السلام عليكم ورحمة الله وبركاته ..

أشتقتُ كثيراً لكم ..
عدت ولكني لم أعد كما كنت!

كنت أظن أني لاينقصني في الحياة إلا الأمومة وأني بمجرد حصولي عليها سأملك الكون برمّته وقد حصلت عليها يارفاقي
بعد علاج سنوات وتجارب أنابيب فاشلة وألم وأمل وكميات لاتوصف من الإبر والمنشطات والوهن والشهور التي تعادل سنوات من عمري .. أصبحت أمّ .. وأنجبت توأم ❤❤
هم السلوى لقلبي في هذه الحياة لا بل هم الحياة كلها



ولكني حتى الآن لم أفرح بهما جلّ الفرح فمنذ ولادتهم حتى هذه اللحظة لم أذق طعم الراحة والإطمئنان ..
وصلت حياتي مع زوجي لمراحل لم أتخيل حتى أني قد أصل لها .. يبحث عن أي سبب يستفزني فيه حتى بدأت أشك أنه فعلاً يستمتع بذلك وأنه لايحب أطفاله !!
ولدتهم ولادة مبكرة قليلاً ثم جلست شهر و20 يوم عند أهلي ثم رجعت للمنزل ومن هنا فتحت فوّهة الجحيم في وجهي !!
أنجبتهم بعد حرمان مرير لا أطيق فراقهم ولو لثواني ولا أتحمل مجرد فكرة وضعهم عند العاملة وخروجي عنهم ولا أتقبل أن ينامون في غرفة بعيدة عني بل أحيان أفزّ من نومي خشية أن يكون أحدهم مكتوم أو بردان أو أو أو .. قطعت علاقتي في العالم بأسره بما فيها زوارات أهلي الإسبوعية نادراً أحضرها لأنه يشق علي الخروج بهم
حتى والدي "من يذكر ردودي القديمة يعلم مستوى العلاقه الخاص جداً بيني وبينه " أصبحت أزوره مره في الشهر ويسلم عليً بزعل و برود حتى أنه يسلم علي بدون ما ينظر في وجهي "وأنا أعلم ان هذه الحركة علامة على شدة الزعل والعتب عند أبوي" وهو أحد الأسباب اللي دمرت نفسيتي ولكن فعلاً صعب جداً خروجي من المنزل
عدا أني حتى الآن ( عليميه ) و أواجه صعوبه في رعايتهم أحياناً إذا صاحوا مع بعض وغلبت في تسكيتهم أجلس أبكي معهم الأمر أصعب بكثير مما تخيلته
قضيت عشريناتي كلها هدوء ونظام مرتب بالملّي وتفاصيل يومياتي أقرب للمثالية وهذه كانت غلطتي لأنه الآن وبعد هالسنوات مو قادر يتقبل الحياة الجديدة
أما أنا أشعر أني في دوّامه في ظل وجود زوج أناني وطفولي وهمه رغباته فقط طول الوقت معصب ويتذمر ويسبني إني فاشلة وما أعرف أوازن الأمور وكأن محد جاب عيال غيري وإني مهمله و و وأصبح يخرج طول اليوم بالساعات ما أشوفه إلا وقت النوم ويتعمد مايخبرني أين يذهب ! حاولت أرتب وأبحث عن حلول ماقدرت يستهلكون طاقتي كلها مايجي اخر اليوم إلا أنا منهاره حتى شعري طلع فيه شيب ماعرفت أهتم فيهم ولّا أرضيه



جلست معه جلسات ود وتكلمت معه قلت ارحمني لاتحملني فوق طاقتي احتاج مجرد وقت
عصب وثار يبيني عادي اتركهم مع الخدامة وارجعله زي ماكنت يبي حياتنا بتفاصيلها زي ماكانت هذيك السنين يبي دلال اللي ماعندها في الدنيا إلا هو اللي طول الوقت رايقة وتضحك وتكشخ وتتقهوى وتهتم فيه وتداوم وبس
مو مهم مشاعرها كيف كانت ومو مهم مشاعرها الآن كيف صارت المهم إني كنت في خدمته فقط !!
ياناس ما أصدق حتى انه مافرح فيهم جداً !! فرحته وحبه لهم عادي وبسيط حتى أنه لا يكاد يُذكر


