طلبتكم لاتردوني واللي يرحم والديكم ؟؟ ردوا علي

15-05-2005, 01:30 AM

ضمير تعبان

عضو جديد

تاريخ التسجيل: Apr 2005

المشاركات: 9

طلبتكم لاتردوني واللي يرحم والديكم ؟؟ ردوا علي

السلام عليكم ورحمة الله وبركاته ..

اسعد الله اوقاتكم بكل خير ...

اخواني الاعزاء ... اخواتي العزيزات .. من خلال تصفحي في المنتديات

اللي تبحث عن المشاكل الزوجية ووجدت ضالتي عندكم ...

وهو عندي مشكلة ومحتارة فيها وان شاء الله بخبرتكم وارائكم اللي ممكن

تجيب لس حل لأن قسماً عظماً انها المشكلة متعبتني حييييييييل ومنسيتني الراحة ..

وارجو انكم تسمحون لي باان انشرها عندكم حتى لو كانت طويلة بس ابيكم

تعرفون القصة من اولها لآخرها وان شاء الله مابتخيبون أملي ورجاي فيكم ..

وهذي القصة من أولها لأخرها والله يعينكم ..

@@@@@@@@@@@

بداية القصة .. لما كنت في الثانوية تعرفت على وحدة من البنات وصارت صاحبتي

الروح بالروح ومع الايام تعرفت على اهلها ومنها أخوها وكان عمره 19 سنة وانا 17

سنة .. وتعرفنا على بعض بس ماكنت حاطة في بالي انه بااحبه في يوم من الايام

او اني بكون زوجة له .. لانه كان صغير وعاملته على انه واحد صغير وناخذ ونعطي في

النكت وادري بتقولون لي ان اللي سويته عيب بالحكم ان مجتمعنا محافظ ...

ومرت الايام الا صاحبتي كلمتني وتقول لي ان اخوي يبي يخطبج من اهلج ...

عاد انا ماصدقت على الله لأاني كنت صغيرة وماخذه الحياة بااسهل مافيها

واستمرت علاقتنا حوالي السنة والست أشهر ... وتخرجت من الثانوية وتقدم لي

وامي من الاساس ماكانت موافقة ولاابوي ولاحتى اخوي .. علشانه صغير ولسه ماكون حاله

بس تركوا القرار لي وأنا ماصدقت على الله ووافقت وتمت الخطوبة وامي والاهل كانوا

مبينين لي انهم فرحانين وسعيدين .. وهم في الاساس مجاملة ..

المهم ..

وفي ايام الخطوبة بين لي حبه ولازم تعرفوا ايش يصير في الخطوبة من حب

وغزل والى ماذلك .. وصارت بيننا مشاكل على تأثيث الشقة وعدينا الامور على خير

وتزوجنا بعد تسعة اشهر ... وطلع لي على حقيقته المرة من ثاني اسبوع

صار مايجيب خبري ولاحتى يهتم واضطر حتى انه يضربني قدام اهله علشان صادف زواجنا

قبل العيد بكم يوم وذاك اليوم قال اليوم بنطلع مع الاهل وامي معانا وقلت له ..

