بسم الله الرحمن الرحيم ،
اكتب لكم هذه المرة مشكلتي ...........
باختصار شديد انا متزوجة من 8 سنوات وعندي بنت وولد وموظفة باداوم يومياً ما عدا الجمعة من ال7.5 صباحاً لغاية 3 الظهر بعد الدوام باجيب ابني من الروضة وبنتي بتسبقني عالبيت ، بعد الصلاة والغدا بابدا من شغل البيت للطبيخ ثم لتحميم الاولاد ثم لتدريس البنت ومعظم الأيام بتطلع عندي حماتي وباضطر اجلس معها مع ان عندي مليون شغلة و احياناً كمان باضطر آخذ شغلي للبيت لأن عملي حساس ومهم للشركة ، طبعاً في طريق عودتي للمنزل أشتري أغراض البيت من سوبرماركت لمخبز لخضار وفواكه للمكتبة ودراي كلين كمان منيح ؟
إذا اردت شراء شيء لي أو للأولاد اشتريه لوحدي وإذا مرضت طبيب الشركة بيكتب لي الدوا وانا باشتريه اذا مرض احد من الاولاد او احتاج طبيب اسنان انا باخذه !! يوم الخميس بازور أهلي باروح لحالي وبارجع لحالي واخواتي مش بالبلد يعني ما عندي زيارات بيت عمي وخالتي بازورهم لحالي بدون زوجي
يوم الجمعة اللي هو يوم راحتي الوحيد استيقظ الساعة 8.30 ولازم احضر فطور منيح للاولاد لانهم طول الاسبوع بيفطروا ساندويشات بعدين بيبدا الشطف والتعزيل والطبيخ واجمالاً باخلص الساعة 3 بتيجي حماتي او انا بانزل عندها وبتغدى وطبعاً كل شغل المطبخ بعد الغدا علي يعني الساعة 5.3 باقعد منيح ؟
طيب زوجي وين ؟
بيفيق بعدي بربع ساعة بيعمل فنجان قهوة وباقعد يشربه ويدخن واحنا بمعركة اللبس صباحاً وهو بيدخن وسرحااان
بنطلع من البيت وبنرجع وطول اليوم ما بيرفع سماعة التلفون يقول كيف هالمعرفة !!!!!!!!!
الساعة 8 بالليل بيتصل تلفون يسال بدكم إشي ؟
طبعاً انا ما بيكون بدي شي لأن النهار خلص!!!!!!!!
بيوصل الساعة 8.3 بيقعد كل يوم نص ساعة عند امه وبيطلع بيقعد له ربع ساعة مع الاولاد اذا لسه ما ناموش وبيقوم بيتحمم وبيصلي العشاء يعني بده ثلث ساعة وبعدين بيجي يتعشى وبعد العشا بيشرب عصير وبياكل حلو اللي نسيت احكي اني لازم اعمله كل ما يخلص من البيت !!!!!
وبعدين بيبدأ دور الأخبار عنده انا وهو بيشوف الأخبار بانعس لأني صاحية من الـ 6.30 وما باقدر افتح عيوني من النعس المهم بانام وهو بيقعد له شوي عالتلفزيون وبعدين اكيد بينام عالكنبة ثم بيقوم عسريره وهكذا دواليك
كل يوم هاي حالنا ليلة خميس اذا نمت قبله بيصير يتحركش في بده اللي بده وبتكون نفسي مسدودة منه وما إلي نفس يقرب علي لاني لا احب برمجة حتى هذا الأمر يوم الجمعة بافيق بلاقيه راح لشغله وما بيرجع غير بعد الصلاة
وكل جمعة لازم مشكلة
مثلاً ما هي هالمشاكل إذا قلت له لو انك تحكي مع تبع المكيف ييجي يصلحه بيقول ان شاءالله بس لو قعدنا قرن ما بيحكي ، لو قلت له خذني عالمول بدي اشتري بلوزة لي كان قال لي اعوذبالله من المولات ومن المناظر اللي الواحد بيشوفها فيها بديش اروح
اذا حكيت له ليش ما قلت لي تعالي نطلع نتغدى بره بدال ما كل يوم شغل كان قال لا حول ولا قوة الا بالله
