السلام عليكم ورحمة الله وبركاته ..
يسعد مساكم ي الغالين
أنا عضوة جديده تصفحت بأركان المنتدى وأعجبتني كثير زوايا ماشاءالله تبارك الرحمن سلمت أناملكم وبوركتم في اطروحاتكم.. خصوصاً قسم الإستشاره فكثير منّا بحاجتها ولا نعلم لمن نلجأ لقلة الخبره بمن حولنا او لصمت يقيدنا او خوف من المجهول !! لذا شكراً بحجم السماء

بعد التصفح والراحه الذاتيه قررت أن أطلق عنان أوراق دفتري القديم وإعادة صياغته هنا
أترك حروفي وماخطت به أناملي بين أعينكم وأترك أثرها في جنبات قلوبكم

سأترككم الآن إلى أن يكتب لنا لقاء آخر مع تمنياتي لكم بقضاء مساء جميل

ننتظر ما خطت اناملك اختي وعد
بالتوفيق يا رب

__________________
الحمد لله بلا سبب ولا طلب..
الحمد لله في حياتي وبعد مماتي..
الحمد لله دائمآ وأبدا..

شاكره لك ويسعدني تواجدك 🌷

ننتظر وعدك بما تخط يمينك يا وعد

مرحبا بك بالمنتدى

شاكره لك ويسعدني تواجدك 🌷

لا أعلم كيف ستقرأون ماسأكتب ولا أعلم ماذا أسمي ماسأكتبه هي بالنسبة لي مذكرات ، لكم حرية قرائتها كروايه او يوميات مجهوله كيف ماتحبون أقرؤها هي مجرد فضفضه قلبيه ،،

أترككم مع بداية صفحاتي

بياض موحش ، صوت مزعج، ألم فضيع ، مكان غريب !!
فتحت عيوني بصعوبه مصاحبة ألم في الرأس فضيع جداً ونور مزعج يعكس ع عيني أغلقتها وفتحتها ثانيه وهكذا إلى ان تعودت عيوني ع النور ،، حاولت ان افهم أين أنا وماهذا المكان الغريب !! صوت مزعج ومخيف حاولت أن ألتفت يمين او يسار لكن كان هناك ع رقبتي حاجه تمنعني من الإلتفات رفعت يدي بصعوبه لأتحسس ماهذا ووجدت ع يدي وصلات بها دم واُخرى مغذي << سيروم>> وهله وتدخل عليّ إمرأه غير عربيه برداء أبيض << ممرضه>> تمتمت بصعوبه ..
ليـ ش أنا هنـ ـا،،
ماردت ع سؤالي فقط تتفحصني وتتفحص الأجهزه ثم مسحت ع راسي وأبتسمت وتكلمت بلغه ماأفهم منها شي ..
خوف تملكني من المكان ومن الوضع اللي أنا فيه رجعت أسألها ثانيه موضحة أنزعاجي منها
وين أبـوـي نادي أمــي وينهم ابيهم << حاولت تهديني وتهدي حركتي لكن ماأستطاعت خرجت مسرعه وعادت مع ممرضه ثانيه ودكتور أمرهم بأن يعطوني مهدئ ونفذوا كلامه حاولت أبعدهم صارخت وبكيت ووسط الألم صرخت أناديهم وليش مايردون وينهم الدكتور حاول يسكتني : خلاص اهدي حالتك ماتستحمل كل هذا ،، كان يتكلم بس ماقدرت أفهم اللي يقوله بسبب تأثير المهدي اللي كنت أحاول أقاومه عشان أفهم لكن داهمني الظلام وأرتخى جسدي ..
وبعد كم ساعه مرت فتحت عيوني مره ثانيه لكن كانت أسهل من ذي قبل ، فتحتها ع رجل به وقار من ملامحه وحززن كبير في عيونه إنتبه لي وإبتسم : الحمدلله ع سلامتك ي الغاليه
بتعب :الله يسلمك ي عمي ، وين أبوي أمي وجدي وليش أنا هنا وش صاير لي وليش انت لوحدك هنا وينهم ؟!!
العم يحاول أن يتماسك ضغط ع يدي بحنان : قل لن يصيبنا الا ماكتب الله لنا .. وإن الله مع الصابرين .
حسيت بقبضه ع صدري قبضه قويه ناظرت في عيونه بعد ماصابني ثقل بلساني ماقدرت أنطق
ناظرت أبحث عن خبر يكذب إحساسي وينتشلني من الألم اللي سكن جسدي وخافقي لكن خانته عيونه وطاحت دمعته وقال : إن لله وإنا اليه راجعون ،،
فتحت عيوني ع وسعها : من ؟
غمض عيونه ألم ونطق بالفاجعه: كلهم الله يرحمهم ويغفر لهم
حسيت بالأختناق حاولت أتنفس لكن ماقدرت رفعت له يدي يساعدني خاف وخذني لحضنه وضمني : أذكري الله ي ابوك وترحمي عليهم وتذكري قول الرسول عليه الصلاة والسلام ( إنما الصبر عند الصدمة الأولى)
حاولت أصرخ أبكي لكن شي ما ضغط ع صدري أكثر وأكثر وأنكتمت أنفاسي وأرتخى جسدي وماشفت غير الظلام ..
وفي يوم آخر صحيت وحصلت عمي وزوجته موجودين ناظرتهم بألم ودمعة كافيه تعبر لهم عن إنكساري وضعفي وبحنان مسحها : الله يرحمهم ويغفر لهم مايجوز ع الميت الا الدعاء
أنا : كيف صار ؟
حادث وأنتم راجعين من العمره
بألم ودموع : كلهم ماعداي ليش طيب كان خذوني معهم
زوجة عمي : إستغفري ربك مايجوز هالكلام أهلك هذا يومهم وكلنا راحلين وهالدنيا فانيه عليك بالصبر والدعاء لهم
العم :الحمدلله ع كل حال والحمدلله اللي تلطف بحالتك وشافاك إنت هنا لك مايقارب شهرين ونص منهم من قال احتمال تدخلين في غيبوبه ومنهم من قال راح تصحين لكن فاقده نعمة البصر او الذاكرة لكن الحمدلله قوة رب العالمين فوق كل شي فوق الأطباء وخبرتهم
صدمه وأمتلت عيوني دموع : شهرين ونص يعني راح عزاهم وانا هنا
العم ضمني لصدره ثاني : لاحول ولاقوة الا بالله .. أبكي وانا عمك ابكي وطلعي كل اللي بخاطرك علا وعسى ترتاحين << ضميته اكثر وبكيت ع صدره حاولت افرغ كل الحزن اللي سكنّي لكن هيهات صار الدمع والألم رفقاء نبضي..
الفراق موجع وقاتل لو كان شخص كيف لو كان بأسره كامله أب أم جد اخ خوات كلهم بين يوم وليله تفقدهم تنام ع اخر وجه تودعه وتصحى ع خبر وفاتهم ..

