وش رايكم باللي سويته هل هو معقول او تعديت حدودي دعوه للنقاش اخوتي
السلام عليكم ورحمة الله وبركاته
كيفكم ان شاء الله طيبين
بدخل في الموضوع
الموضوع عباره عن موقفين
الموقف الاول
كنا رايحين مع الاهل المول وكنت انا جالسه ع الكراسي اعطي بنتي حليبتها والاهل يتسوقوا ودخل المول شخص من شكله واضح عليه الالتزام
ودخلت وراه حرمه اللي هي زوجته
وماشاء الله ع البنت ملتزمه مره لدرجه انها لابسه القفازات والشراب عشان لايوضح اي شي من جسمها
البنت التفت تكلم زوجها ومدت يدها تأشر على مكان معين وبان جزء من الذراع والله انصدمت من تصرف زوجها صرخ عليها وخلاها بيزه ماتسوى وكل دقيقه بصوت عالي احمدي ربك اخذتك انا بصراحه عصبت كل اللي في المول تجمهروا حولهم عشان يشوفوا السالفه
انا ماقدرت وقمت وصرخت على الرجال تفاهموا في البيت مو هنا واذا انت كل شوي راح تمنها على زواجك بها فالافضل ترجعها بيت اهلها ولاتهينها كذا وقدام الناس ادري ان تصرفي خطأ بس ما قدرت اشوف المسكينه تنهان قدام العالم
الموقف الثاني
كنا نمشي انا واخت زوجي وكان فيه رجال مع عربه فيها طفله عمرها تقريبا 7 شهور الرجال مو منتبه لبنته وكان راس البنت وكتوفها طالعين لبرا من كثر ماترفع نفسها يعني لو ترفع نفسها مرتين تطيح البنت على راسها انا ما قدرت وقلت له لو سمحت واشرت بيدي على البنت ولاتكلمت
هذولا الموقفين تتوقعون اللي سويته صح ولا غلط؟
وانا متعوده كل شي يصير اقول بالتفصيل لزوجي بس اخاف يعصب علي اذا قلت له هالموقفين
وانتوا يارجال لو مثلا صدر هالموقف من زوجاتكم كيف راح يكون تصرفكم؟