السلام عليكم ورحمة الله وبركاته

والله الواحد مافي احد يشكيلو عن همو غيركم .. الموضوع دا اعتبروه فضفضة مع طلب مشورتكم
انا كتبت موضوعي قبل كدا .. وانقفل الموضوع ورجعت فتحتو تاني بس الاشراف قفلو
عالعموم انا قررت انفذ خطواتي بنفسي وقلت ان شاء الله ربنا بيكون معايا وبيساعدني

موضوعي كان باختصار اني احببت فتاة من 5 سنين .. وهي كانت تبادلني نفس الشعور .. كنا نتكلم دايما .. يوميا تقريبا .. وكنا مخططين اننا نكون لبعض من جد يعني مو بس لعب .. واتفقنا على هذا الشي .. ونيتنا كانت صافية .. وكنا عارفين حدودنا كويس .. وقلنا في حاجات ما نسويها عشان نعيشها بعدين لما نتزوج ..

صح ممكن تخالفوني اننا اساس علاقتنا كان غلط وكدا .. وانو ما كان علاقتنا شرعية .. بس احنا اثبتنا اننا نبغاها تكون صح .. لما رحت خطبتها من اهلها .. وعرف كل واحد فينا اننا من جد نحب بعض

5 سنين وخطبتها فالسنة الرابعة .. بداية الخطوبة كانت شي رائع نستني كل شي سار فالاربعة سنين الي كنا مع بعض فيها .. شفتها وشافتني وكانت احاسيس لا توصف .. كنا فرحانين من قلبنا

انا خطبتها سنة ليا دحين .. والملكة الزواج المفروض كان بعد 6 شهور كمان

مشاكلنا بدأت في الـ 3 أو 4 شهور الاولى من الخطوبة

مشكلتي بالتفصيل حتلاقوها فمواضيعي السابقة
بس حقولكم هيا باختصار .. مشكلتي معاها انها كانت ما تبادر .. وكانت تطنش

حاولت معاها .. دخلنا في مشاكل اعمق .. واتصالحنا .. ورجعت برضو تطنش ..
لما رجعت كلمتها تاني برضو اتزاعلنا .. بس دي المرة انا طنشت ..
وانا مو من عادتي اطنش لانو بالنسبالي مو حل أبدا .. وما احب اكون معلق كدا

المهم انا بداية ما طنشت كان نهاية ذي القعدة .. لين جا عيد الاضحى .. قلبي ما اعطاني .. رجعت كلمتها تاني .. لما كلمتها عرفت انهم في درة العروس في جدة ( كباين )
قلتلها اوك انبسطو ولما ترجعو البيت كلميني

المهم هيا رجعت وما كلمتني الا بعدها باسبوعين يمكن .. كل دا الوقت انا منتظرها .. قالتلي انا اعطيتك وقت كفاية وانتا ما تبغا تكلمني ولو حركاتك دي تبغا تروح الباب يفوت جمل ..
انا طبعا بالقوة بالقوة اقوى شي فالعالم مسكت اعصابي يعني .. وقلت حرام انهي 5 سنين بسبب حاجة تافهة
وقلتلها انا اتصلت عليكي وقلتلك كلميني لما ترجعي وانتي ما اتصلتي .. انتي اللي حركاتك كانك تبغي تروحي ..

المهم بعدها الكلام دا من الحج .. الى قبل امس وما اتكلمنا مع بعض ولا اي كلمة ..
صح كنت احن لها كثير وكان نفسي اكلمها .. بس قلت ابغا اوصلها رسالة انها لو تبغا الاسلوب دا اقدر اسويه .. ولو تبغا نكون مع بعض برضو اقدر .. وقويت قلبي
انا كنت اكلم اهلها من فترة لفترة .. وما حسيت انهم عارفين شي .. يعني اكيد ما قالتلهم .. وانا طبعا ما كنت ابين لاهلي ..

المهم لين ما سارت كارثة جدة يوم الاربعاء ( الله ينتقم من اللي كان السبب )
هيا من سكان جدة وانا من سكان المدينة ..
كلمني اخوها الخميس الضهر .. وقلي كلمتها ( قصدو على خطيبتي ) .. قلتلو لا ليا يومين ما كلمتها ( عشان ما يشك )
قالي انهم كانو فالطريق لما المطرة نزلت .. وغرقت السيارة وراحو عند ناس وباتو عندهم لين ما خفت ورجعو البيت بعدها وطمني انهم بخير