لي سنة باقول له نشتري علاقة لغرفة ملابس الأولاد ومكنسة كهرباء وهو على قولة ان شاء الله ، اختي سافرت ع دبي ومبسوطة هناك كتير وبتترجى اي حدا يزورها قلت له بدي اروح عندها بالعيد قال لي روحي التذكرة منك وانا باعطيك الف دولار (هيك قال والله على ماأقول شهيد)
رجعت فكرت بالموضوع لقيتها صعبة اروح بدون الاولاد حرام نفسهم يسافروا فبطلت اروح سالني بدك تروحي قلت له مش هاين علي اسافر بدونكم ( بعمري ما تركت اولادي) قال لي انه عنده تذكرتين مجانيتين لدبي والسكن مؤمن عند اختي فبنروح 6 ايام في العيد واحنا بنرجع لهون وهو بيسافر من دبي عالصين هيك قال !!!!!
اتصلت مع مكتب سياحة قالوا لي لازم تحجزوا بسرعة لانه ازمة بالعيد قلت له عصب وصار يؤجل في الموضوع رحت انا سكتت وما فتحت الموضوع
المهم الجمعة الماضية
كالعادة انهد جسمي من الشغل والساعة 3 لسة مش مخلصة شغل قلت له كان عزمتني عالغدا اليوم ما عجبه الكلام
وصار كالعادة يحوقل ويتمتم قلت له شو فيها لو ريحتني يوم بدال شغل كل يوم ، زعل فقلت له انت بدك اياني بس اضحك واحكي معاك حكي فاضي وإذا طلبت شغلة للبيت بتزعل واذا قلت لك شي عنا احنا كاسرة بتاجله وبتأخره اي حكي خارج هذا البيت بدك تسمعه واذا وصل الموضوع لبيتنا واولادننا واسلوب حياتنا ما بيعجبك الحكي وبتصير تمتم وتحوقل
رد علي إنت مفكرة حالك بتخططي وانت ما بتخططي انت بس بدك تقلدي الناس وانت مفكرة حالك بتخططي
قلت له والله انا تاركة التخطيط والتدبير الك ولنشوف شو بتنفذ قال لي انا بديش اعمل اشي وما معيش مصاري اسافر وانت بس بدك تسافري احسن ما حدا يسبقك
انا زعلت كتير من كلامه لي لأنه بصراحة انا التي أقرر له كل شيء في حياته وهو سلبي من يوم زواجنا وبعد ذلك يقول لي انت بس بتقلدي مثلاً بيتنا أنا التي شرت عليه بشرائه وكذلك الأثاث والمطبخ وسيارتي انا وجدتها ولم يبحث هو لي عنها حتى ملابسه يسالني من وين اشتري هذا اذا اشتراها هو لان الطبيعي انا اشتري انا كل شيء للبيت وكانه بيتي لحالي فهو لا يشارك لا بأخذ قرار ولا بالتنفيذ
المشكلة انه لم يراضيني وحتى لم يتكلم معي من يومها صار للموضوع 7 أيام بيحاول يبتسم في وجهي بس أنا باعمل حالي مش شايفاه وقد احضر مصلح المكيف للبيت بغيابي واخبرني عنه واخذنا اشترى للبيت كمبيوتر وانا فكرت انه جابه للأولاد فقلت بركي بيتغير طبعه لكني سمعته بيقول لامه انا الكمبيوتر جبته للشغل
وخلال الايام السبعة هذه اكتشفت انه لا شيء في حياتي وان ما يقدمه لي لا شيء سوى ان وجوده في حياتي يلزمني بالطبخ له يومياً !!!!!!!!!!!!!!!!!!!!!!!!
المال والسيارة والاولاد عندي فما لازمة رجل مثله لا يقرر ولا ينفذ لا يسمع ولا يتناقش وكله مش عاجبه ؟
اليوم عمري 30 ولكن شعوري اني فوق ال50 وجهي وبشرتي تقولان ذلك وطوال الوقت اسمع من الناس بشرتك شاحبة افحصي دمك والهالات حول عيونك واضحة والله لما اشوف صور عرسي ما باصدق حالي ، كيف بعد 10 سنين معه واحنا كل واحد بحاله وانا عايشة عيشة الوحدة هاي بانام وبافيق وباكل وباطلع وباحل لحالي وهو كله حكي*حكي
عنجد ما إلي نفس اروح عالبيت اليوم ولا اشوفه ، شو اعمل ؟

