السلام عليكم ورحمة الله ..
اخوتي واخواتي اتيت استشيركم في كلام لم استطع ان اصرح به لاحد سوى احد اصحابي
وهو انني اخشى انني اجمل من خطيبتي , لقد رايتها مرة ونظرت اليها كثيرا لما سولفت معها بالنظرة الشرعية , طبعا السواليف لازم مو مثل حركات بعض الشباب من اهل العصر الحجري اللي بس يدخلون ويسكتون يناظرون ويطلعون
لا انا سولفت وكلامي بعضه مضحك وهي محافظة على نزول رأسها من خجلها ياحليلها , عمرها 21
ولكن في احد قطاتي البايخة ههه فلتت منها بسمة لأن كلمتي اضحكتها ولكنها امسكت بالضحكة الا ان طرف الضحكة بدى ببسمة واسعة شوي يعني واضح ضحكة مكتومة, ولكنها نزلت راسها على طول البخيلة ههه طبعا راسها نازل ولكن بالبسمة نزل اكثر
المهم اخواني اخواتي, مااحس اني شفتها كويس لان راسها نازل ولو انها ترفعه شوي لما ترد على سؤال لي الا ان عيونها تكون نازلة بعد , ماشاءالله شعرها طويل
ولكن ملامحا وضحت لي بنسبة 70% بس مع اني طولت وانا اطالع فيعا لكن ماتمكنت
هي شافتني بعد
ولكن انا متخوف من ان اكون اوسم منها , وانا طموحي في الجمال عالي يعني ابي وحدة شق مثل مايقولون,
طبعا الجمال مايتبين كله في نظرة لان الجمال ممكن يتبين مع الحياة الطبيعية والحركات والتصرف والاطباع وغيرها , ولكني مع ذلك متخوف
اما الفتاة فهي متدينة من ناحية عدم اجتراحها المحرمات وليس كثرة عبادة وكذا , وعموما قيل اتق المحارم تكن اعبد الناس
مع اني ماشفتها كويس ولكن حيائها لعن خامسي , يازين الانوثة بس والحياء, خصوصا بسمتها اللي فلتت سوت فيني سوايا ,
اخوها صاحبي منذ ست سنوات صحبة قريبة جدا :-)
يقول عنها اخلاق جدا ومحترمة ومتواضعة وتستحي, واهلي بعد مدحوا اخلاقها خلوقة جدا وحالمة لبى قلبها,
طبعا انا ارتحت لها كثير جدا, واستخرت وارتحت جدا بعد, وهي كذلك استخارت وارتاحت وتبيني
الفحص الطبي قالوا ان فيها اشتباه مرض كبد عندها, فجلست هي اسبوعين بكي وحزن ومن الاباب خايفة اني ارفضها ولكن انا يوم اخبرني اخوها بحالتها , والله رفرف قلبي لها ياحليلها الامورة ماتستاهل كل هالحزن, ويوم بحثت عن المرض طلع بسيط, وبعد فترة طلع التقرير ان مافيها شي واستانست هي وانا بعد كثير
اسرتها محترمة جدا وفي وظائف مرموقة , اخوانها ابوها محترمين جدا والعائلة محافظة رغم الحالة المادية الحلوة,, حالتهم المادية ميسورة وعندهم خير ..
ولكن عندي هالحالة , لما اجلس مع نفسي واكون وحيد واقعد على النت او اي شيء, ارجع اتذكر مخاوفي وقلقي بانها ماتكون بالجمال اللي ودي فيه, او اكون اوسم منها
طبعا انا يوم شفتها , هي كانت سادة بدون شطة ولاكتشب, يعني بدون مكياج ولا روج ولاشي
بشرتها حنطية يعني بياض مخفف بشوية صفار بيض مع سفن دايت
لا لا جد يعني بياضها فيه شوية صفار,
يااخوان والله اني محتار , اتمنى القى منكم الكلام اللي يشفي الصدر ..

وانا جاد جدا يوم اكتب لكم, واعوذ بالله من ابليس,, وش الحل ؟

الأخ الكريم ..
أنت مرتاح نفسياً لها وهي كذلك وحتى الاستخارة كانت مريحة ..
ما يبقى إلا أنك تشوفها مرة ثانية وثالثة ورابعة كمان إذا أحببت حتى تتأكد بنفسك من جمالها وإذا كان يناسبك أو لأ ...

نحن لن نقدر نقيم إذا كنت أنت أوسم منها أو لأ ..
نحن فقط ممكن نقترح عليك حلول لنساعدك تلاقي الجواب بنفسك ..

لكن لفت نظري شيء ..
كيف عرفت أن شعرها طويل ؟؟!!!

