السلام عليكم ياجماعة هذي اول مشاركة لي بالموقع واتمنى من كل من يقرأ ياخذ الموضوع بجدية ولا يقعد يطقطق لان الموضوع حساس جداً
انا شاب عمري 19 سنة تخرجت من السنة التحضيري بمعدل عالي والحمد لله خلال السنة التحضيرية كان فيه قروب للتقلرام لتبادل المنفعة سواء من اجوبة لاسئلة او مساعدات الخ..
انا بحكم اني احب اساعد الناس شرحت لاكثر من بنت وكنت اجواب بالقروب ويعلم الله كانت نيتي وقتها اني اشرح من باب المساعدة وبس .
المهم شرحت لاكثر من بنت لين جت ذيك البنت اللي سألت في القروب وساعدتها علا طول بالخاص وخلصنا ولا صار شي
بعدها ساعدتها مرة ثانية بمادة ثانية وطلعت ...
بعدها صرت اسولف معها برسمية اسألها من وين انتي وكذا والله العظيم ماكان لي نية اني احبها او شي من ذا القبيل لين جا نهاية الترم الاول وصارحتها بمشاعري اني احبها
طبعا ياجماعة جاني ذا الشي بدون سابق انذار تعلقت فيها بعدين استهديت قلت ياولد امسك نفسك لكن ماقدرت المهم وللمعلومية ترا فيه بنات كنت اشرح لهم بدون ماقول لهم شي بس سبحان الله مادري ليش مع هالبنت تعلقت ..
المهم صارحتها وبكت وبعد كم يوم جتني وصارحتني بمشاعرها وبدينا المشوار
طبعا ياجماعة وقتها كنت مقصر بصلواتي وبطاعتي لامي ولابوي والبنت ذي ماشاء الله عليها والله من يوم عرفتها صرت احافظ على صلاتي وابر بامي وابوي فضل الله ثم فضلها لان كانت تنصحني وهي ملتزمة ماشاء الله عليها تصلي قيام الليل دايم وتقعدني بعض الاحيان لصلاة الفجر الله يعطيها الف عافية
بعدين صارت مشاكل بيننا والحمد لله حلينها لين ماجت المصيبة العظمى لما امها درت
ايه ياجماعة امها درت وتحسب اني لعاب واطقطق عليها ومادري وش
ياجماعة البنت صار لها تقريبا اسبوع ماترسلي شي ابداً ولا ترد علي ولا شي انا ياجماعة يمين بالله احس مستقبلي ضاع حرفيا صار مالي نفس للدراسة ولا لاي شي يمين بالله كرهت حياتي خلاص وش اسوي بالله ساعدوني !!
البنت ماشاء الله دين واخلاق وحرام والله تروح علي
امها من النوع القديم واول مادرت عنا عصبت عليها وقالت لها لاعاد اشوفك تكلمينه ومادري وش المهم وهي كانت تكلمني وبعدها اتوقع امها عرفت واخذت الجوال وللحين مادري وش صاير فيها
تكفون ساعدوني كيف اصلح الموضوع ياجماعة تكفون💔

خير ان شاء الله تاخذ امك وتروح لعندهم بعد السؤال طبعا وتخطبها اذا كانت مناسبة لك

بالتوفيق

الله يعطيك العافية على الرد لكن عندي اشكاليتين:
1- انا توني عمري 19 سنة وماعندي فلوس ولا ريال حتى ابوي مايقدر يساعدني
2-امي امية وانا مادري وش بتكون ردة فعلها تتوقع اكلم اختي احسن؟

1. ممكن تطلب منهم خطوبة بس لين ما تجهز حالك او تضع البنت في الصورة وتقول لها انا لست جاهزا الان ان احببت انتضريني او تتزوجين لك الخيار وبهذا ينتهي الموضوع حتى تكون انت جاهز وحينها اذا كانت البنت لا تزال غير مخطوبة تقدم لها وهذا افضل بنظري.
2. الزواج لا عيب فيه تقدر تكلم امك بانك تحب هذه الفتاة وتريد خطبتها
3. اقطع كل وسائل التواصل مع البنت حاليا لانها اجنبيه عنك والكلام معها لغير الضرورة لا يجوز شرعا

اخ عبدالله تحية معطرة ...

لمست الخير في حديثك وبساطة طرحك. ما حدث لكم شيء بديهي نتيجة لتواصل بعضكم مع بعض ونتيجة للمجاملة المستمرة بينكم أخذ القلب يتعلق يوم بعد يوم.

