعني نتوسم فيه الخير

لا تفضح ابوك عند الهيئة

الزواج ممكن يصلحه

اللي يهرب للخمر يبي يهرب من مشاكل بس هو للاسف اخطأ الطريق

بالنسبة للي تقبل او لا لهذا انصح باخبازهم بالحقيقة

و اتمنى كل من يدخل للموضوع ان يدعو له و لنا بالهداية و الستر

انت فكرتي بالروح الثانية اللي بتعيش معاه؟!
تتقبلين تعيشين مع انسان مثله
بارذل العمر ومدمن خمر
انت تعرفين كيف هي اخلاق المتعاطين ونفسياتهم والسنتهم؟!
ليش؟
هالزوجة ماهيب روح
مو انسانة المفروض تبحث عن السعادة او على الاقل الراحة
وين الراحة مع رجل مثل هذا؟!
الين بكرة وبعده ادعي على كل ام تزوج ولدها عشان يعقل
واتمنى لبناتها مثل ولدها الصايع اللي ما قدرت تربيه
وراحت تبلش فيه بنات الناس
يا هالمرءة اللي ما لها قيمة عندكم
وهي اداة تستخدم لشتى الاغراض!!

الهيئة ما يفضحوا الشخص
يحافظوا عالسرية و يستروا عالاشخاص ..