السلام عليكم يااعضاء هاذا المنتدى العظيم
متزوج من سنه وشهرين .. خلال تلك الفتره كان هناك الخلافات ولكن ولله الحمد قدرنا نتغلب عليها وترجع المياه الى مجاريها .. كانت زوجتي موظفه وخلال هالفتره كانت شخصيتها جدا مختلفه ومع تعب الدوام الخاص وبعد المسافه اضطرت الى ان تستقيل بناء على رغبتها .. اتفقنا ان تركز بدراستها وتنهي دراستها الجامعيه بااسرع وقت ممكن .. حاولت ان اجد لها وظيفه بمكان عملي لكن شرط اللغه كان شبهه عائق لنا .. سافرنا خلال هالسنه اربع مرات لوجهات مختلفه ومخصص لها مصروف شهري 1000 من غير النثريات من وقت الى اخر .. طبعا مقاضي البيت والخ جميعها متوفره شهريا .. نسكن في مجمع سكني يبعد عن جده 100 كيلو .. المجمع ممتاز وجميل ومتوفر فيه جميع المتطلبات من نوادي الى حفلات ونشاطات مختلفه .. وضعنا الاسبوعي اداوم من 8-5 بينها ساعه راحه من 12-1 ارجع فيها للبيت ايام اجد فيها غداء وايام لا .. بعد مارجعنا من السفره الاخيره حملت ولها الان شهر ونص تقريبا .. في اجازه الربيع ونحن نازلين ع جده لقضاء هديه لها عشان تقدمها الى صديقتها التى تسكن بمجمع سكني يبعد عني 60 كيلو من مكان سكننا .. طلبت مني ان نحضر اخوانها الصغار بحكم اجازه الربيع وتريدهم ان يناموا عندها لي ايام محدوده .. واقفت واصبحت تلك الايام مايقارب الاسبوع .. مااخفيكم كميه تعب وازعاج الاطفال في البيت ورغم هاذا كنت مقدر عشانها لااجل عين تكرم مدينه .. في الاجازه الاسبوعيه التى تسبق اجازه الربيع عزمت بنات خالها ليوم الخميس وقتها كنت بجده ويوم الجمعه اخبرتني باللحظه الاخيره ان صديقتها جايين الى البيت اضطريت ان ابيت في جده في بيت اهلي .. رغم اني كنت مخطط وحاجز بمطعم 7 نجوم بفندق بجده كامفاجاه لها لكن بحكم الزياره المفاجاه تغيرت الخطه بنا على طلبها .. نسيت يوم الاربعاء كان يوم ميلادها احضرت لها كيكه مع كتابت بعض العبارات الرومنسيه عليها فرحت بها واتصورنا والحمدالله كان كل شي ع مايرام .. يوم الاحد اخبرتني باانها تريدني ان اوصلها الى بيت صديقتها على يوم الاربعاء وزي ماقلت لكم اننا كنا جالسين بالمطعم نحتفل بيوم ميلادها .. وكان ذالك بعد دوامي مباشره .. رجعنا الى البيت تقريبا الساعه 8 وانا كنت في قمه تعبي وراسي مصدع اعتذرت لها وقلت لها اجلي الزياره الى وقت اخر .. زعلت ولا حظت على وجهها كميه التضجر .. تعاملت معها بكل هدؤ في تلك اللحظه وجدت زبديه كبيره مرميه في كيس الزباله وانتم بكرامه .. سالتها ليه رمتيها ماينبغي نرمي كل شي متسخ ولا نغسله ونستفيد منها .. ردت على هاذا بفلوسي ارميه .. انا هنا تغيرت ملامح وجهي وعطيتها نظره وقلت لها عيب انتى ماانتي صغيره وايش بفلوسي ومافلوسي .. ردت انا هنا منكده ووعدت الناس .. طلعت الى غرفه النوم ونمت .. من هاذا اليوم وهي تنام مع اخواتها بالغرفه الثانيه .. اروح للدوام وهم توهم بينامون ارجع هم توهم صاحيين استمرينا ع هاذا المنوال اكثر من اسبوع .. اكلمها ليه ماتنامي وترتبي يومك تقولي اجازه كيف انام .. بالعربي يومي غير ويومهم غير عنى .. يوم من الايام وانا داخل للصاله لقيت الاب توب الخاص فيني مرمي على الارض وفيه عصير بلوحه المفاتيح اخذته معايا الى غرفه النوم نظفته واشتغلت عليه شوي ونمت .. جاتني زوجتي وقالت ابغى الاب توب رفضت بحكم ان كان عندها لاب توب وضيعت الشاحن .. للاسف الاحظ فيها عدم الاهتمام بالاشياء .. طبعا يوم رفضت ان اعطيها جهازي انهلت على برسايل الواتس اب .. منها انت اناني والله لايحوجني لك .. قريت الرسائل وتجاهلت اللي تقوله واكتفيت بشكرا جزيلا .. نمت ودق المنبه لكنني لم اسمعه .. راحت على نومه صحيت متاخر بحدود ثلث ساعه عند دوامي بالصدفه وانا اشيك ع رسائل الواتتس اب وجدت ان اخر ظهور لها كان قبل دوامي بربع ساعه اتجهت الى الغرفه الثانيه وكلمتها ليه ماصحتيني ي بنت الناس ردت صحيي نفسسك .. وتجاهلت كلامي وغطت نفسها بالفراش .. دقيت طرف المرتبه برجولي لي لفت نظرها عشان ترجع تتكلم معايا .. بدات بالصراخ انا حامل كيف تصحيني كذا وكيف تتكلم معايا كذا قلت لها هاذا تقصير واهمال ومديري مرسل ايميل بخصوص تاخيري عن الدوام وقرب موعد التقييم السنوي .. ارسلت رسايل كثيره منها انا ماعاد استحمل وانا رايحه بيت اهلي .. انت تربيت ع العبوديه والمراه ماعليها الا الطاعه روح ي ولد الناس زي مادخلنا بالمعروف نخرج بالمعروف ممكن ربي يرزقني بواحد يعرف يعنى ايه المرأه .. تجاهلت الرسايل واستخدمت اسلوب التطنيش .. اقول السلام عليكم وادخل البيت واجلس طبيعي ووقت النوم انام لدوامي .. في نفس اليوم طلبت منى ان ادخل سايق عشان يوصلها الى بيت صديقتها 60 كيلو اللي بتزورها اول وبعدها بتذهب الى جده .. انا رفضت وقلت لا .. اصرت وقامت تصارخ وعصبت وطلعت من الباب سالتها وين قالت بروح للعياده جبتلي المرض .. لحقت بها ولكن يوم شافتني غيرت وجهتها ولم تدخل .. عرفت لاحقا انها ذهبت للعياده وجلست بااحدى مطاعم السكن مع الاطفال ورجعت للبيت ودخلت للغرفه وقفلت ع نفسها الباب وانهلت بالرسايل مره اخرى .. بنفس الطريقه والاسلوب تجاهلتها .. ذهبت الى دوامي ورجعت الا وهي مصره انها تذهب الى جده بالباص رفضت وقلت مافي خرجه وسالتها لماذا مقاطعتني ولاتنامي بالغرفه من اسبوع .. لم ترد واصرت انها تذهب كسرت الصحون وكل مايوجد بالصاله .. وبعدها خرجت من البيت وجلست تدور بالسكن مع الاطفال وانا ادور عليهم .. بعدها اتصلت عليها لمم ترد وبعدها اتصلت الى بنت خالتها كانت برفقتها وردت واخبرتني انهم بجده يمشون الاطفال بالملاهي ..انهيت المكالمه وطلبت مني عن طريق بنت خالتها باانني لا اخبر اخوانها عشان لايحرمون الاطفال منها .. سالتهم وين بعد الملاهي راييحين قالوا لبيت خالها وجلست عندهم مايقارب 3 ايام طلبت منى ان اوصل ادويتها الخاصه بالحمل ولكن عن طريق بنت خالها وهي لاتكلمني ابدا من يوم ماخرجت من البيت حاولت اتواصل معها اكثر من مره ولكن من دون فايده رسلت ادويتها ومصروفها لها .. ولكن لايوجد بيننا اي اتصالات او رسايل البته .. ارجوا المساعده والمشوره في مشكلتي مع زوجتي الحامل !!