تأججت المشكلة لما صدمني دخل علي حاجز تذاكر لمصر يبينا نسافر اسبوع ! ثرت وانهرت قلت ياخي كن رجل مسؤول أطفالك توينز جبتهم بعد ماطلعت روحي تبي اتركهم واحذفهم عشان اسافر رومنسية اصلاً كيف بننبسط
عصصصب وانا عصبت وجلس يهدد ويتوعد وانا حلفت اني ماروح مكان لين يكبرون شوي ونقدر ناخذهم بعده تسلط علي كل يومين مشكلة كل يومين لين صارت مشكلة تافهه وتصعدت لمواصيل أستحي أكتبها ورحت بيت أهلي زعلانه وجلست شهر وطلعت ريحتنا عند اهله واهلي وكل الناس .. طبعاً جاء بعد شهر يصالحني بإسلوب وصخ جمّع اخواني كلهم وأنا موجودة وجلس يشتكي وقال كل السوالف اللي قد صارت في الدنيا حتى شغلات انا أصلاً نسيتها لها سنوات
ومابقى شي ماحطه فيني ووصلنا لحل وسط ورجعت على مضض .. نتصالح يومين بس وباقي الشهر متزاعلين على أمور تافهه طول الوقت يضغطني ويستفزني ويدقني في الكلام صرت اطنشه مابي المشاكل واصلاً مشغولة ماعندي وقت أتهاوش معه وبصراحه انا صوتي ماعمره ارتفع على صوته بس طلعت من طوري صرت اصرخ احياناً في وجهه .. مرات اذا هاوشني وطلع اجلس أبكي وتجيني شغالتي تضمني وتهديني !! أقوله شي يوجع ان العاملة تحس فيني وترحمني أكثر منك ! ..


ماسبق نبذة فقط عن الوضع والتفاصيل أعظم من ذلك بكثير ..

قبل أيام كانت القشة التي قصمت ظهر البعير .. جلس بهدوء يتقهوى بعدين قال ترى بتقطعين إجازتك وبتداومين مع بداية الفصل الثاني !!!!
" للمعلومية أنا ماخذه إجازه هالسنه كامله "
قلت نعععم قال ايه نعم بتقطعينها وبتداومين هذا الحل الوحيد معك لازم تصحين الصباح وتلبسين وتداومين وتقابلين الناس ويصير عندك اهتمامات كثيره وتطلعين من هالحالة اللي دخّلتي نفسك فيها وترجعين نفس نظامك قبل وبخصوص الأطفال انا اتفقت مع أمي انهم كل صبح ينزلون عندها مع العاملة ويصعدون الظهر اذا رجعتي !!!!!
ما أدري كيف بصعوبة قدرت أكتم غيضي وأتكلم بأدب قلت مو حلوه في حقي تقرر وتنفذ وتروح لأمك وتتفق وأنا آخر من يعلم والمسؤولية أكبر من مستويات إدراكك لأنك اصلا ماتدري وش يصير طول اليوم ومستحيييل اطلع عنهم وهم في هالعمر وهالضعف .. وكالعادة طال النقاش وتعالت الأصوات والآن مانكلم بعض أبدا وما أدري وش أسوي معه في هالموضوع وكيف أقنعه ؟





كنت دائماً صبورة أما الآن أنا أنهار فعلياً .. كنت قوية جداً ولا أخشى إلّا الله أما الآن صرت أخشى عليهم من كل شيء من نفسي ومن الحياة ومن والدهم و و و
كنت دائماً ثابتة حتى في أصعب الظروف ولو اهتزت الأرض من تحتي أما الآن فالأرض ثابتة وهو ثابت والعالم ثابت والهزّه في داخلي فقط
أنا فقط
كنت قبل أربعة أشهر في عمر 31 أما الآن فأنا في الـ50 حقاً ..