أما عن وضعكم الحالي فقد تم اكتشاف الأمر من قبل والدتها وهذا دليل على خرق الفتاه التي تحبها واخذت بسرد الصفات الحسنة لها لقوانين أهلها. الوضوح والشفافية غاية في الأهمية وبسماح الفتاه لك بالتحدث معها دون علم أهلها دليل على عدم المصداقية والمراوغة لهم.

انت الان في مرحلة تعلق بهذه الفتاه.شعورك بالقلق على هذي الفتاه وحالها مع اهلها بعد اكتشاف الامر لا مبرر له وذلك ان والدتها لم تقم بهذا العلم إلا لحبها وخوفها على بنتها ولن تتعرض هذا الفتاه للأذى من قبل أمها إطلاقا. فإنشغالك بنفسك وبما انت فيه اولى من التفكير فيها.

لا تزال في مقتبل العمر وليس بمقدورك التقدم لخطبة الفتاه عاود التركيز في دراستك وشؤونك وتلافى مثل هذي الأحاديث والخدمات الغير مبررة مع الجنس الآخر حتى لا تقع بالحب أو شيء من المحظورات .

لك بعض النصائح حتى تسهل عليك عملية التخلص من هذا الحب العارض والذي اختفى فجأة بقرار من والدتها .

يظهر لي التعلق العاطفي من قبلك تجاه هذة الفتاه وهذا نتيجة لسيل المديح الذي ذكرته عن تلك الفتاه كل ما عليك هو حرق هذه الصورة الجميلة وستبدأ مشاعرك بضمور وذلك من خلال التفكير بواقعية وفي الامور السلبية للفتاه من خيانتها لثقة أهلها والاستمارار بارسال افكار سلبية عنها وترديدها بصوت مرتفع لضمان ترسيخ الفكرة والتي ستحول الي مشاعر في العقل الباطن*

عزيزي اضيفي المزيد من هذه الافكار السلبية عنها لحرق الصورة الغير واقعية وتوقف عن التفكير في اي موقف رومنسي حقيقي او تم بناءة في مخيلتك

وحيمنا يتم حرق هذة الصورة مع الوقت ستجد ان قلبك خالي من حب تلك الفتاه التي اختفت عنك بشكل مفاجئ.

كل التوفيق

المستشار Moh

الكلام سهل صدقوني ماراح تعرفون الشعور لين تمرون فيه😔

أخي الحبيب طرحك جميل جدًا وفيه تعقل ورزانة ، ومع ذلك لا مانع أن يخطبها إذا رأى أن الفتاة صادقة ، ولو أخطأ في الطريق ..
وإذا صدق مع الله ثم مع نفسه .. سييسر الله له أمر زواجه ..
لكن يعقد النية الصحيحة والأمور يفرجها الله ..

قال النبي صلى الله عليه وسلم : ( ثلاثة حق على الله عونهم )) وذكر منهم : (( الناكح يريد العفاف )) رواه الترمذي وحسنه الألباني .
حق تفضل وتكرم من الله لعباده ..
أخطب بعد التأكد جيدًا من الفتاة من سؤال ونحوه هن دينها وخلقها وجمالها وتعليمها وكل ما يعينك وخذ معاك من يحسن هذه الأمور ، والأمر كله لله ..
وفقك الله يا ولدي واحفظ بصرك وفرجك يحفظك ربك ..

__________________
محمد بن محمد الجيلاني
مهتم بالكتابة حول شؤون الأسرة

الاخ محمد شكرا على اطرائك سيدي. اتفق معاك تماما . اذا كان هنالك فرصة للارتباط فيبدوا ذلك الخيار الأمثل ولاكن ولصغر عمر الشابين فإن تقييم الصحيح للزواج الناجح وشريك الحياة لم يصل إلى حد النضوج من وجهت نظري.

كل التوفيق

عمرك عمر تعلق ولو حصل زواج الله أعلم أن السنة لن تكتمل حتى يحصل الطلاق

البنت متهورة وخائنة لأهلها
وأنت ارتكبت ذنب بتواصلك مع بنت الناس ولو كانت أختك مارضيت إنها تدخل بعلاقة من هذا النوع ولا تشرفت بزواجها بهذه الطريقة

ابعد نفسك عن هذا الطريق دامك تعرف إنك ماتقدر تتزوج
وادع ربك كثير بأنه يغفر لك ويبدلك بالزوجة اللي تعفك بالحلال وتصون نفسها عن الرجال

عندكم طريقة اقنع امها؟