اللهم لك الحمد لجلال وجهك وعظيم سلطانك ..
ومضه:
ماغاب ولكنه قدرٌ
والخير بما أختاره الله

قد مات فياليت عيوني
في كل منامٍ تلقاهُ

نختم هنا ولنا لقاء آخر إذا الله شاء..

اختي الكريمة هذه مذكراتك واقعية او من وحي قلمك ?

__________________

أولاً ي أختي الغاليه أشكرك للمتابعة ويسعدني تواجدك🌷
ثانياً ي غاليتي أسمحي لي أتحفظ بالإجابه حالياً لسبب ما لكن أوعدك بالأجابه لاحقاً، لكن توقعاتي بأنك راح تتوصلين للأجابه بنفسك قريبا ☺

أسبوعين بعد علمي بوفاتهم مرّت علي بمرارة وقسوه نهاره طويل وليله أطوول كرهت كل شي كرهت الحياه ماحس بأي طعم حلو فيها فقط أستطعم المراره بكل الأطعمة والمشروبات
الألوان كلها صارت بعيني أسوود الضحك والإبتسامه أستبدلتهم بالرفيق الدائم دمووع،،
الدكتور رفض يطلعني لأنه حالتي تتدهور ماتتحسن لكن عمي كان له نظره ثانيه غير الدكتور طلب خروجي ع مسؤوليته وخذني لبيته أعيش معهم لأنه ماعاد لي أحد في بيتنا رغم انه كنت أصرخ داخلي تمنيت أرجع بيتنا لآخر مره كنت أظن إنه كل اللي يصير لي كذبه او كابوس وأصحى منه كنت أظن لو أرجع بيتنا وأدخل عليهم بحصل أمي في المطبخ كالعاده تجهز الغداء قبل عودة أبوي من العمل ،وأحصل جدي مع دلاله في الخيمه ويتابع الأخبار ، وخواتي راجعين من الدوام هلكانين تعب وأخوي نايم ،
وأركض لحضن أمي وأبكي وأحكي لها عن كابوسي وتمسح ع راسي تهديني وتتعوذ من إبليس وترقيني، وأبتعد عنها وأركض لجدي كالعاده وأحط راسي ع فخذه وأتمتع بدلاله وأقول له ليت العمر ينعطى وأعطيك نص عمري ع عمرك ، وبنص حديثي يدخل الغالي ضي العين اللي كل عمره يغار غيره لطيفه من محبتي لجدي يظن أني أعز جدي وأحبه أكثر منه ارتمي عند رجلينه وأبوسهم وش هي الدنيا بلياك ي ابووووي💔
وبعده أجاكر خواتي ع محبة جدي لي وأزعج اخوي بنومته عساس يقوم العصر يمشيني 😔
لكن الأمنيه أصبحت مستحيله صحيت من أوهامي ع يد عمي وقتها آمنت أنهم ماتوا وماعاد لهم بهالحياه وجود راحوا لبعيييييد وأتركوا داخلي فراغ كبير مايسده بشر ولا مكان أتركوني بعالم لايطاق من دونهم ، حاول عمي تعويضي ع اللي فقدته لكن اللي فقدته لا هو شخص ولا شخصين ان كان لهم عوض أنا فقدت أسره كامله والعوض بالصبر والسلوان ،
وفر لي كل سبل الراحه والرفاهيه أعتبرني بنت من بناته قدمني ع أولاده عشان آخذ راحتي وماأخجل وهم عمرهم ماحسسوني ضيف ثقيل 💙