انا اول ما دريت ارسلتلها رسالة وقلتلها الحمد لله عالسلامة طمنوني كيفكم دحين ؟

ردت عليا الليل متأخر .. الحمد لله طيبين .. قلتلها اقدر اتصل عليكي ؟
قالتلي ليش ؟ قلتلها ابغا اطمن بس .. قالتلي جيت متأخر مرة .. واصلا احنا انتهينا .. قلتلها ايش اللي انتهى ؟ قالتلي عادي لو تبغانا نتكلم انا عادي .. قلتلها ما جاوبتيني ؟
قالتلي اتصل عليا واجاوبك .. < الكلام دا بالرسائل

بعدها اتصلت عليها .. واطمنت عليها انها بخير .. وقلتلها ايش الجواب طيب ؟
قالتلي انا وانتا خلاص انتهينا .. انت ما تهتم وانا مابغا اعيش مع واحد كدا .. وانت اللي اخترت الطريق دا مو انا .. قلتلها يعني خلاص ما تبغينا نكمل ؟ قالتلي لا ولا تتعب نفسك ..
قلتلها طيب حصل خير ان شاء الله .. انا عرفت جوابي .. مع اني ما توقعت نهايتنا تكون كدا يعني .. بس يمكن خيرة .. والله يوفقك ان شاء الله وتلاقي اللي يسعدك .. وافتكريني بخير بس .. وقفلت

الغريب اني بعد ما قفلت مني حاس باي احساس .. لا حلو ولا سيء ولا شي ..
ما حسيت الا قبل شوية وانا اصلي الفجر فالحرم ..
مادري ليه جاتني ضيقة نفس مو طبيعية .. يمكن كنت توي استوعبت !

انا ماني ندمان الا على شي واحد .. علاقتنا كانت حلوة جدا .. واتعلمت منها حاجات كتير ومستعد اعيدها مرة تانية من البداية حتى لو النهاية كدا .. لاني كنت مبسوط
بس الشي الوحيد اللي نادم عليه .. اني ما كملت مشواري وانو انا اللي متركب الغلط عليه وانا مو غلطان .. وعلى حاجة تافهة .. وانو يعني هيا كانت اول بنت فحياتي .. وكنت ابغاها اخر بنت .. لانو عارف حاقارن بعدين لو سار شي ثاني

ومدري احس جواتي لين دحين في شي ليها .. ومادري لو حيروح ولا لا ..
احس اللي بيننا كان شي فوق الوصف .. شي اعلى من الحب .. يمكن عشان كدا مني مستعد استغني عنها ؟
بس هيا كيف قدرت تطلب الانفصال ؟
والله مادري احس اني ملخبط ومو عارف ايش اسوي ؟
كيف اقول لاهلي واهلها ؟
وهل خلاص يعني انتهى كل شي ؟ وكيف اقدر اتجاوز علاقتنا ؟

معليش لو طولنا عليكم .. بس والله محتاج نصائحكم وارشاداتكم لتجاوز مشكلتي
بانتظار الردود


الموضوع السابق
http://www.66n.com/forums/showthread.php?t=215749

للأسف ما حصلت أي من مواضيعك السابقة وبالتالي ما فهمت مشكلة خطيبتك تماما ....
انت تقول انها ما كانت تبادر وكمان تطنش ... كيف قصدك ؟؟؟

ما الذي ترغب بها أن تبادر به ..قصدي الى أي حد هي بادرت وما حدك الذي انت تطلبه ؟

هل خطبتكم بملكة ؟ يعني عقدت عقدك عليها شرعا ؟

__________________

اخوي هن كلمتين بس معناهن كبير وله معنى بعيد ....تزوج من يحبك ولا تتزوج من احببت....لأن اذا هذي بدايتها ماراح تريحك في حياتك وربما هي ماكان هدفها الزواج الله يستر عليها وعلى جميع المسلمين....والله يعوضك خير

اخوي قو قلبك وعز نفسك واللي هانت عليه خمس سنوات صدقني احطه آخر اهتماماتي..عادي جدآ كلم والدها وقوله الله ماكتب نصيب بيننا..
اذا ماعندك مانع كم اعماركم..؟؟

بيتا2

والله يا ريت لو احد من المشرفين يتكرم ويشوف كيف نقدر نرجع المواضيع القديمة .. عشان توضح الصورة اكتر .. لانو في تفاصيل كثير ما قلتها ..
عالعموم حاقولك باختصار .. انو انا كنت باكلمها دائما وابادر اني اتصل واسأل وزي كدا .. وهيا لا .. ما تتصل الا لما انا اتصل .. وما تسأل الا لما انا اتكلم .. وانا يعني صبرت كفاية .. ويحقلي احس بالاهتمام برضو
وكان لسا ما ملكت عليها .. بس احنا عندنا عادي لو الخطيب كلم خطيبتو زي كدا