تقريبا نفس تسلسل حياتي
والله فكرتك بتعرفيني وكاتتبه مشكلتي ؟؟؟؟؟؟؟؟؟؟؟

نفس المشاكل
نفس العمر

الاختلاف انو دوامك للساعة 3 وانا للساعة 4
وانتي عندك ولد وبنت وانا عندي 3 بنات

خلص اكيد هاي مو انا


بستنى معاكي اقتراحات الاعضاء وان كنت غير متفائلة بالتغيير

اتعتقدين ذلك عزيزتي Oceandream
يعني لا أمل إلا بالله ؟؟؟؟؟؟؟؟؟؟؟
لماذا يحدث لنا ذلك وصدقي لو لفوا الدنيا كلها ما بيلاقوا زينا ؟
شغل برة وجوة ولأ السيد بدو اياني احمل ؟؟؟؟؟؟؟مش لما تشوف مسؤوليات بيتك اولاً يا سيد والا بكرة بازيد ع حالي مسؤوليات بيبي ؟؟؟؟؟؟؟؟؟

الله يعينك ويبعد عنك الهموم والضيق..

اختي الكريمة....ساكون صريحه جدا جدا معك واتمنى ان لا تتضايقي من كلامي..

عزيزتي باعتقادي ان زوجكِ غير ملام على تصرفاته ولكنكِ انتِ ملامة....فقد محوتِ شخصيته واصبحتِ

انتِ من يتخذ القرارات ويتحمل مسئولية البيت والاطفال بنفسكِ...وهذا ما جعل زوجكِ يحس انه لا دور له

واذا طلبتِ منه عمل شيء ما ...لا يعمله لانه متأكد من انكِ في الاخير سوف تعملينه..

اختي الغالية ...الحياة الزوجية مشاركة ومن حديثكِ اتضح لي انكِ لا تمنحين زوجكِ الثقة الكافية ..ليتصرف

ويخطط او تخططان مع بعضكما في شئون البيت والاطفال وغيرها..

وبسبب انشغالكِ بالعمـل في البيت وخارجه اصبح اهتمامكِ بنفسكِ اقل وهذا بشهادة من حولكِ عندما يلاحظون

تغير شكلكِ....اذا استطعتي عزيزتي حاولي ان تحصلي على اجازة من وظيفتكِ وابذلي جهدكِ في هذه الاجازة.

بتغيير شكل البيت وتغيير مظهركِ واضيفي على البيت جواً فيه من المرح والسعادة والرومانسية..

الروتين اليومي الممل اكبر خطر يهدد استقرار الحياة الزوجية...حاول تغيير الروتين بين الحين والاخر...ولا

تخططي لوحدكِ شاركي زوجكِ التخطيط واتخاذ القرارات وصدقيني ستتحسن الامور..

(( انا ايضا اعمل وعندي طفلين ومسئولة عن اخوتي الـ 7 وهم اطفال لان والداي متوفيان( يرحمهما الله ) ..ولكن

بتوفيق من الله واجتهادي انا وزوجي في حسن التخطيط والتدبير نعيش حياة مستقرة ولله الحمد..))

فابذلي جهدكِ عزيزتي وتوكلي على الله ...فانتي امرأة قويه ما شاء الله ...

مع تمنياتي لكِ بالتوفيق والحياة السعيدة ..

اختكِ.........لمني بشوق

__________________

اختي العزيزة لمني بشوق ن
أشكرك جداً لمشاركتك في الموضوع وأنا أثمن كلامك جداص ولكن دعيني أشرح لك شيئاً في بداية زواجي لم أكن أعمل فقد مكثت بالبيت 5 سنوات وكانت حياتي كالتالي استيقظ الساعة العاشرة افطر والبس الأولاد ثم تزورني جارتي قليلاً بعد ذلك اقوم بالأعمال المنزلية والطهي واغدي الأولاد وأجلس امام التلفاز لغاية الساعة 9 ياتي زوجي من الخارج يستحم وياكل وينام على الكنبة لأن عمله من الـ 8 لغاية الـ8.30 او أكثر وعمله ليس وظيفة بل عمل حر لكن لا يوجد تنظيم للوقت وإعطاء كل ذي حق حقه ويوم الجمعة كان مخصص لبيت حماي لاننا لم نكن مع بعض في ذات العمارة ولا ندخل منزلنا قبل الساعة عشرة ليلاً
ونظراً لانشغال زوجي المستمر ووعوده التي لا يفي بها أصبحت انا اقوم ببعض الاعمال مثل السوبرماركت والخضار لان لدينا اطفال وفي اشياء ضرورية تحتاجينها
احيانا عندما يمرض احدنا اتصل به فيقول لي انا مشغول وما بقدر اطلع هلا خدي الاولاد انت احسن الدكتور يسكر وقبل ما اشتري السيارة كنت كتير اتشرشح بصراحة بالمواصلات!!!!!!!
وكمان انت بدك تعيشي وتاكلي وتشربي وتلبسي وتزوري الناس وتتعالجي لما تمرضي وتوصلي اقاربك وتسالي عن اولادك بالمدارس وحتى ابنك شعره بده حلاقة والولد بده تطعيم ومين بدو يعمل كل هذه الاشياء وانت لحالك وزوجك دوام يومي من الساعة 8 لل 9 شتاءً وبالصيف لل10 والجمعة لحد الصلاة وبرمضان قبل وبعد الإفطار مين غيرك !!!!!!!!
طبعاً انقلت الصلاحيات تدريجياً لي وصار هو يقول لي لما اطلب منه الشيء اكثر من مرة هي الفلوس روحي اشتري او روحي اعملي ويطلع وهو عند حاله انه واجبه أداه
ما وصلنا إليه هو نتيجة طبيعية لسلوكه معنا لو انه تشارك معانا ولقيناه معنا وقت ما احتجناه كان ما صار فينا هيك إذا تلفون بالنهار ما بيفضى يحكي معي مع العلم اني اكتشفت انه يمضي طول النهار بالحكي مع فلان وعلان شو بدك تقولي
حاولت دائما اني امزح واعمل فيه مقالب في البيت ونضحك بس ثاني يوم باقول انا ليش هيك باعمل له وهو مش عامل لي شي
على العموم صار لي 9 ايام ما باحكي معاه وشكلنا اعتدنا الحال ........و الله يعين ويخليلك زوجك اللي واقف معاك واولادك واخوتك ويكتب لك الأجر والثواب