لكن المشكلة فيني أنا لا قدرت أعيش ولا تعايشت مع الحياه الجديدة دفنتني بتلك اللحظه يوم وصلني خبرهم حبستني بغرفه أكلي شربي قليل شكلي تغير أصبح هزيل وباهت عيوني ذبلت من الحزن بنات عمي مافارقوني لحظه حاولوا يطلعوني من الكآبة اللي أنا فيها لكن باتت محاولتهم بالفشل الكل إستسلم ورفع راية الهزيمه من إنهم ينقذوني من اللي أنا فيه الا شخص واحد وهو عمي مامل ولا تعب كل ليله قبل ينام يدخل علي الغرفة ويرقيني ويذكرني الرضا بالقدر وكل مره يحكي لي حكايه ع الصبر وفي الصبح يرفض يفطر مع أهله يفطر دائماً معي ويقضيها بسواليف فكاهية علا وعسى ابتسم لكن ماييأس مني ظل يحاول ويحاول كثير قالوا له خذها لشيخ يرقي عليها لكن كان يرفض أنا عمها وأنا راقيها ، كان يصم آذانه عن كل الكلام ومايصدق ولايتبع غير قلبه إلين في ليله من الليالي دخل كالعاده يرقيني وبعد الرقيه أنتظر الحكايه لكن كانت حكايه غير العاده حكى لي عن حياته طفولته مع أبوي وجدي حسيت ببحة صوته تغيرت وقال: أنا ي عمك فقدت أخوي سندي وأبوي مالي بالدنيا هاذي غيرهم وقبلهم جدتك هذا أنا وحيد مثلك كلهم راحو واتركوني بس ماسويت نفسك وحبست نفسي ع العالم مو لأَني ماأعرف أحزن ولا لأنهم مش غالين لكن آمنت بالله ورسوله وجبرت هالقلب بالعوض والسلوان آمنت بالجنه والجمعه فيها لكن أنتِ أفعالك لاترضي الله ولا ترضي رسوله الحزن يااعمك بالقلب والحياه ماشيه لو الدمع بيرد غالي كان كل من فقد له غالي قضى عمره بالدموع الدنيا هاذي فانيه وكل من فيها راحل أهلك وأهلي وانتي وانا مكتوب قدرنا من قبل مانخلق وقتهم حان وحنا لنا وقت بيحين<< نزلت راسي وبكيت بصمت >> إفرضي يومك اللحين إفرضي ملك الموت ارسله لك ربي وقتها وش جوابك له تكبرتي ع حكمته << رفعت راسي مصدومه>> آيه ي عمك اللي تسوينه غلط والله غلط أنا مقدّر إنك حزينه لكن بالحالة ذي تسمى إنتحار رفض للحياه رفضك لقسمته ،
بس أنا ي عمي << حط أيده ع شفاتي وقال ماابي أسمع أبيك تقومين من اللي انتي فيه وتصلين لك ركعتين وتدعين ربك وتطلعين من قوقعتك وتعيشين حياتك بس هذا اللي اطلبه واتمناه لك إنتي بحالتك ذي تزيديني حزن فوق حزني
ضميته وجلست ابكي ع صدره وجلس يمسح ع راسي إلين هديت ونفذت كلامه ...!


الحمدلله ع كل حال .. لهنا نتوقف 🌷

ومضه:
ليلي سرى ودمعي جرى وماحد درى إني بكيت
وقت مضى وقلب رضى وحكم القضا لا مااشتكيت
قلبي رحل وياهم يوم العرب تنعاهم
والرب ليه توفاهم بأمره رضيت
بعض الملا قالوا سلا لا لا لا ماسليت
عندي أمل ألقاهم في جنة مثواهم
وبرحمته يغشاهم ربي دعيت

تصبحون ع ماتتمنون 💐