نسايم وله

يا اختي والله كنا مرتاحين والحب كان من الطرفين .. وكنت متأكد تماما من هذا الشي ..
وكنا متفاهمين من البداية وهدفنا كان واضح اننا نكون سوا ..
وكل ما بيزيد الوقت كنا بنتعلق ببعض اكتر ..
انا اللي قاهرني .. اني احس محا الاقي اي بنت اقدر ابدأ معاها المشوار تاني ..
لاني قعدت 5 سنين ابني فعلاقتي .. لين ما وصلت المرحلة اللي وصلنالها ..
والمرحلة اللي وصلتها كانت مرة حلوة .. ويعني احس بما اني وصلت المرحلة دي .. محا ارضى باقل منها
وللاسف محا احس بحلاوة المرحلة دي تاني الا معاها ..
بس مدري يعني ليش كانت النهاية كدا ..
احس مني مستعد ابني من تاني

شغموم1

والله يا اخي الموضوع مو بالبساطة هادي .. اتمنى اقدر اسوي زي كدا بس مني قادر والله
انا عمري 23 وهيا 25

ومشكورين جميعا على التفاعل

يمكن خايفه من نظرتك لها بعد الزواج اذا تساهلت عمك قبل الزواج ؟؟
في كثير مواضيع أشوفها من المقبلات على الزواج يسألوا عن نقطة تجاوبهم مع الخطيب وينصحهوم ويحذروهم من التساهل لانه راح ينظر لها نظرة غلط ويصير يشك فيها بعد الزواج .
يمكن طريقتها بعدم المبادرة هي الصح .. احنا كمان عادي الخطيب يكلم خطيبته بس يظل في حدود غير عن البنت اللي أملكت ...الخطيبة ما تتصل هي وتسأل .. عيب .

أشوف كلامها لك وقت انفصالكم وزعلها منك لانك ما تتواصل معها فيه حب منها لك لكنها يمكن دخل الشك قلبها انك راح تتغير بعد الخطوبة وصارت تراقب تواصلك وصارت تمتحن حبك في حال انها ما اتصلت هل راح تقدر على بعدها أو لأ . وشافت انك قدرت على بعدها وبالتالي ما حبيتها كفاية ... مجرد تخمين

ايش كان تبريرها لعدم مبادرتها لما ناقشتها ؟؟
كيف كان تواصلكم قبل الخطوبة ؟؟ كانت هي تتصل وتسأل وبعد الخطوبة غيرت طريقتها معك ؟؟

__________________

يمكن في شي مغيرها؟
طيب قبل لا تخطبها هل كانت تبادر؟
جربت تجلس معها مثلا وتفهم لي هي تتصرف بهالطريقة؟

__________________
يارب عوضني عاجلا غير اجل واجعل ابني شفيعا لنا واحفظ زوجي لي وارزقنا من حيث لانحتسب

بيتا2

لا يا اختي احنا من سنة قبل الخطبة .. واحنا في تفاهم واندماج تام .. كنا واعيين واتفاهمنا على كل شي .. انو لازم نوثق ببعض ونكون صريحين وما نخبي اي شي .. وبالفعل اثبتنا دا الشي .. الى فترة الخطوبة ..
ويعني قعدنا 4 الى 5 شهور مخطوبين كان فيها شوية سوء تفاهم < ما وصلت مشكلة يعني وما افتكر اتزاعلنا اكتر من 5 ساعات عليهم
كنا نتكلم بعدها على طول
واستبعد انها تكون خايفة من التغيير .. لاني انا كنت بادور عليها وباسأل عنها .. وهيا اللي ما ترد عليا .. يعني انا بينتلها اني ابغاها .. بس هيا صدتني ..
وكنا نتواصل بشكل جيد قبل الخطوبة .. كانت ترسل رسائل على الاقل .. سواء جوال او ايميل .. مع انو كنت ملاحظ انها احيانا شوية اني انا دائما اللي ابدأ بالكلام واني اتعب يعني واعمل حاجات .. وهيا يعني تحاول تمشي معايا وتقلدني .. بس ما وصلت لدرجة الطناش زي فالخطوبة

عاشقة الغالي

والله يا اختي انا المشكلة ماادري عنها من 3 شهور تقريبا .. الفترة دي ممكن يكون في شي غيرها .. الله اعلم
وما جربت اجلس معاها لاني كنت اشوف نفسي اتنازلت كتير عشانها .. وابغاها هيا تبادر .. وسرت اتحجج بشغلي عشان ما اسافرلها
واعيد برضو يا ريت احد المشرفين يتكرم برابط الموضوع القديم .. عشان الاعضاء يفهمو الموضوع بشكل اوضح

