السلام عليكم كيف الحال

بدش بالموضوع على طول
انا متزوجه من 7 شهور
وحطيت كم موضوع قبل انه ريلي مايقرب صوبي الا نادر جدا
كلمته كم مره وحاولت اتقرب منه وشكيت انه فيه عين سحر او ضعف

بس نفى كل هذه الامور وقالي بقولج عقب وبين انه العيب ليس مني وانا بالعكس ماعلي قصور من كل النواحي
بالاضافه الى اني الحمدلله اقوم بكل واجباتي من طبخ وغسيل وامور البيت واتعدل له واعامله بلطف وصابره على هجرانه
هو يعاملني معامله طيبه واحسه يحبني من تصرفاته بس كأنه شي يمسكه ومايخليه يجامعني
لمحت له كثير عن رغبتي بالانجاب وكنت اصيح وكان يتأثر ويقول ان شاء الله خير


بعد الصبر والمعاناه
عرفت السبب
وليتني عرفت قبل الزواج .. قلبي تقطع و دموعي جفت من الصدمه الكبرى

ريلي بعد ضغط شديد صارحني انه كان يحب وحده
واهله رفضوها
وهو لا زال قلبه متعلق فيها وعلى امل انه ياخذها

فقال لي هذا السبب انه مايقدر يقرب مني بسبب القهر والضيق
علما انه مايكرهني بالعكس قال لي اعزج و اودج وانتي الاساس والاولى ومكانج عالعين والراس
بس ناوي اذا الامور تيسرت ياخذ الثانيه اللي هي حبيبة قلبه حسبي الله ونعم الوكيل
وقال اذا اخذتها الامور بتتعدل ونفسيته بتصير احسن
وهي ماراح تسكن معاي
وماراح يقصر معاي ابد اللي لها بيكون لي بعد

هو حبها بشده قبل لايحبني بس اهله رفضوا رغم اصراره بس اهله وقفوا ضده وقلبو الدنيا عليه
ودورو له وحده ثانيه لتكون الضحيه وللاسف صرت هي انا


انا مظلومه
حرمني كل هذه الايام لانه مقهور على اللي يحبها
طول هالايام يدعي ربه انها تكون من نصيبه واهله يوافقون
وانا الغبيه اللي عشت دور الضحيه والحمدلله مو ناقصتي جمال ولا اخلاق ودين والف واحد تمناني

لما ريلي فاتحني بالموضوع فتحت معاه موضوع الطلاق
وتم يحن ويحاول اني اغير رايي
وقال مستحيل اطلقج هالشي مايرضيني
وتم ساعات يراضيني ويوعدني انه بيعوضني ايام الحرمان ومايريد يطلقني


بس حسيت شي في داخلي انكسر

ساعدوني شو اسوي ..
انا مطلقه من قبل كنت مالجه و تطلقت ،، عقب تزوجت زوجي
ما اتخيل اكون مطلقه مرتين
اريد اعيش حياة طبيعيه مع زوجي واحمل ويكون عندي اطفال

اخاف اذا تطلقت اندم واحس بالوحده مثل ماحسيت بطلاقي الاول
واخاف اتم على ذمته اتعب نفسيا وانقهر و قلبه يميل للي يحبها اكثر

حسبي الله ونعم الوكيل
لاحول ولا قوة الا بالله



تم تعديل العنوان ليتناسب مع مضمون الموضوع