السلام عليكم يا بنات وياعرائس المستقبل.....
أولا أهنئ كل عروسه وأنا عارفه إن العرايس بعد رمضان بتكثر, اللهم بارك....
وعاوزه أقدم من هنا فكره نفسى كلنا نتمسك بها .
وهى تحقيق الغرض من الفرح , ومن غير ما نتهاون فى حق ربنا ..... هنرجع للنقطه دى بعد شويه....
طبعا يا بنات كلنا بنحب قوى نشوف العرايس وبيشد إنتباهنا شكل العروسه....
فستا نها وشعرها والفرح كان فين والزفه والصور,وكلنا بنفرح لفرحة العروسه وبنتمنى لهم النجاح مش كده ..بس صدقونى توفيق ربنا عمره ما يكون إلا بطاعته ,,وأظن إننا كلنا متفقين على كده .
نرجع لموضوع التهاون :بيكون فى إيه.
أقولك:1- فستان الفرح المكشوف { وآسفه إنى أقول إنه فىأوقات كثير بيكون فاضح مش بس مكشوف } وللأسف أحياناً بتلبسه عروسه فى الأصل محجبه بحجة إنه يوم فى العمر.
2- الذهاب لكوافير رجل تعبث أصابعه فى شعرك ويداعبك ببعض الكلمات ,وكثيرا ما تكون هذه الكلمات فيها دلع لا يجوز { علشان يغير من حالتك المتوتره ويرفع من نفسيتك }
3-ولسه عمل هذا الرجل لم ينتهى ..... لسه النمص , والمكياج ...والتاتو
كم إستغرق من وقت هذا العمل؟؟؟؟ غالبا تخرج العروس من بيتها قبل الظهر لتلحق بميعاد المصور الذى يكون فى العاده بعد العشا ...
ياترى صليتى .... الظهر وللا العصر وللا المغرب وللا العشا ؟؟
أعتقد أن صعب تصلى جميع الفروض مع ظروف المكياج والذى منه ....
وتبدأ الزفه...
4- وفى الزفه يرقص الجميع المعازيم والعروسين والأهل ,,,,, وربما الماره أيضا
5- أما عن الأزياء ... وما أدراك ما الأزياء .... يمكن المحجبات بيلفتو النظر أكثر وللأسف بالسلب
مش بالإيجاب , وكثير بنسمع أثناء الفرح {{{ آدى المحجبات }}}}
وينتهى الفرح مع الساعات الأولى من النهار ..
وتدخل العروسه بيتها وهى محاطه بالصخب الشديد , وربما ضرب الطلقات ....
والهيصه دى ليه { علشلن حديث الرسول أشهرو النكاح ولو بالدفوف } وطبعا إحنا بنعمل الواجب وزياده ...
الحقيقه يابنات التجاوزات ملهاش آخر............................................... ..........................
ومش عاوه أنسى إن فيه العكس تماما وبعض الناس ترفض بناء بيتها على باطل
فما بنى على باطل ليس إلا باطل ,
أنا قصدى إيه من القصه دى .....
والله ما أقصد إلا الخير لكم جميعا... أنا نفسى نعمم موضوع الفرح الأسلامى إذا جاز لى هذا التعبير ... نفسى كل عروسه تفرح من قلبها وتبنى بيتها وتبدأ بركعتين كما كان {من علىّ وفاطمه رضى الله عنهم }
إبدئى بناء بيتك على أساس متين ....
على فكره يا بنات أنا ينقصنى العلم , ولكنى أحبكم ولا أريد إلانصيحة خالصة لله
ياريت تفكرو وتقرروا , بعد صيام رمضان هتعملى فرحك إزاى ؟ وتحبى تكونى زى مين
فاطمة بنت محمد خير البشر وللا نفسك تعملى زى أميرة من ملوك البشر ؟
وياريت المتزوجات يشاركونا بكلمه أو تجربتهم الشخصيه , وعلى فكره فيه ناس حكو اقصه زواجهم فى صفحات ثانيه من المنتدى ياريتهم يشاركونى هنا تانى ونقدر إنشاء
الله نساعد العرايس عن أى إستفسار ,,,,,


منقول

__________________