السلام عليكم
أنا متملكة من تقريبا شهرين و صار الرجال يكلمني و يرسل
فيه مشكلة ممكن تكون بسيطة و حلها سهل لكن مالقيته
و غير كذا مابيها تستمر و تكبر مع الوقت و كل يوم اجيكم اتشكى
لقيت مثلي واجد لكن كل الحلول (صيري جريئة) ! (خلي عنك الحياء هذا زوجك )
أخليه بين يوم وليله ! أنا أبي حل جذري
..


(أساس المشكلة) الحياء أو الخجل الزايد أحس مرات وصل لدرجة المرض اللي ابي اتخلص منه !
والله مرات ادعي ان ربي يفكني من بعضه

زودٍ على ذلك إني مدري احس مالي في الكلام الزين أزين شي اقوله ياحبي لك و ياملحك و
هذي ممكن اقولها عن شغالتنا "الاثيبوية الله يصخرها لنا" يعني ما تحمل اي معنى للحب اي شي ثاني الا انها حب حب
ماهوب مشكلة نتعلم و الكلام الزين على قفا من يشيل

نجي لـ (المشكلة) هي إني الله يسلمكم استحي منه مره مره !
وكلامي معه إذا مهوب عن دراستي و عمله فهو مزح و ضحك ,
أما الكلام الحلو بيني و بينكم ما اجاريه فيه هههه الله يصبره

يقوله و يرسله لي لكن عمك اطرش هههه مرات ارد له بابتسامه و مرات اذا على الجوال تطلع مني ضحكة مستحية
بس رد مافيه رد مع الاسف الشديد.. ودايم يقول قولي اللي بخاطرك عني و اقول له مدري مابخاطري شي هههه
و يصرف الموضوع وعقب يقول انا مشغول والا ابرقد

طلبت مشورة الصديقات الثقات نحسبهن كذلك والله حسيبهن ,, قالوا لي لاتخربين على نفسك من البداية ترا بتندمين بعدين
لاتقولين له كلمة حلوة كانك مستحية بس لا بدا هو ردي عليه و شوي شوي بتجسرين ..

حل صديقاتي حلو و حلو جدًا لكن مانفع معي !
الرجال بدآ يمل وده يقول اللي بخاطره لكن أنا له بالمرصاد هههه,,
صار يخاف يقول كلمة و استحي منه ثم تنقطع السالفة و تنتهي المكاملة أو المحادثة !!
قال لي مرة ابجيكم و اشوفك .. ارتعت و على طول قلت له لا "بدون تفكير" هههه قال هو ادري تستحين للحين و ماعاد ردها


السموحة منكم طولت بالشرح والموضوع مايستاهل لكن تراه ماجاكم إلا بعد تنقيح

أبي حل الله يرضى لي عليكم
و إن ماعندكم حل, ترا الدعوة زينة
والله يجزاكم خير

خذي لك لفة في موضوع احساس ولهان و لوف وكم واحد هنا
وشوفي خجل زوجاتهم فين وصلهم ..بعدها حتشوفي إذا مشكلتك فعلا صوغننه ^_^
النت مليان ..وتقولي مالي في الكلام الزين؟ يابتي اجتهدي حبتين p=

__________________
( وَالَّذِينَ يَقُولُونَ رَبَّنَا هَبْ لَنَا مِنْ أَزْوَاجِنَا وَذُرِّيَّاتِنَا قُرَّةَ أَعْيُنٍ وَاجْعَلْنَا لِلْمُتَّقِينَ إِمَامًا )

طيب ليه ماتخلينه يجي وخلك كريمة بالتقديم بيني لك فرحتك فيه عشان يتطمن هو وعشان الزيارة تكسر حاجز الخجل
حاولي تقولين اللي بخاطرك بدون تصنع لو كلمة بسيطة في البداية بعدين تجرأي
*

مشكلتك صغننه صح وحلها سهل
اولا انا اشوفك ماء شاء الله تعرفين تكتبين واسلوبك حلو وواثقه ومافيك الا السناعه
وحلك اول شي قولي له انك تخجلين من انك تقولين له كلام حلو
وانك راح تجمعينه وتكتبينه في رساله
واذا ماتعرفين تكتبين كلام حلو النت مليان رسائل ابحثي في قوقل وخذي كم رساله تحسين انها حلوه وتعبر عن اللي بخاطرك
وسوي عليها تعديلات وارسليهاا ولاترسلينها كلها مره وحده خليها تقطير ونوعي مره سطرين مره كتاب
مره رسمه بيدك
وفيك تشوفين صوره حلوه والا تسوين له فيديو عرض صور ومكتوب عليها كلام حلو يعبر عن اللي بخاطرك مو تلفيق
بس الفيديو خليه اذا هو سوا لك حاجه حلوه يعني تكتكي امورك اشوي وبعد فتره راح يروح الخجل وتغثينه

الله يوفقك ومبروووك

قريت موضوع احساس ولهان .. ادري ان الرجال يملون من اللي كذا و عشان كذا كتبت الموضوع لاني ابي حل
الله يعين بس
مشكورة يا سما~
..

هلا وغلا اختي اول شي الف مبروك
واحمدي الله على انه سخر لك زوج صالح وطيب ..