__________________
﴿رَبِّ إِنِّي لِمَا أَنْزَلْتَ إِلَيَّ مِنْ خَيْرٍ فَقِيرٌ﴾

‏هُنا دلال ، حيثُ نجد وحيثُ الشمال

شعوره عادي وطبيعي .. مو كل الرجال او النساء يحبون الاطفال بسن معين .. ممكن يفرح فيهم بعدين

ثانيا كم عمرهم وكم عمرك وكم لك جالسه في البيت واكيد جلستي قبل تجيبينهم لين حصل الحمل

__________________
أعلل النفس بالآمال ارقبها .. ما أضيق العيش لولا فسحة الأمل

تدرين ودي اسجل مقطع صوتي واتكلم واتكلم واتكلم من كل قلبي 😂
عارفة ليه ؟ لان اللي مريتي بالضببببط انا مريت فيه 👌🏻

عارفة ايش الحل ؟ الحل ببساطة انك تتنفسييييييين شوي بعيد عن المسؤوليات ..
طيعي شوري وقدمي ع خدامه تكون كبيرة بالعمر وثقة للاطفال + جيبي كاميرا مراقبه وثبتيها ع الجدار وخلي الخدامه تشوفها بعد 👌🏻
وانتي تراقبين عيالك بالكاميرا اون لاين بجوالك تشوفين كل شيء بوضووووح تام وتقدرين حتى تتكلمين معاهم وتعطين الخدامة اقتراحات وتنبيهات 😂👌🏻

عارفة انهم جوا بعد تعب وعارفة انك ماتصبرين عنهم لكن هذي الحياة وصدقيني بتخفين كثيررر بعد ما تنفصلين شووي عنهم .

انتي عاقلة وحكيمة واتذكر كلامك بالمنتدى ونصائحك تبين رجاحة عقلك فماله داعي اني انا انصحك وانتي الخبيرة عن حق الوالد وحق الزوج ، خلك وسط وامسكي العصا من النص وعطي كل ذي حق حقه .

- بعد الاربع اشهر تروح متلازمة موت الرضّع ، فما فيه شيء تخافين منه ان شاءالله لو ناموا بعيد عنك !
- والبطانية اشتري من نكست او من ماماز اند باباز اكياس نوم تكون مررررة متييييينة وتدفيهم ومستحيل ينخنقون منها .

تدرين عاد اعرف واحدة تحمل وتنجب ويموتون بعد الولادة كم مرة .. وانجبت بننت وحدة بعد سنيييييين
وتخاف عليها من نسمة الهواء ، لمن تدرين وش سوت ؟
جابت خدامة متدربة وكاميرا .. والبنت ماااتطلع من غرفتها ابد خصوصا بالبرد تخليها هي والخدامة اما الام تروح دوامها وتروح زياراتها وهي مرتااحة وتراقب بنتها بالجوال
لحد ماكبرت البنت وقوت مناعتها وصارت تستمع بالزيارات 👌🏻


حاجة ثانية جت ببالي ، قد يكون اكتئاب نفاس اللي معاك واستمر ، لان احيانا يجي الاكتئاب على شكل قلق وخوف .

اما بخصوص زوجك من رأيي عالجي السبب وليس ردة الفعل .. ولو عالجتي السبب بيرجع زي ماكان واحسن ان شاءالله ..

طيعي شوري وتوكلي على الله واستودعي اطفالكل يوم وحافظي على الورد اليومي ،
وروحي للمشغل قصي وتعدلي وسوي مساج ودلعي عمرك .. وقوليله يحجز بالويك اند باوتيل راقي بس انتي وهو .. جددوا حياتكم وروقوا واستمتعوا ومنها تكونين قريبة من عيالك بنفس المدينة لو صار شيء لا سمح الله واكيد مارح يصير شيء ..

