السلام عليكم ورحمة الله وبركاته
نهاركم سعيد جميعا

انا متزوجه تقريبا من 7 اعوام وعندي ابن واحد الله يصلحه حياتي ولله الحمد ماشيه بافضل حال احب زوجي جدا لانه صادق ولانه حنون و لانه يحبني لكن مشكلته
غيووووور بشكل لا يصدق!!

في بداية زواجنا كنت اضن انه امر عادي ولاننا
تونا متزوجين لكن الموضوع ضل معي للحين
ومو عارفه احصل له حل!
غيرته صارت تاثر على حياتي بشكل سلبي
يبيني طول الوقت معاه!
يرفض اروح عزايم ومناسبات وزواجات
مايبيني اجتمع مع صاحباتي
ما يبيني اروح لامي غير مره وحده في الاسبوع!
طبعا الزياره تكون سريعه وطول هالزياره يرن علي
خلصتي؟ يالله اجي اخذك؟ طولتي!
لحد ما اطفش واقول خلاص تعال
امي دايم تسالني عن سبب قصر زياراتي وانا اتحجج بشغل زوجي وبشغل البيت
لكن الحقيقة هي ان زوجي يغار من جلوسي مع اهلي!
دايم لما اطلبه اجلس وقت اطول او انام مثلا
يرفض يقولي كفايه كنتي عندهم سنين خلاص
الحين وقتك لزوجك وبيتك مو لاهلك

اخر مره في زواج اخوي الوحيد طبعا هو يرفض رفض تام اروح زواجات
احيانًا المناسبات كبيره يوافق لكن بشروط وتعليمات توصل انه يتحكم بطريقة لبسي وبطريقة الميك اب و كيف مسويه شعري
اخر مره في زواج اخوي الوحيد الاسبوع الي فات
احنا من زمان نجهز للزواج وهو عارف اني رح احضر
طبعا جنني على ما اخترت البدله الي رح البسها يحاول يعيق الموضوع باي شكل!
لما صار بيوم الزواج العصر كنت عند الصالون و رجعت تقريبا عالمغرب وكان هو لابس ومتجهز
لما شافني قالي طالعه حلوه وفستانك حلو ومن هالكلام
طبعا انا عرفت من كلامه انه رح يصّر علي اجلس
في العرس ساعه بس واطلع .. تعودت على حركاته
لكن الي صدمني هالمره يقولي لاتروحين خير شر!
انا انصدمت اقوله من جدك ؟هذي اهم مناسبه بحياتي كيف تطلب مني شي مثل كذا
وصار يواعدني باي شي اتمناه يجيب لي المهم ما اروح
ونجلس ونسهر سوا .. اقوله معليش الجايات اكثر خليها ليوم ثاني وهو ملزم!!
طااال النقاش و طال الخلاف و طبعا محاولاته بائت بالفشل
قالي طيب لا تطولين بس سلمي واجلسي نص ساعه واطلعي!! وتشادينا وتهاوشنا وبالاخير سويت الي براسه و طلعت بدري و تظاهرت اني تعبانه

وربي مقهوره ونمت وانا ابكي
حتى بفرح اخوي الوحيد ماتهنيت!
اشوف خواتي وخالاتي مبسوطين وما طلعو الا الفجر وانا يادوب ساعتين على بعض ماكملت

تعبت معاه والله ياجماعه حتى من ولده يغار!!!
دايم يردد هالولد اخذ وقتك
ايه جاك الولد ونسيتيني
او لما اتدل و اتغزّل بولدي يقول ايه احنا لنا الله
مع اني مو مقصره بحقه ابدا واهتم فيه واحبه من قلبي
لكن غيرته صارت تخنقني
لدرجة احيانا يقول ليتنا بلا هالخلفه!
ويتكلم بكل جديه ولما انقد عليه يسوي انه كان يستهبل
وانا ادري انه صادق بحكيه

دايم يطلبني اترك ولدي عند اهلي يومين ونبقى بالبيت لوحدنا او يطلبني نسافر لحالنا وولدنا اتركه عند اهله او اهلي
طبعا انا ارفض ومستحيل اوافق على هالشي
لان ولدي متعلق فيني ورح يجنن اهلي
لو اخليه عندهم او عند اهل زوجي
وهو بالمقابل يزعل ويرجع يردد ليتنا بلا هالخلفه !


خلاص طفششششت منه وطفشت من غيرته الزايده
والله احبه واموت فيه لكن حاسه نفسي مو قادره اتنفس منه!
عطوني حللول ارشدوني الله يسعدكم ويسهل اموركم
ورب البيت ما كتبت الا لما طفح الكيل وحسيت اني مارح اتحمل غيرته اكثر من كذا








تم تعديل العنوان ليتناسب مع المضمون

الغيرة نابعة من الحب الشديد الذي يصل للتملك واحساس ان حياة متعلقة بوجود هذا الشخص
فالحل انك تشغلي بامور بعيدة عنك مثل تجارة او اي حاجة تشغل عنك وبدل ماتصيري انت مركز تفكيره يصير تفكيره متعلق باشياء ثانية جربي تشغلي عنك

طيب اختي زوجك من النوع الشكاك
يعني يشك فيك

__________________
سبحان الله وبحمده سبحان الله العظيم

فعلا كلامك سليم.. رح احاول اسوي الي قلته
كل الشكر لك اخوي

لا الحمدلله الثقه موجوده .. ولا بيوم شك فيني
لكن غيرته زايده عن حدها

شرايج تقلبين الادوار ؟ تبادلي معاه الادوار
انتي بيني له انج غيرانه عليه بشكل خانق


فيه فرق بينكم ؟ مستوى الثقافة والتعليم والجمال ؟

__________________

حاجة الناس إليكم من نعم الله عليكم ، فـ لا تملوا النِعم ☁✨

هههههههههه

سبحان الله كنت بكتب نفس الراد يوم
استبعدنا الشك
اقلبي الادوار وخلية يشعر بضيق من الغيرة وحب التملك
ولكن خلي الامر يكون بتدريج وليس بشكل مفاجئ

__________________
سبحان الله وبحمده سبحان الله العظيم

والله حاولت اسويها اكثر من مره
و المصيبه اني اطفش وانسحب بسرعه ما اقدر استمر على الحال


مستواه الدراسي اعلى مني
اما الجمال دايم يتكلمون اني اجمل منه
لكن انا شخصيا غير مباليه من هذي الناحيه وماتهمني ابدا
وحتى بنفسي ما احس اني اعلى منه عشاني جميلة!
و ما في يوم تكلمت معاه او حدث خلاف بيننا على هذي النقطه نهائيا

جربتي تصارحينه ؟

واذا صارت مصارحة شيقول لج ؟

__________________

حاجة الناس إليكم من نعم الله عليكم ، فـ لا تملوا النِعم ☁✨

مشكوره حبيبتي على انصاتك .. ربي يجعلها في ميزان حسناتك

احاول اتفهمه بالغالب لاني ما احب الجدل
لكن احيانا اطفش واتكلم معاه واتشكّى
يرد علي بإني انا اللي اشعل غيرته
ولو اني اسمع كلامه ورفضه بدون نقاش كان من زمان احنا متفقين

المشكلة انا دايم مطاوعته و ما ارفض الا الشيء الزايد عن حده!
والله العضيم تعبت منه