الأخ الكريم/
أظن أن البنت خلال فترة ابتعادها كانت تضعك في اختبار حقيقي لاكتشاف حبك لها، وهذه إحدى صفات النساء فإنهن يرغبن في التمنع وإظهار الصدود للرجل حتى يستمر في لحاقه لهن.
كأن خطيبتك أكثر نضجاً منك في الجانب العقلي والعاطفي، وفيها نوع من الحدية والقطع مع وجود التعالي في شخصيتها...
هل هذا صحيح؟
:::
أنا متأكد أنك تحبها كثيراً، وحبك لها أكبر من حبها لك.
والبنت متأكدة تماماً من حبك لها فعرفت كيف تستخدم هذه النقطة لصالحها.
ومتأكد كذلك أنها لو اتصلت أو أرسلت لك لو كلمة واحدة ستفرح سائر يومك، وستذهب لبيتها وأنت تغني.
ومتأكد كذلك أنك ترغب بالرجوع لها، وتريد هنا رأياً هيناً ليناً يمسح على جروحك ويحافظ على كرامتك في نفس الوقت.
:::
أنت تعيش صراعاً عنيفاً بين الكرامة وبين الحب، وبين العقل وبين العاطفة.
ولابد أن ينتصر أحدهما أو في أقل الأحوال نجد حلاً وسطاً به أخف الضررين
:::
أنا فهمت منك الآن أن العلاقة تم قطعها، وأن المشكلة تدور حول الطريقة التي تخبر بها أهلك وأهلها بانفصالكما...
هل هذا صحيح؟
إن كان صحيحاً فأخبرنا حتى نشير عليك بطريقة معينة.
:::
إن كنت تريد البنت والرجوع لها فأخبرنا كذلك، ونحن معك في كل الأحوال.

اخي البليغ
ماشاء الله عليك اصبت كبد الشمس في عز الضهر
بالفعل حللت كل اللي حصل .. يا ريت تسمتر معي لاني والله دخلت المنتدى عشان اتنور بالردود اللي زي كدا

كأن خطيبتك أكثر نضجاً منك في الجانب العقلي والعاطفي، وفيها نوع من الحدية والقطع مع وجود التعالي في شخصيتها...
هل هذا صحيح؟
فيها نوع من الحدية .. بس مو التعالي .. تقدر تقول عزة النفس .. وانها تكابر يعني
وبصراحة ممكن هيا انضج مني زي ما قلت لاني انا احبها اكثر منها .. واني كنت اعطيها كل اللي تبغاه .. وكنت اتعب يعني عشان اسويلها حاجات جديدة وما تنمل .. وهي العكس يعني مو الاهتمام اللي مرة بس انو فيه اهتمام < لو كان قصدك كدا يعني

أنا فهمت منك الآن أن العلاقة تم قطعها، وأن المشكلة تدور حول الطريقة التي تخبر بها أهلك وأهلها بانفصالكما...
هل هذا صحيح؟
هو صحيح العلاقة هيا انهتها .. وانا خلاص حذفتها من المسنجر عندي واحنا كنا نتكلم بالبلاك بيري .. حذفتها من جهات الاتصال عندي ..
انا بصراحة مني داري ايش الشي الصحيح اللي اسويه حاليا
من جواتي اقول حرام تضيع 5 سنين عالفاضي .. ومعقول هانت عليها كذا ؟ وكل الاشياء اللي سويناها مع بعض ؟
وافكر اقول كيف حالاقي بنت بنفس الحاجات اللي سويناها مع بعض ؟ احنا خططنا لحاجات كتير .. كيف حاخطط مع وحدة ثانية ؟ احس مرة صعب لان في مجموعة مواقف سارت بيني وبينها هيا اللي خلت علاقتنا بهذا الجمال .. ومستحيل تتكرر مع اي وحدة ثانية ..

هذا كلو جواتي .. اطلع للواقع .. اقول البنت رفضتني ! وخلاص يعني كل شي انتهى هي ما تبغاني ..
وانا اتحملت كتير من الاهانات وكرامتي ما تسمحلي ابدا ارجع اكلمها بعد اللي سوتو ..
واقول خلاص ما بيدي شي غير اني اقبل باللي سار واكمل وربنا يسهل ..

بس هوا هنا السؤال .. اكمل مع احساسي اللي جواتي ؟ ولا اكمل مع اللي حاسو فالواقع ؟
انا محتاجكم تقولولي اي طريق هو الاحسن ؟ والاريح بالنسبالي
منتظر ردك اخي البليغ