السلام عليكم ورحمة الله وبركاته
اسعد الله اوقاتكم بكل خير
اول مره اشارك معاكم لكن دائما اتابعكم

انا دخلت هنا عشان افضفض واطرح موضوعي
اقسم بالله احسس ان نفسيتي تعبانه وماعندي احد اتكلم معه او اشاوره

لان الي كانت لي سند بعد الله وكنت افضفض لها واشاورها ..صديقتي الغاليه توفت الله يرحمها والى الان وانا تمر علي امور ومشاكل واحس بنفجر اني اكتمها في صدري ..الحمدلله على كل حال

مشكلتي يمكن عادية بس خلاص تعبت وانا صابره وقلت افضفض لكم لعلي بعد الله الاقي عوون ومساعدة

انا متزوجة لي خمس سنوات وعندي طفله والحمد لله الحياه ماشية مره فوق ومره تحت والحمدلله
مشكلتي الي تعبتني كثير زوجي وشخصيته وكبريائه الي حتى على نفسه
دايما نتزاعل كأي زوجين وانا الي اروح افتح معاه نقاش وحوار عشان مايطول الزعل وتطول المشكلة

هالمره صار بيننا خلاف وقلت في نفسي انا هالمره بسكت منه ماراح افتح اي حوار او نقاش بشوف كيف الوضع
وللاسف الشديد خذلني ولا هميته ولا كأني شي ف حياته
يتكلم معي برسمية و حدود وانا اقوم بواجباتي تجاهه
والان مر 17 يووم ولا يكلمني ولا شي وانا الله يعلم بحالي نفسيتي تعبانه غير تعب و ضغط الحمل الي انا فيه وغير كذا اهلي مو معي ف نفس المدينه
واحيان اجلس ابكي من القهر الي فيني لأنه بطبعي ما أحب احد حاقرني او عايشه مع شخص و مثل كذا
زوجي شخصيته شمالي ومن النادر والقليل انه يعتذر
طبعا حقه ف الفراش يأخذه وقت مايبي و يعطيني ظهره ويكمل نووووم

لا احد يقولي روحي كلميه وافتحي معه نقاش لاني لو ابغى كان من زمان سويت كذا

اعطوني حلول جزاكم الله خير

17 يوم ماتكلمون بعض كثير صراحة ، والأغرب ياخذ حقه الشرعي وباقي متزاعلين! طيب مهي فرصة عشان يهدى الوضع بينكم إستغليها ، تعلموا مهما وصل الخلاف بينكم مايوصل للقطاعة إذا أستمر حالكم كذا كيف بتعاملون بعض قدام عيالكم؟! .. ممكن تذكرين لنا مشاكلكم بالعادة عن أيش؟ وعن آخر مشكلة؟

__________________

وبدأت تحدي إنقاص الوزن الهدف إن شاء الله 55 كيلو

قسما بالله كانك تتكلمين علياا،،

خصوصا السنوات الاولى،،

انا الوضع يتعبني نفسيا واخر شي استسلم واحاوره وابكي

عليه،،لاني فقدت الامل يجيني هو يحاورني عودتو من البداية اخر شي باستسلم،،

لكن غالبا يكون الخطأ مني واقعد اكابر الشي لي يخليه ما يفتح معي حوار،،

هل يا اختي زوجك يتصرف معك كذا لانك اخطئتي بشي وتكابرين
او هو من اخطأ معك ويكابر?! اذا كان الاختيار الاول تنازلي يا اختي
وكلميه ولا باس تعتذرين منو حتى يرضا،،اما ان كنت مظلومة خلي
الامور زي ما هي مصيرو يرجع لك اما اذا ما استحملتي مثلي تكلمي
معه وابكي عشانك وعشان راحتك وخليها اخر مرة تطولون فيها الزعل
لما يصير مشكل بينكم لا قطعي الكلام تكلمي معه وتصرفي بطبيعيه
ولما تحسين به رايق ناقشيه الذي زعلك ولوميه هذا هو الحل برايي
وربنا يهديه ويسخره لك ،،،

وعلى فكرة انت زوجك يطلبك للفراش وياخذ حقه الفرق ان زوجي
يكابر وينسا المعاشرة لحد ما نتصالح!!