مستجدات بالرد 23
http://www.66n.com/forums/showpost.p...6&postcount=23

مستجدات بالرد 48
http://www.66n.com/forums/showpost.p...6&postcount=51

تحديث : عرفت منذ قليل .. بعد مااوصلت ادويه وفيتامينات لبيت خالها باانها ذهبت الى بيت اهلها

أمس شفت حلقه تكلم فيها أخصائي عن مشاكل الزوجين بداية حمل الزوجه وذكر انه استشاره واحد بطلاق زوجته بسبب فعايلها الي نرفزته قال انتظر حتى تدخل الشهر الخامس او تتوسط الشهر الخامس كما قال ابن تيميه انه تقريباً بعض النساء ينتهي الوحم عندها في هذا الشهر وكل مرأه تختلف عن الاخرى يقول انصل علي بعد شهور يشكرني اني ماحرضته ع زوجته زي بقية الي استشارهم من اهله واصدقائه......


شوف أخوي أنت حط أعصابك في مويه بارده وتحمل لا تسمع لكلام بعض الحريم الي تقول حملنا وماسوينا زيها ...

اكلمك عن نفسي حملت ثلاث مرات كان وحمي بسيط والله كنت انتقد النساء الي تبالغ في عصبيتها ونفورها من زوجها لدرجة إني اعرف وحده استأجرت فندق

والله حملي هذا ذقت فيه معنى الوحم الي كنت أنتقده كرهت غرفتي كرهت زوجي كرهت بيتي واولادي طفلي لما يقرب مني لاشعورياً أدفه بقوه ويطيح وأبكي من الي سويته ....