العيال اضافة حلوة وجميلة بحياتك لكن لا تكونين عايشة لهم هذا موت بطيء .. مارسي حياتك واستمتعي بامومتك واستمتعي مع زوجك واستمتعي مع طالباتك واستمتعي ببرك بوالديك ❤

تمنياتي لك بحياة سعيدة واطفال سعداء بارين يارب

__________________
سبحان الله وبحمده ، سبحان الله العظيم

هلا غاده
مايحتاج تسجلين مقطع صوتي ردك لامس قلبي وحسيته طالع من قلبك
خدامتي زينه مره وكاميرات عندي مركبتهم نص حملي قبل أجيب شغاله حتى

والمشغل أبشرك يجوني البيت خدمات المساج بيوتي والهوم بيوتي ماتقصر
يعني مافيه أمل أطلع من البيت

إكتئاب النفاس ما اعتقد لأني الحمدلله مافيني اكتئاب ولا كرهته ولا كرهت أحد
بس كل مافي الأمر إن فيه فرق بين الشي السهل ياغاده والشي الصعب
بين اللي يجيك عادي واللي تتعبين وتخسرين كثير لين يجيك
أما وسواس الخوف صراحة يمكنه فعلا فيني
أقولك شي بس لا تنصدمين ! أحيان إذا واحد منهم طوّل في النومه أجيه أصحيه اخاف صار فيه شي بعدين اندم اني خربت عليه
وأحيان وهم نايمين اقرب واجد بشوف يتنفسون ويتحركون 😭


أنا مستمتعه فيهم وبوجودهم بس أحتاج وقت عشان أرتب وضعي شوي
اللحين مشكلتي مع الدوام لو عاندت ومارجعت ادري باسه قوي ولانيب خالصه
لكن فعلا خطأ عظيم اني اداوم الآن حتى الطالبات مالهم ذنب اجيهم وانا بهالحالة

__________________
﴿رَبِّ إِنِّي لِمَا أَنْزَلْتَ إِلَيَّ مِنْ خَيْرٍ فَقِيرٌ﴾

‏هُنا دلال ، حيثُ نجد وحيثُ الشمال

ياعمررري الف مبروووك
والله يخليهم لكم ويبرون فيكم
بس حركاتك نفس حركاتي اشوف يتنفس و لا اتفزفز من نومي اشوفهم 😂
معليش المسؤوليه و فطره من ربي
والحرص الزائد كله عادي على قولة امي و اخواتي لانهم الاول
لاتهملينهم بس بعد مو تحبسين نفسك
انا زوجي تغير بعد بعده
وابتعد عني وصار كان فيه كهرباء مني استغربت جدا وكان يستفزني وانا صح واحد لكن ربي يصلحه بكااااي مررره يبي بس اشيله الله يحفظه ويصلحه
بس اشوف بردودك عليه شوي قاسيه
ترا كل الرجال باول طفل يغارون ومايعجبه التغير خاصه انك كنتي معطيته اهتمام زايد هو فقده ويخاول يسترجعه
طمنيه بس طمنيه انك تحتاجين وقت عشان تعرفين لهم
مو تقولين انت ماتدري وانت وانت
انا عشت نفس الكلام لدرجه كان يقول لي وانا تعبانه لانوم ولا راحه انتي اللي بغيتي هالشي <يقصد الطفل بهالوقت
وكنت اقول بنفسي بكره يكبر ونشوف من يبي مين
وفعلا ماصار عمره 5شهور ويتفاعل معه تغيررر زوجي معه ومعي الحمدلله
وتعلق فيه على استحيا
انتي لاتكرهينه فيهم باهتمامك فيهم واهماله سددي وقاربي
انتبهي ابوك مايصير تزعلينه خذي خدامتك وعيالك وزوريهم وش بيصير يعني !
خوفك مبالغ فيه .. ربي اذا كاتب شي بيصير لو انه بين يديك
فتوكلي على الله واستودعيهم اياه وعيشي وعيشيهم خلي ابوك يفرح فيهم صوريهم معهم خلي زوجك يحس انهم عياله مو ضره
انتي انتي تذكري ان لنفسك حق
ابوك اوصليه وفرحيه بعيالك ليه موزيتهم ..
ربي يفرحك فيهم ويصلح مابينكم

__________________
..
‏اللهم يا ولي نعمتي وياملاذ كربتي إكفني ماأهمني ومالم يهمني،واجعل كل ما أخاف وأحذر برد وسلاما كما جعلت النار برد وسلاما على سيدنا إبراهيم .. تولني في من توليت وبارك لي في ما اعطيت وقني شر ما قضيت انك تقضي ولا يقضى عليك..