على عيني وعلى راسي امك بتطلع معانا بس اذا بتطلع معانا وانت بتمزح فيني

على حساب نفسيتي ماراح ارضى او انك تستحقرني قدام احد هذا الشئ مايرضيني

فقال لي ولايهمج بس اهم شئ تكونين راضية علي وطلعنا ولاكأني موصيته قبل لااطلع

وهو يعلق علي ويقعد يستهزئ فيني وانا ساكته علشان ماابي مشاكل معاهم وهو يتكلم

ويمزح وامه تضحك وانا بداخلي نار والمهم رجعنا بالليل وقال بكرة جهزي حالج بدري

وقلت له اسمح لي ماراح اروح معاكم ... فصرخ علي وقال لي .. علشان امي بتروح معانا

فقلت له علشان نفسيتي ماتتعب زيادة ... المهم جى يوم ثاني وقال لي يالله .. قلت له

البارح عطيتك جوابي اني ماراح ارد ... فقام وجاب امه يقولها ترى زوجتى مو راضية

تروح معانا فقام يهاوشني ويرفع صوته علي وامه تهديه فقلت لهم انا اليوم ماراح اروح

بروح اسير على بيت اهلي فقال لي تروحين معاي غصباً عليج ومد يده علي ومن هنا بدينا

اول المشاكل .. وبعد فترة صار بيني وبينه نقاش عادي على انه مرت اخوه حملت قبلي

وانا لسه ماحملت وابوه من يشوفني قام يرمي علي كلام محد يستحمله وتأثرت نفسيتي

وعاد انا قلت له .. اذا تبيني اعيش معاك سعيدة لاتخلي احد يتدخل فينا وقام يصرخ علي

وهذا ابوي وش تبيني اسوي له .. اقوله مابيك تسوي له شئ وكلمه بالطيب بيسمع

وكلمةمني وكلمة منه واشتعلت وطقني طق مو طبيعي وتدخل اهله علشان انا ساكنه معاهم

وابوه صار ضدي معاه والام صارت معاي وتهديهم ... المهم مرت ذيك الليلة

بذاك التعب النفسي والقلق والكدمات ويوم ثاني جيت لامي بس ماشكيت الحال لها وهي

عرفت اني متغيرة وطالعت فيني زين وشافت الكدمات اللي بوجهي وجسمي كله

وحلفت امي يمين وعظيم اني ماارجع له وبالفعل مارجعت وقعدت اسبوعين الا وطلعت حامل

وكلمته وقلت له تعال لي .. الا يرد علي زي مااهلج خلوج عندهم هم اللي يجيبونج لي

مو انا ؟؟ فقلت له تعال ومايصير خاطرك الا طيب .. وجى .. وعلمته اني حامل .. وانصدم

مو ممصدق الخبر وتأسف من ابوي وقال له ان شاء الله ماراح نعيدها .. ورجعت معاه ولا

كأنه شئ صار ... ورجع اخس من الاول ... ومرت علي ايام الحمل الاولى وقلت له اذا ماعليك

كلافة ابي فلوس ابي اشتري لي ثوبين حق حمل وقال لي ماعندي انتظري لي كم يوم

فقلت له ان شاء الله مع اني ادري ببخله الزايد فقلت يمكن يتغير .. وطفح فيني الامر وثيابي

ضيقت علي وكلمته ذاك اليوم وقلت له انت وعدتني انك تشتري لي ثياب وقال لي عندج في

الدرج 500 ريال روحي وشوفي وش تبين .. عاد انا من فرحتي كلمت اخوي وقلت له وخذيت

لي اللي ابيه وجيت اوريهم اياه في الليل وسألني من وين لج الفلوس ؟؟ فقلت له مو انا

كلمتك وقلت لي عندج في الدرج .. الخ .. الا قام وزجر علي وقوم الدنيا علي وقال اني

حرامية واني امد يدي عليه فقلت له احلفلي بربك وبالقرآن انك ماقلت لي .. فقال لي انا قلت

مو الحين وصار يكذب وتدخلت امه وقامت تهديه وعطته 500 ريال وقالت له استر على بنت

الناس وكفاية مشاكل والحين انت ابو لمتى .. وانهارت اعصابي ونزل عندي الضغط وودوني

اسعاف للمستشفى حتى الدكتورة قالت لي بنفتح معاه محضر بالشرطة فقلت لها لا هو

يشتغل ومابي اقطع رزقه .. ورجعت معاه الشقة وصار يحرمني من الاكل وحتى الماي

وصار ينزل ياكل عند امه ... وصارت تركب لي الاكل فوق .. وهو ولاحتى جايب خبر وتقول

لي والله انه مفشلني معاج يابنتي اذا بغيتي شئ انزلي ولاتستحي ... وركب هو وعاد

قعدت اتفاهم معاه وقلت له مو حالة اسلام اللي تسويها معاي لاتصرف وحتى كاس الماي

مستخسره علي وقال لي مو عاجبج روحي بيت اهلج وقلت له اذا رحت بيت ابوي والله اني

ماارجع .. فقال لي ماتبين ترجعين واخذني ضرب بالعصا علشان قلت له اذا طلعت ماراح

ارجع .. وطلعت بنص الليل ورحت بيت الجيران علشان اكلم ابوي وقعدت بيت ابوي لـ4 شهور

وصار هو يدق ويترجى علشان ارجع وواسطات بس انا مارضيت على الاهانة وكنت تعبانة

وقبل شهر من ولادتي رجعت بعد عدة محاولات منه ومن الواسطات اللي جابهم لي ..

اكمل الموضوع ان شاء الله اليوم اذا ماعليكم كلافة

15-05-2005, 01:45 AM

هند ام احمد

من كبار شخصيات المنتدى

تاريخ التسجيل: Apr 2004

المشاركات: 2,344

طيب كملي اختي
ولا تخافي ماعلينا كلافه ....

__________________
الحمد لله على نعمه وفضله وكرمه ..

15-05-2005, 01:52 AM

just_4_u

عضو جديد

تاريخ التسجيل: May 2005

المشاركات: 14

الصراحه الله يكون بعونك
لكن وش موقف اخته من الي يسيير معك
واتتمنى التكمله يكون فيه خير لك يا اختي

15-05-2005, 08:17 AM

مشاعر مرهفه

قلم مبدع

تاريخ التسجيل: Mar 2005

المشاركات: 1,063

اختي .. كان الله بعونك وبعون كل امراءه وقعت بين يدي زوج ظالم ...
واحنا بانتظار بقية القصه ... وانشاء يكون فيها الخير كل الخير ...

