هذي بعض النقاط والنصايح اللي اتذكرها للتعامل بين الزوجين .. .. واتمنى تفزعون معي باللي تتذكرونه او تحبون تبلغونه للطرفين او احدهما .. وخلونا واقعيين وجادين .. الدعوى نشر غسيل !!

انتي يا حرمة اللي فوق .. ما يمنع تساعدين رجالك في اختيار قمصان البيت اللي هو يلبسها .. او حتى تشرينها انتي له .. وتهتمين انت تتابعين نظافتها بعد .. مهوب تشتكين من وصاختها وتخلينها معلقه قدامه يلبسها كل مافصخ ثيابه !! .. واحرصي كذلك على تخصيص ملابس يلبسها هو للنوم حتى ما يضايقك بريحة النوم والعرق ...

اذا سويتي له عمل معين من ترتيب او طبخ مثلا ,, اكيد تبينه يمدحك ويمدح شغلك ,, تراه يشوف بس ما تعود يمدح (طبعهم كذا) .. ما يمنع لو تسألينه عن رأيه في هالشيء مثلا وتبينين له الجهد اللي سويتيه .. ولو قال لك " وش الله حادّك؟ " قولي " علشان هالعيون اسوي اي شيء" .. مهوب لازم يقول لك " تسلم لي عيونك " .. بس تخيليه قالها !!

اهتمي بشكل زوجك قبل يطلع من البيت .. تابعي نظافة ملابسه .. وريحتها .. وتابعي نظافة النعال او الكنادر اللي يلبسها ,, ولا يلبس شراب متشقق ,, ترى الناس تذم زوجة الرجل الوصخ ,, مثل ما تذم زوج المرأه المهمله !!

اسرار البيت .. والمشاكل او الخلافات البسيطه بين الزوجين .... احذروا كل الحذر من خروجها عند الناس ,, مهما كنتوا مختلفين او بينكم شيء ,, لابد من اللإبتسامه قدام الناس وكتم الزعل ,, والا صرتوا بلحالكم فترى عقدة المرأه في دغدغة رجلينها وعقدة الرجال في دغدغة باطه !! والله يحط حيلكم بينكم !!

عقاب المرأه .. فيه تسلسل تم توضيحه في القرآن والسنه ,, يازوج اتبع الترتيب في العقوبه ولا تاخذ الحل الثاني او الثالث قبل الأول ..

الصراحه مافيه مثلها ابد .. يعني لو فيه عيوب في احد الطرفين ,, فالمجامله والسكوت بتزيد المشكله وتزيد العيب ,, ولو الزوجه ما صارحت زوجها فمن بيقول له عن هالعيب ؟ ولو انت بعد ما علمتا مرتك باللي ماتحبه فيها ,, فمالك داعي ابد وانت تروح تسبها وتشرشحها عند الناس ... وتشتكي من اهمالها ومصالتها !!

السوالف اللي تدور بين الزوجين ,, خلوها اسرار بينكم ,, وماله داعي الواحد منكم يقعد عند ربعه ويغازل زوجته !! او انتي بعد تقعدين عند اهلك وتعطين السماعه لأخواتك حتى يسمعون الكلام الحلو اللي يقوله لك

يجب احترام افكار واهتمامات الطرف الآخر .. على الزوج انه يعطي زوجته فرصه ووقت كافي للتعبير عن اللي في خاطرها .. مهما طالت المده .. انتا نصفها الثاني ,, ولازم تحمل همومها وتتعرف على طريقة تفكيرها .. وتعدل الغلط فيه .

مع وجود الأطفال في البيت .. تنسى المرأه زوجها تماما ,, او هو على الأقل يحس بهالشيء ,, ترى الرجل يحب يكون الطفل المدلل لزوجته ,, تماما مثل ماالزوجه تحب دايما تكون في نظر زوجها طفله .... احرصي على عدم إهمال الزوج من اجل الأطفال ,,, ولا تحرمينه من شيء بسبب الأطفال ,, دبري عمرك..عاد !!!

قطعة ذهب .. تورته .. ورد
.. قزازة عطر (صغيرة 50 مل) ,,, او حتى لعبة تجيبها لزوجتك ,,,, تسوى الدنيا عندها !! مهوب لازم تكون غاليه حتى تنتظر مناسبه وتجيبها .. لأ .. القيمه الحقيقيه في كونها جت منك انت .. لا تتردد ابد .. ولو ما امداك تروح تشري لها ,, لفّ على اقرب بقاله عند البيت وانتا راجع من الدوام واشتر لها قطعة كاكاو بريالين. . (مهوب كل يوم طبعا) عشان لا تروح حلاوتها