اختي قلوب حائره انا ببداية زواجي كنت كذا ..ازعل ومع نفسي وهو ولا كأنه صاير شي عايش حياته مبسووووط
وانتبهت لهذا النقطة وركزت عليها و بطلت زعل واذا صار شي اقوله ترى انت سويت كذا وكذا ..
لكن احس احيان اضغط ع نفسي و اقول ي بنت اصبري واحتسبي
لكن الى متى واحس بداخلي اني كرامتي خلاص ..متى هو يحس و ينتبه
وجربت كثير طرق ..في حال زعلنا
يعني اذا رجع من دوامه استقبله بكل حفاوه وتكريم
احيان اراسله ع الواتساب
احيان اجي اسسسولف معه ولا كأنه صار شي
..
لا ولما اجي اقوله ممكن شوي من وقتك عشان نتاقش ..يتكلم معي من طرف خشمه

والله المستعان

سبحان الله
كلن يشوف همه كبير
مشكلتك حلها بسييييط
ان صار زعل
سوي كانك ماتفهمين وتكلمي معاه
عادي عشان ماتعطيه وجه للاعتذار
وماتنجبرين للإعتذار
مع الايام بتتعودين
خلاص هذا طبعه الله يعينك
كل انسان وعنده عيوب

الاعتذار الفضي انسيه.. احنا كذا يالشماليين شنسوي
لاتبينين له انك زعلانه
اذا كملتي 20يوم
روحي له قولي اشبك ماتكلمني
ذابحه لك احد
مسويه جريمه
كل شي مهتمه فيه
حتى حقك تاخذه
ودني عند اهلي لان وجودي مثل عدمه هنا
واضح ان الخاطر طايب مني
واطلعي من عنده
وشوفي ردة فعله
اهم شي لاتعطينه فرصه يبرر

صادقه اختي كل انسان عنده عيوب ومو معنى هذا الواحد يغلط ومايصلح عيبه وغلطه
انا بصبر بس الى متى الصبر ..الى متى هذا الوضع


ولا ابغاه يبرر او يعتذر ..
ابغاه يرجع لطبيعته ..
ومدري اذا بيرضي يوديني عند اهلي ولا
لانه احيان يحب يذلني يحب يستفزني كثير

انا مااقصد انه يووديك
انا قلت لك سوي كذا
واطلعي من الغرفه
صدقيني راح يراجع نفسه
ويحط بباله انك ماعاد متحمله اسلوبه
ولما تقولي له
وتخرجي خليك زعلانه
ولاتقولين له ودني اهلي ثاني
كلمتك الاولى تكفي
اقلبي الطاوله عليه
وخليك على الصامت
وتجنبي اي تبرير له
سوال ورد
صدقيني جربي
هذى هو الاسلوب اللي ينفع معاه
راح يدور بباله انه زعل عليك 20يوم
انك انتي اللي معاك الحق لانك تحملتي
زعله 20يوم والزعل مايستاهل

اختي انا الان اسوي كذا ..ساكته ع الصامت او شي يبغاه اسويه
مثلا حطي الغداء ..سوي كذا ..اسوي وانا ساكته
يعني تخيلي لدرجة كان فيه رحلة استراحه مع اهله وماخبرني الا ف نفس الوقت يلا قومي تجهزي ..
بالله وش هذا الحياه ..الله يصبرني يارب

وانا اصلا طلعتي لاهلي بعد كم يوووم بشوف وش يقول

انا الان ماابغاك تسوين كذا
انتي مريحته على الاخر الان
طبقي اللي قلته لك