__________________

ففروا إلى الله

والله مرتاح وانا خوفي مو من الارتياح, خوفي اني ارتاح وبعدين اتفاجأ بعد الملكة , لما اشوفها زين يعني
والله حاولت اعدي الموضوع لكن انا ماكتبت لكم الا وانا محتاج فعلا احد يتكلم يقول اي شيء في باله
يمكن احد يفتح لي أفق كان مغمى عني , أو قناعة تقلب تفكيري 180 درجة
الشغلة كلها طمع بجمال اكثر, فيها مسحة جمال مع انها سادة بدون تحسينات
المشكلة لا اختليت بنفسي قعدت افكر واقلق , موسوس الله يصلحني بس

شعرها كانت فاكته على ورى ولكنها مطلعة شيء منه من الامام, واللي مطلعته من الامام هذا كان جالس بحضنها ماشاءالله,
ومشكورين على التعقيب ونطلب من الله الزود

مثل ما تفضلت

اقتباس:

طبعا الجمال مايتبين كله في نظرة لان الجمال ممكن يتبين مع الحياة الطبيعية والحركات والتصرف والاطباع وغيرها

و الجمال والله جمال الروح ، ما أقول خذ شينة و روحها تحليّها .. لأ !
لكن خطبيتك تقول إنها حلوة .. و أعجبتك و مرتاح لها ..
و جننتك ضحكتها البريئة ايش تبغى أكثر من كذا ؟
.
قسم بالله أعرف وحدة جميلة جميلة جميلة .. جمالها ينطق
لكن شخصيتها .. و طريقة كلامها و ضحكتها .. بااااااردة .. ميتة !
.
و لو كنت أوسم منها ؟
مهما كان يبقى للأنثى جمالها و رقتها و نعومتها .. و لو كانت أسمر من الرجل أو ملامحها أقل منه
ياما شفنا "كوبل" البنت حليوة و الولد صاروخ بس الكل يقول لايقين على بعض و البنوتة كيوت
و هالزمن برأيي الجمال مش كل حاجة تجذبك نحو البنت - وهذا ملاحظ في مجتمعات النساء -
الوحدة لو تكون حليوة و ثقافة و شخصية و كشخة و جسم حلو .. كذا خلااااص البنت 100%
أما تجيك وحدة شق مثل ما تقول و ما فيها حيوية .. باردة ميتة .. ولا تعرف تقول كلمتين على بعض ولا تعرف تكشخ .. شالفايدة ؟؟
يقول المثل الفرنسي " كوني جميلة و اصمتي " ، مثل ما يقولون الناس عن البنت الصاروخ يا زينها ساكتة بس لأن منطقها يضيّع جمالها .

الله يسلمك اختي
لا انا اعتقد ان فيها حركات حلوة البنت طريقتها وعفويتها
لان زوجة صاحبي تقول انها احلى مني, طبعا زوجها اللي هو صاحبي هو قالي
هو الوحيد اللي صرحت له باللي بقلبي
مع اني نقدت عليه انه يوري زوجته صورتي لكن الشاهد هذا اللي قالته
فاكيد ان اسلوب البنت وكلامها واخلاقها وحلامتها محليتها > حلامتها يعني انها حالمة بس ماعرفت كيف اكتبها ههه
لا انا ممكن اضحي بقليل من جمال البنت مقابل ان يكون منطقها حلو وعقلية واسلوبها وحلامتها ههه
لاأريد هطفة :-)

الله يبارك فيك اختي, اشكرك على ردك
مع اني تمنيت حد يجي يخرشني ويلعن شكلي شوي عشان اتأدب وأهجد
لاني ادري ان اموووري حلوة مع البنت لكن فيني نسبة من جينات الحمار تطلع احيان > مرتفع ضغطي من نفسي
الله يبارك في الجميع

انت ارتحت لها وهي ارتاحت لك اعقلها وتوكل على الله
والله يوفقكم ويهنيكم

اي والله اما الارتياح لاتسألي عنه, جدا مرتاح
وهي بعد
الله يوفقك ويهنيك انتي بعد
تحية طيبة

الله يهديك بس شلون لعنت خامسك ونفس الوقت انت مش متأكد اذا هي حلوه انت
جاي عشان الشكل بس!!! طيب هي ذوق واخلاق زي ماتقول ومحترمه اقولك لاتقعد تضايق البنت اذا ماتبيها
قول من الحين لها وانت ايش يعني مهند على غفله الله مايعيب الرجال الا جيبه
الجمال للحرمه مش لرجال فكر زين وخل عنك تأثير الفنانات الله يهديك بس

على أي اساس حكمت أنك وسيم جدا ؟!

خل عنك السطحية أخوي.. و أظفر بذات الدين تربت يداك.

أهم شئ الدين و الخلق و بالنسبة الى الجمال اذا كان مقبول و ترتاح له.. فأستخر و توكل على الله.

و على فكرة المرأة الفائقة الجمال في الغالب تكون متكبره نوعا ما.. فأحذر من هذا الشئ.

أسأل الله أن يوفقك و يرزقك زوجة صالحة تكون قرة عين لك.

والله ياخي مدري وش اقولك, لكن ثق بي, الحمدلله ربي منعم علي بحسن الخلقة
ايوة هذي المشكلة, البنت الحلوة مرة تتكبر وتتشرط اكثر,
ياليل يعني مافيه بنت حلوة واخلاق؟
ماتصدقون انا مرة من خلال السؤال مدحوا لي بنت يقولون جمال فاره, يصقع صقع
والاخلاق والركادة , وفوق ذلك ملتزمة وراعية قيام ليل
لكن جاءك على هذا عيب يمشي طبلونه
مريضة بالقلب :-(

سبحان ربي