شوفي اختي الكريمه
انا بعطيك نصيحه لا تبخلين على زوجك بأي كلمه حلوه ياخي الكلام الحلو كثير
دلعيه باسمه حبيبي قلبي روحي ملاكي دنيتي تاج راسي والخ... هالكلام واقسم بلاه الرجال يروح ملح يوم يسمعه
سالفة صحباتك يقولون لك لا تدلعينه ولا تقولين له كلام حب هذا خطا كبير وما احترامي لصديقاتك وربي بيوقعوك بشي ما تحبينه ...
حبيبتي هذا اسمه زوج المستقبل اذا ما دلعتي زوجك ولا اعطيتينه مشاعرك بلاه لمين بتعطين ؟؟؟
وانتي تبينه يتعلق فيك ولا ينفر منك؟؟
ياخي مهما كان . الرجال عنده مشاعر ومثل ما تاخذين هو بعد يبي
خليك على طبيعتك وخليه يزورك لا تبخلين على زوجك بشي
انا بذكر لك قصه صغيره حدثت لواحد من اصحابي في العمل ...
(الرجال كان مملك على بنت عمو .. وحبها حب ما بعده حب وصار يعطيها مصاريف ويدلعها كلام حب وولعد وشوق ... البنت كانت جدا كتومه ومستحيه وما كانت تبادله نفس الشعور ... جلس الرجال على هالحال تقريبا 5 شهور وهو يعطي ويعطي ويعطي دون مقابل ..كل ما يجي يقولها بزورك ترفض سببا للخجل .. يقولها كلام حب ما يجيه رد ولا شي
والله الادمي جاه برود وما صار يتهم مثل اول صار يطنشها لي انه بجد احبط )...فا يا عزيزتي الرجل لديه مشاعر ومثل ما يعطيك اعطيه
سالفة صديقاتك وما صديقاتك خليهم على جمب انتي الي بتعيشين مع زوجك وليس صديقاتك
خليك على طبيعتك وحبي زوجك مثل ما هو يحبك
واسالله ان يسخر لك واسف على الاطاله بس بجد مشكلتك بسيطه ولا تخلينها تكبر وإنتي الي راح تكبرينها بنفسك

معليش حبيبتي مشكلتك مو صغننه..

هي أن شاء الله سهله في حلها..لكن نظرتك لها أنها صغيره غلط..
مو مدركه أثرها على خطيبك.. أقري مواضيع شكوى الأعضاء بهذا القسم من خجل زوجاتهم وكيف متعبه نفسياتهم..

حبيبتي بسألك؟ألا يستحق خطيبك منك أنك تبادلينه الكلام الحلو ..وتسعديه مثل مايسعدك وتدخل الفرح لقلبه؟
وخاصه أني لمست من حديثك عنه أنه ماشاء الله ونعم الرجل..

ليه تحرميه الي يحب يتفاني بأرضاء من يحبه.. ويهمه يكون مبسوط وسعيد..

صدقيني المسأله بسيطه هي تبي منك بس أنك تتشجعي فالبدايه وبعدين صدقيني بيمسك معك الخط وبتستمري ..(داخله عرض يمسك معك الخط^_^)

وعندي لك فكره:سوي بروفات بينك وبين نفسك ..وقولي كلام حلو هذا وجهي أذا ماطلع معك معلقاااات غزل هههههه.. وأذا أتصل تشجعي وقوليها..

وبعد رددي دايم في نفسك: أنا جريئه وبقدر أقوله وأعطيه هذا يعطي رساله لعقلك الباطن أنك فعلآ تقدري..

الله يوووفقك يااارب..أسلووووبك مره أعجبني^_*

صحيح لو أجلس معه بيخف الحيا لكن ماش منحرجة من أهلي, يوم جاني بعد الملكة بغيت اموت حيا منه ومن اهلي ..
على انهم والله ماعندهم مشكلة الا في حالة انها يزودها و سرداد مرداد على البيت..
و ابوي اول المؤيدين للفكرة وهو قايل له متى مابغيت تشوفها تعال لانه ولد اخوه ..
لكن انا منحرجة من اهلي بس بعدين قلت له ان الزواج مابقى عليه شي ان شا ءالله يعني تصبر ههه.. :14:

بنت أطيب انسان .. 1000 شكر.. و الله يجزاك خير

اللهم آمين وإياك و كل مسلم
الله يبارك بأيامك ..
فكرة إني اقول له اني منحرجة منه برسالة و اني ماقدر اعبر له هههه راودتني كثير بس خفت اسويها و اندم عليها

jتدري!..
شورك وهداية الله ..

love الله يجزاك خير و يفرج همك

طلبت مشورة الصديقات الثقات نحسبهن كذلك والله حسيبهن ,, قالوا لي لاتخربين على نفسك من البداية ترا بتندمين بعدين
لاتقولين له كلمة حلوة كانك مستحية بس لا بدا هو ردي عليه و شوي شوي بتجسرين ..
محد ضيع تفكير البنات اسمحيلي الا هالاراء والنصائح اللي ماتودي الا لوراء خليكي سلسه شويه احتويه اغمريه حنان وحب كسري حواجز الخجل اتناقشوا في مستقبلكم في بيتكم ماينفع تقتصر مكالماتكم على اشياء سطحيه وتنكيت دايما لازم من التعمق شوي و الرومانسيه والكلمه الحلو لابد منها فتره الخطوبه احلى فتره تمروا فيها وبما انك قلتي الزواج قريب فعيشيها بسعاده حاولو تفهمي اكثر علشان تقدري تتعايشي معها لانه الخجل احيان بيزيد عن حده وماتقدري تعطي شريك حياتك شي وبعدين انتي خجوله من كلمه حلوه تطلعيها طيب مافكرتي بكره وشلون بتتعاملي معاه في العلاقه الحميمه00؟؟موفقه