الحياه كئيبه سوداويه ابغى اشك فقط الهواء الخارجي بدون روائح أعصب بقوه لما أشم أي ريحه جننت اولادي وزوجي بس الحمدلله تفهم زوجي ع مضض انا في مكان وهو في مكان حتى الاكل ماأكل معاهم ....

اخرج بدون إذنه لجاراتي واترك أولادي ....

والله اضحك ع نفسي دحين وكأني كنت في حلم أرجوووووك أخوي لاتلومها جمعت أهلها لانها ماهي طايقاك ولا طايقه البيت بس ماهي قادره تقولك

لا تتصرف معاها تصرف قاسي...

اتركها تهدأ وتعامل معاها وكأنه مابينكم شي بعدها عنك بيريحكم الاتنين ....

فتره وتعدي بإذن الله وتجيب لك أحلى نونو تسبب بالجفاوه بين أمه وأبوه...😊

والله كلامك سليم .. الحمدالله قريت عن موضوع الحمل وبدايه الزواج كثير بمراجع كثيره عربيه وانجليزيه .. ردك عطاني دافع قووووي للصبر والتحمل ..

اما بخصوص الجفاوه اللي مسببها هالنونو .. سميته الولد الاقشرر

والله يجيب الواقب سليمه تحياتي ،،

عادي الحامل اسمع منها وقط بحر ،،خليها عند اهلها هالفتره وهي بتمل وترجع من نفسها اذا توازنت نفسيتها..بس انت اثقل شوي

شوووورك وهدايه الله

شكرا ع الدافع

مثل ما شفت من اخواتي الكبار انهم في البدايات كذا اول سنين الزواج تكون الهوشات كثيير وعلى اشياء تافها..
وعلى كلامهم انهم لما يتذكرون تلك الايام يقولو في انفسهم ( والله هبالة كيف كنت جاهلة وغبية) ..

بتعدي ان شاء الله الايام وتثقل الحرمة ماعليك.
=======

اذا حامل سلك لها.. لأنو الوحم احيانا يخلي الحرمة تكره زوجها او تصير عصبية..

اقولك سالفة قديمة جدا ايام كان فيه جهل كبيير بسوالف الوحم والحمل يقولي عنها ابوي انو احد اصدقائه بنته فجأة جت بيت اهلها وتطلب زوجها بالطلاق وهددت ابوها بان تحرق نفسها ان لم يطلقها وزوجها كان يحبها كثيير.. ورفض يطلقها . وهي قالت اخلعوني منه والزوج طلب مهرها الي دفعه ... والبنت قامت تكب على نفسها القاز عشان تبي تحرق نفسها تقول طلقوني والا احرق نفسي. .. وجلس ابو البنت يجمع بالفلوس الى ان دبر المبلغ وخلع بنته..

وبعد ما ولدت الحرمة طلع كل الي صار وحم وتبي ترجع... لكن بعد ايش بعد ما سببت جرح عميق لزوجها تحول الى كره لها.. وخلاص رفض يرجع لها..

=============

ان شاءالله ماتوصل الامور الى هاذا الحد .. الصبر ثم الصبر والله كريم

لاتنسووني من دعواتكم

الله يصبرك اخي انت امام نقطتين
انك في بداية الزواج و رح يصير شد و جدب حتى يسير المركب في توازن ، و زوجتك راح تتأقلم مع الوقت مع الزواج و انها مسؤولة عن زوج و بيت و ليس صحبات وووووو بغير وقت هي مسألة وقت و راح تحفظ طباعك
ثانيا : الشهور الاولى للوحم والله يا اخي انا مجربة خمس مرات ( ضيعت مرتين ) تتغير نفسيتي 170 درجة و اكره زوجي و اتحسس منه و أحب اعانده و ابكييييييييي لأتفه سبب و ببنتي ضليت وقت الرضاعة حساسة كتير ، الله لا يعيدها من ايام و الحمد لله
فرأي الشخصي زوجتك تتوحم 😊😊😊 و ممكن هي ما طايقة نفسها و مش فاهمة التقلبات الذي يحصل معها بما انه اول بيبي
خليها تهدى شوي ، لكن خبرها انها لازم تراعي نفسيتك و تعبك في العمل
الله يسهل عليكم

اليوم الصباح وصلتني رسالة من بنت خالها .. تعلمني عن زوجتي ونفسيتها مع الحمل .. وانها كاره نفسها واللي حولينها وتتنرفز على اتفه الامور وتفقد اعصابها بسرعه .. زياده على ذالك ماتأكل ماهي متقبله الاكل ابدا .. وانها اول ماتشم ريحه اكل ترجع عطول .. وكاره بيتها بشكل قوي ,,


عموما رسلت لها رسالة الصباح سألت عن حالها وكيف امورها واني مقدر وضعها وجهدها وان ربي يسهل امرها وتجيب النونو بكل خير ..

الله يعين احترت وش اسووي .. !!