بسم الله الرحمن الرحيم

السلام عليكم
كيفكم مع هالبرد

اعزائي انا عندي مشكله وياليت اني القى لها حل الصراحه طفشت والله طفشت بس افكر في هالمشكله

اخواني انا طالب جامعي باقي لي على التخرج ان شاء الله 3 سنوات وتخصصي مرموق

المهم انه فيه احد الزملاء تعرفت عليه بالجامعه من حوالي سنه ونصف او سنتين اعجبتني اخلاقه وطبعه مقارب لاطباعنا يعني تقريبا نفس المستوى الاجتماعي والمعيشي

الصراحه هو له اخت وانا بودي اني اخطبها لكن ما اعرف كيف ابدأ معه الموضوع
مره قعدت اقوله متى نتخرج علشان اتزوج ومن هالكلام ابي اشوف ردة فعله, قالي ياخي اتزوج قلت له انا اوكي يالله زوجني من خواتك ( جس نبض يعني ) خخخخ
قالي والله ونعم فيك نتشرف وسكت ( ما ادري هل هي مجامله او لاء ) السالفه هذي قبل شهر تقريبا

اليوم عزمته مع اثنين من زملائي طبعا زملائي هذولا عارفين الموضوع
وانا والله ماقلت لهم شي لكن هم حاسين فجأه جاء واحد قال محمد ليش ما تتزوج انا سكت ومغصني بطني قلت جابوا العيد الشباب

قال لاخو البنت هاه تزوج محمد قال من عيوني والله يستاهل ومن هالكلام انا انحرجت حييييل وكم مره يكررون السالفه وحنا على الطاوله قالوا ترانا شاهدين مو بعدين تقول ماعندي خوات للزواج
قال لاء ابد ونعم بمحمد
وكل شوي يكررون هالموضوع هو انحرج وانا انحرجت
انا اللي ودي اعرفه هل هذي مجامله و لاء الصراحه ما قدرت افرق

غير كذا بودي افاتحه بس احسها صعبه حيييييل ما ادري شقول له ابي اختك بعد ما اتخرج بعد ثلاث سنوات ( مده مهي سهله ).

والله اني متعلق فيهم بالحيل من اطباع ولدهم ماشاء الله عليه

تكفوووون انصحوني كيف المح له بجدية الموضوع

انتظر ارائكم

طيب احسن حل انك تقول له خطوبه

مادامك طالب شئ بالحلال ليش الاحراج ؟

اتوكل على الله وقله لاني عارفك وعارف اخلاقك اتشرف اني اخطب من عندكم

معليش اضغط على نفسك شويه وكلم انا اعرف انه احراج مره كبير

بس فكر في النهايه انك راح تسعد بالزواج من هذه العائله

لكن قبل ما تكلمه صلي الاستحاره والله يوفقك باللي فيه الخير

__________________

أللهم إنك عفوا كريم تحب العفو فأعفو عنا

اخوي الاحراج قول اني اقدر اتغلب عليه
لكن اللي مخوفني الرفض خصوصا انه باقي لي 3 سنوات على التخرج ان شاء الله يعني ماراح اعلق البنت معي ثلاث سنوات
الصراحه اتمنى اني اطلبها علشان ماتروح مني لكن ما ادري وش الحل

وعليكم السلام ورحمة الله وبركاته

بالنسبه لموضوع الخطبه هذا يعتمد على مجتمعك ومجتمع البنت ,, يعني فيه بعض المجتمعات يخطبون وبقعدون سنين مخطوبين وبعدين يتزوجون ,,, وفيه مجتمعات لا الخطبه وعقد القران والزواج مايتعدي 5 او 6 شهور , اذا انت من النوع الأول توكل على الله وأخطب

وانت باين من كلامك انك مرتاح لهالعائله ,,, فاتح أهلك في الموضوع وشف رأيهم .


بالتوفيق

__________________

مشكوره اخي

بالنسبة لاهلي ماعندهم مشكله

لكن مثل ما انت عارفه عندنا بالسعوديه تقدر تخطب وتجلس مده طويله اذا كانت بنت عمك او خالك لانهم يعرفونك هذا الاغلب عندنا في نجد
لكن هذا صاحبي يعني مافيه علاقة قرابه علشان كذا خايف ما ادري وش الحل

انا اقولك هل بينكم اسلوب اهبال ومزح ولا بس احترام لوبينكم مزح كان ممكن يقول لا لو مايبقى غيره مازوجه ولكن هو مدحك معناه ماهو مجامله معناته مواقف اما اذا كان اللي بينكم احترام وبس ممكن يكون مجامله لانه مايقدر يرد بغير كذا

والله ياختي علاقتنا حلوه بيننا مزح وضحك لكن مو بذاك الشكل الكبير
مدري احسه يحترمني اكثر من زملائنا الباقيين مع ان بعضهم توه يتعرف عليهم

ادعولي الله يجزاكم خير

منتظر ارائكم تكفون لاتبخلون علي

أول شيء امسك زملائك وقلهم لاعاد يكررون الموضوع مره ثانيه ولا يجيبون سيرة الزواج قدامه , وانت لاتجيب لهم طاري هالسالفه
وبعدين رح لخويك وافتح له السالفه , اقعد امدح بالعائلة ووووو حبه حبه لين تخش بالسالفه وقله انك ودك تخطب اخته
اما الـ 3 سنوات صحيح انها طويله لكن إيش اللي يمنع انك تتزوج وانت طالب جامعي ؟!
الله يوفقك وإن شاء الله نسمع خبر زواجك منهم

استخير الله تفاتحه بالموضوع ولا لأ...رأي انك تأجلها و لو ربي قاسمها لك ماياخذها غيرك ابدا

اخي الكريم يمكن هو ماعنده مانع

لكن السبب اللي يخليه مايعطيك كلمه على طول بالموافقه هو وجود من هو ولي امره هو واخته اللي هو والده فاكيد ماراح يكون له كلمه قبل ابوه يمكن يقول لك كلمة موافق تجي تخطب اختي بس اهله لهم رأي ثاني وقتها يكون حط نفسه في موقف محرج وانت تقول اهلك ماعندهم مشكله يعني باقي عليك تقوله ابغاك في موضوع بيني وبينك وتقوله على رغبتك وتطلب منه يبلغ اهله اذا ماعندهم مانع او البنت مو مخطوبه تحددوا موعد وتتقدم انت واهلك وتخطبوها والله يوفقك .

__________________