السلام عليكم ورحمه الله وبركاته


اخباركم ياحلوات

ادري بتقولون مو صاحيه لسه بالشهر الثالث وافكر بالولاده بشكل مو طبيعي والله اني كارهه حملي من الخوف اتمنى لو اني ماحملت

خووووف ورعب ماانام بالليل من كثر التفكير راسي بينفجر


انا انسانه بطبعي اخاف من ظلي والله اني مادري كيف ولدت مرتين ومشكلتي مو في الالم مشكلتي بالخوف

في ولادتي بولدي الاول من حملت وهو مهدد بالاجهاض نزيف وجلست شهرين ماتحرك وتدمرت نفسيتي وولدت ولاده مبكره وماكنت اعرف ولاشي لاقريت ولا سالت حتى الطلق مااعرفه

ماكنت اسمح ل احد يعلمني عشان ماخاف وجاء اليوم الموعود ياسلام كنا برمضان وكنت رايحه ازور وحده نفاس وتعبانه بس مادري انه ولاده ومعاي طلق واحسبه امساك وانتم بكرامه وكل شوي اروح للحمام واتعصر ربي رحمني ماطاح الولد

المهم نزل معاي نقطه دم ورحت المستشفى قالت الرحم مفتوح 1 ونص سم والله لما كشفت كل الناس تسمع صرختي بغيت انجن وجلست ارجف اسناني تصفق ببعض خوف غير طبيعي وكان حر ورجعت للبيت واتغطى باثقل بطانيه ولاتدفيني المهم كان وقت صلاه القيام راح يصلي زوجي وبعد الصلاه رحنا للحبيب وقالو مو ولاده انتي لسه بدري عليك وعطوني حبوب ومسكنات وطلعت بس كشفو علي كشف احسهم طلعو قلبي من محله

رجعت البيت ونمت بعد الفجر لما جت 11 الصباح وانا نايمه اسمع صوت واحس بالبلل والا المويه انكبت وطبعا ماعرف شي بغيت انجلط
واطلع للحبيب بسرعه قالو مفتوح 3 سم خلاص ماتطلعين ولاده وكل تقريبا عشرين دقيقه او ساعه مااذكر كانو يكشفون كنت احس انه سكرات موت الطلق اهون مليون مره من الكشف بغيت افقد عقلي الم لايطاق واطلب بنج ولا احد يعطيني يقولون حطينا بوسكوبان بالمغذي بس انا ماتخدرت واعطوني كمام ولاتخدرت

والله يابنات لحد مااذن المغرب ولدت شفت الموت ولحد مااموت ماقدر انسى ذاك اليوم اتخيله الحين صاير معاي مع انه قبل ثلاث سنين بس شي عجيب الله يعظم اجرنا بس


حلفت بولدي الثاني اخذ ابره الظهر من حملت وانا ادعي اني مايصير لي مثل حملي الاول وان ربي يسخرهم لي ويعطوني الابره

كنت حاطه فلوس ع جنب بدفعها قبل الولاده ل ابره الظهر من خاف سلم وكنت بسال الدكتوره اذا يقبلون يسجلون لي بملفي اني دفعتها ويعطونها لي ومتحمسه كنت

المهم حجزت موعد الاحد الساعه 9 الصباح مع سلوى السودانيه بالحبيب الريان
سبحان الله السبت كنت احس بكتمه وضيقه صدر ومغص بس انا احسبه من القولون وامساك سهرت ذاك الليل وقلت بنام بعد الفجر اصحي زوجي لدوامه وانام لحد ثمان واطلع لموعدي

صليت الفجر قال زوجي لاعاد تنامين صحيني سبع ونص وبعدين نامي وانا منسدحه ع السرير واتابع فلم الا تنفجر المويه طبعا اذا انفجرت احس بنفضه وبرد مو طبيعي واصحيه واصارخ وبسرعه رحنا وصلت المستشفى وانا ميته رعب من الكشف

وتكشف بغت تنجلط الدكتوره قالت مفتوح تسع ونص سم قالت انتي مجنونه كنتي بتولدين بالسياره ولاشعوريا جلست اضحك من الفرحه انهم ماراح يكشفون طلعوني فوق واول ماحطوني وانا ادفع ووسعو لي وطلع مااخذت نص ساعه

ماقدر اوصف لكم فرحتي كنت مواصله مانمت وجلست لين الليل مو قادره انام ودي ارقص من الفرحه

كنت شايله هم الكشف وربي نجاني منه

طبعا فرق بين ولادتي الاولى والثانيه والحين ثالث حمل وحاسه انه زي الاول من الوحام اللي شفته شلت هم الولاده احس البوادر تذكرني بولدي الاول

والله افكر ليل نهار ودي اولد قيصري بس خايفه

انا ودي مااحد يكشف علي قمه الرعب الكشف والله اتمنى الموت ولا الكشف شايله همه صح بدري بس مرعوبه

بنات ابي مستشفى مايعور كشفهم انا اتابع بالحبيب الريان وابي ادق التفاصيل عن ابره الظهر ومتى اروح اخذها انا ابيهم يحطونها اول مايكشفون يعني مره وحده كشف راضيه بس اكثر من مره مااقدر اخاف افقد عقلي من الالم

وسمعت ان فيه قسطره ايش القسطره ذي وتعور ولا لا انا ضربت الابره عادي مو خايفه منها لانه عادي متعودين ع الابر بس مابي احس بالكشف والخياطه هالشغلتين اهم شي حتى الطلق عادي شي من نفسي اقدر اتحمله بس مااتحمل احد يوجعني


عطوني رايكم كيف اتخلص من هالخوف وانا مشكلتي اصارخ بشكل مو طبيعي من يقربون مني قبل مااحس بشي ودي ابطل هالعاده القبيحه احسهم يحسبوني مجنونه ههههههههااي يامن يلومنا


ياعمري يالحريم تتعب وتعاني والرجال نايم ويدقون يبشرونه

والله حالفه من غير شر انه اخر حمل لي بس الله يرزقني ببنت لان نفسي ببنت


صدعت بروسكم بس ابي افضفض ومروعبه ابي احد يطمني

احكو تجاربكم بالولاده وكيف كانت ووين ولدتم وكيف الخياطه

صح مفكره اخيط تجميلي من جربت وباي مستشفى؟؟

شاكره لكم