__________________
اللهم اني استودعك اولادي وبناتي دينهم وآمانتهم اللهم جنبهم الخمر والمسكرات والمخدرات والزنا واللواط والفتن ماظهر منها وما بطن يامن لاتضيع ودائعه

الف مبروك التوام
يتربوا بعزك و بعز ابوهم
كم اعمارهم الان

عمرهم أربعة أشهر
وعمري 31

أنا معلمة طول عمري أداوم ماجلست الا بعد الحمل





الله يبارك في عمرك
ويجزاك خير

عمرهم أربع شهور

__________________
﴿رَبِّ إِنِّي لِمَا أَنْزَلْتَ إِلَيَّ مِنْ خَيْرٍ فَقِيرٌ﴾

‏هُنا دلال ، حيثُ نجد وحيثُ الشمال

مريت باللي مريتي فيه مع اني ما تاخرت بالحمل
وندمانه جدا
واقول لك من تجربة
لا تنعزلين عن العالم بسبب اطفالك
شيء غير طيب اطلاقا لصحتك النفسية
لا تتركينهم عند العاملة
لكن وازني و ركزي مع اللي جالس معك وعطيه اهتمامك و انتباهك
لانه يبان اذا تفكيرك و كيانك كله مع الطفل و هذا شيء منرفز للي جالس معك 😊
اجعلي اطفالك مصدر متعة و سعادة مو مصدر هم و حزن
الاب مايحب اطفاله غالبا الا اذا كبروا و قاموا يتفاعلون معه
انا جربت اللي جربتيه والوم نفسي جدا على تلك الايام والله
فتداركي نفسك وخذي الموضوع بسلاسة و حصنيهم الفجر و المغرب و توكلي على الله

حيا الله دلال كنت افكر فيك واقول وين الغيبة طولت بس الحمدلله جيتي بأحلى بشارة مبارك ياقلبي الله يحفظهم ويخليهم لك يارب ..
شوفي ياقلبي بكلمك بصراحة وانا عشت وضعك انجبت توأم وماكانو لوحدهم كان فيه أطفال قبلهم ولا كان فيه شغالة متخيلة الوضع بس أبدا أبدا ماسويت زيك أنت مباااالغة جدا وواضح اللي مطير زوجك افتقاده الشديد لك والاوضح انك اهملت نفسك بشدة .. اهم نقطة انك تعترفي إنك غلطانة من خلال سردك للموضوع حاطة الخطأ بالكامل عليه لازم تجلسي بينك وبين نفسك وتعترفي إنك أخطأت حتى تصححي من وضعك والحمدلله مادام عدو الاربعة الأشهر فهذا سن تبدأي تريحي شوية فيه يبدا وضع الاطفال يستقر نوعا ما وبصراحة زعلني جدا انك صعدت الموضوع ووصل لأهلك والكل عرف بمشاكلكم هذي الأمور لما تكبر تسوي شرخ في حياتك فانتبهي أنا ماأقول زوجك مو غلطان لا طبعا غلطان جدا بس واضح انه تفكيره مشوش ولا تعود على مسؤولية أطفال رغم انه هذا مايعذره بس أتمنى إنك تمسكي العصا من النص وتبدأي توفقي بين زوجك وأطفالك .

__________________
اللهم إن أبي نزل بك وأنت خير منزول اللهم أكرم نزله ووسع مدخله وارفع درجته وجازه بالحسنات إحسانا وبالسيئات عفوا وغفرانا .. آمين