التعديل الأخير تم بواسطة مشاعر مرهفه ; 15-05-2005 الساعة 08:19 AM

15-05-2005, 09:05 AM

yaser111

عضو نشيط جدا

تاريخ التسجيل: Dec 2003

المشاركات: 376

الاخت ضمير تعبان،

كان الله في عونك.

مشكلتك هي مشكلة الكثير من الزوجات اللواتي يرتبطن بازواج لا يخافون الله فيما استرعوا فيه، فزوجك لا يعلم حقوق الزوجه واحترامها وكيف يتعامل مع المرأه بشكل صحيح، بسبب صغر سنه والظروف التي نشأ فيها وربما ايضا نقص الفهم عنده لديننا الحنيف.

انصحك بما يلي :

اولا الصبر على هذا الزوج ومقابلة الاساءه بالاحسان اليه لعله يحس بخطأه ونبلك معه وهذه طريقه ممتازه للعلاج ولكنها تحتاج الى صبر وقوة تحمل.

ثانيا ذكريه بين حين واخر بادب بحقوقك عليه واحاديث الرسول صلى الله عليه وسلم التي تحث علي حسن العشرة.وانك زوجته وام اولاده وانك ملجأه الوحيد بعد الله تعالى اذا ضاقت عليه الامور .

ثالثا ادعي الله له بالهدايه.

رابعا عليك بمراجعة نفسك ومعرفة سلبياتك وتجنبها لانه لا يوجد انسان بدون عيوب وقد لا يرى المرء عيوبه واسالي من تثقين به من قريباتك عن عيوبك . اقول هذا لاننا قد سمعنا منك فقط ولم نسمع من زوجك ودائما الانسان عندما يعرض مشكلته يعرضها بطريقة لاستجلاب تعاطف الاخرين معه ولا يعرضها بموضوعيه.

اسال الله الهداية لزوجك وان يصلح بينكم بخير

تحياتي

15-05-2005, 09:21 AM

mona777

VIP

تاريخ التسجيل: Feb 2004

المشاركات: 4,123

كان الله بعونك

لا تكملين شكلى بهون ما بتزوج من كثر المشاكل اللى بشوفها بالمنتدى
يشيب لها الراس

15-05-2005, 09:53 AM

ملكة الرمانسية

عضو نشيط

تاريخ التسجيل: May 2005

المشاركات: 140

الله يكون بعونك يالحبيبة الله يسخره للك يارب وبنات المسلمين اجمعين .... عليك بالدعاء آخر الليل فان سهام الليل لا تخيب.

15-05-2005, 10:22 AM

المهاوي123456

موقوف

تاريخ التسجيل: May 2005

المشاركات: 144

عليك بالدعاء لانه لااحد يصلح الحال غير رب العالمين خاصه (دعاء الليل)
ولمن انتبهي ان تدعي عليه لن دعوه المظلوم مستجابه وادعي الله ان يصلح حالكما وحاولي التحاور معه لانه ممكن انه يتعرض لمشاكل في العمل اوضيق مادي وادعي الله ان يعوضكي في مولودك وحفظكي الله دائما

15-05-2005, 11:22 AM

om mohd

عضو دائم

تاريخ التسجيل: Feb 2004

المشاركات: 81

اختي..
هالرجل ما يستاهلك .. لأنك عطيتيه أكثر من فرصة... ويرجع لطبعه القاسي مرة ثانية..

الوقت قدامك ..مدام عندك طفل واحد منه.. لو عطيتيه فرصة ثانية ورجع لطبعه بتجنين على

نفسك وعلى طفلك.. لحقي نفسك قبل لا يكثرون العيال وتقولين ياليت وياليت..

انا مو قصدي أخرب بيتك.. والله الشاهد على كلامي.. بس انا حاسة فيك .. وكيف نفسيتك

تعبانه من الضغط والمشاكل.. انتي بنت ناس وعندك كرامه..

بس عندي سؤال بسيط... وين أهلك؟؟ ابوك او اخوانك؟؟ ليش ما يوقفونه عند حده؟؟

15-05-2005, 01:00 PM

#10

meme900

عضو نشيط جدا

تاريخ التسجيل: Aug 2004

المشاركات: 410

أسوأ شيء أن الرجل يقلل من أحترام زوجته أمام الناس أو أهله والعكس صحيح ....... فكون أن الرجل يسخر من زوجته ويستهزأ بها قدام أهله هذا تصرف طفولي و بداية لشرارة المشاكل
على العموم أختي أحتسبي الأجر وأصبري عشان أبنك ......

__________________

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه