السلام عليكم
بداية انا متملكة من شهرين وبيننا مكالمات مطولة
عمري 21 وزوجي 26
شخصية زوجي حساس بشكل لامثيل له ينجرح ويتحطم بسهولة ويفسر الامور بشكل غلط
يتشره على اخوانه ويسبهم انه محد يساعده ويسأله وش تبي
يزعل بسرعه بس بالمقابل مايطول بالزعل ، سلبي جدا متشائم حزين ،
عادي وانا اسولف معه اضحك وابي اضحكه اتفاجأ يقول اااه الله يعين بس
دقيق ويحاسب على كل شيء
يحبني كثير وباني علي امااال وطموحات
حبه للاسف غير ناضج ، عادي تصير مشكلة عشانه مشتاق لي ولاحصلت فرصه اني اشوفه
ويقول ( انتي ماتحبيني ، انتي ماتهتمين ، انا خليني اموت انتي اهم شيء تكونين مبسوطه ، انتي ماتفهمين للرجل انتي بتذليني وانتي وانتي ) هالاسلوب يدمر نفسيتي جدا اكرهه
يعصب يطول صوته واسكت انا تماما عشان لايطلع مني كلام ولاني احاسب على كل حرف اقوله له
ثم يعصب بقوة ويقول لاتسكتين اكلم جدار انا ! ردي لاتخليني احلف ما اكلمك شهر
مصدومة جدا من شخصيته
ايام الخطبة كنت اشوف صوره ع الانستقرام وكيف دايم مبسووط والضحكة ماتفارقه ، ماتخيلت ورى هالصورة شخص ضعيف هش
كان طموحي رجللل قوي صابر مايعاتب متفائل ، محاور جيد غامض ولو شوي
طموحي رجل اشوف فيه جاذبية وكاريزما
الحمدلله زوجي ملتزم هالشيء يخليني اتناسى الاشياء الثانية يدلعني وقت مايكون راضي ويهديني كثير

اليوم الظهر جيت تعبانه من الكلية بعد اختبار شاق واعتذرت له انه بنام مقدر اكلمك
نمت وصحاني العصر صوته حزين جدا واسمعه يشاهق يصيح
قلت له بسم الله عليك حبيب قلبي سلامتك شفيك ؟ قال مافيني شيء ( بالعادة يفضفض لي ويقوول لي كككل شيء وبالتفصيل بس لاني قبل امس ضاق صدري وتنكدت لانه شايل هم الدنيا ولاني شايله هم اختبار صعب
فقلت له باسلوب حلو انه لو صار عندي اختبار لاتقول لي شيء قال لي اوعدك ماافضفض لك وكانه زعل) عشان هالشيء ماتكلم لي اليوم ، حاولت اضحكه واغير جوه بس مقفله معه ثم قالي قومي صلي وارجع اكلمك
قلت اوك بشرط تقول لي وشفيك قال طيب
قمت صليت ورحت لامي وتاخرت شوي ، جيت والا هو داق 3 مرات كلمته واثاريه معصصصصب
تدرين اني متضايق وشايل هم الدنيا فوق راسي ليش تذليني وتتاخرين ! قلت له امي وكذا
قال انا زوجك ! انا احق بامك ! طيب قولي لي بالواتس عبريني مو تروحين ولااا على بالك زوجك
خليه يموت بكيفه اوعدك اني ماافضفض لك ولا اتكلم لك اتكلم لجدار احسن لي
قلت له اسفه حقك على راسي قال وش تنفع اسفه ! خربتي مزاجي وجوي
انا مصدع ومانمت الظهر بكلمك ثم تنامين والعصر تسحبين علي !
اقوله ياحبيبي ماسحبت عليك انت زوجي حبيبي بس صار امر طارئ وووو
المهم قال خلاص بسكر تبين شيء ، قلت اللي يريحك انتبه لنفسك
خليته وكل يوم انصدم باسلوبه الطفولي اكثر : (
بعدها بنص ساعه كلمني وصار يتأسف ولاتشرهين علي ووو

طبعا لانسى شيء مهم بنشأته
ابو زوجي توفى من كان عمر زوجي 4 سنين ، وتربى على يد حرمه مثل مايقول ، قصده امه
تعرض لظلم من اخوانه من ابوه ، واخوه الاقرب شخص لقلبه توفى قبل مايخطبني بشهر
هالظغوطات والصدمات اللي تعرض لها خلته ضعييف منكسر ، ماقوته وشدت ظهره
يشتغل بمنطقة غير منطقتنا وشايل هم النقل ويسب دايم بالمدير واللي فوقه
شايل هم الزواج واني ماعندي فلوس للسفر والاثاث والشقة ووو ، هالشيء دايم يقوله لي
واحس بتأنيب ضمير اني سببت هالظغوطات له خاصه لما يتنهد ومرات يصيح !
منصدمه كون وضعه الاجتماعي والمادي اقل منا بكثيير واهله يمشي له راتب من الضمان الاجتماعي
ودايم يقول لي بعد ماشاف وضع اهلي ، خليك قنوعه لاتتعبيني اذا قلت لك مقدر لاتحنين على راسي
خايفه جدا من موضوع المادة واحس بنقص : (

زبدة الموضوع كلله
كيف اقوي من شخصية زوجي واخليه مناضل صبور واتحمل فضفضته من غير لايأثر على نفسيتي ؟
يمر احيانا اسبوع ماضحكنا ابد كل المكالمة نكد اخاف هالشيء يأثر على نفسيتي ويخليني كئيبة بعد الزواج لاقدر الله
اتمنى يكون قوي وسند لي
احاول كثيير اعزز من ثقته بنفسه واحسسه برجولته ويستجيب لي احيانا
كيف انسيه النكد وتصير شخصيته مرحه ويضحك دايم ؟ ياااه اتمننى هالشيييي
والاهم من هذا كله الاسلوب والكلمات تهمني بشكل كبير ، كيف اخليه ينتبه لاسلوبه وكلامه
جالسة احاول اخليه ياخذ من كلامي ويكتسب من اسلوبي ولعل وعسى

اعتبر هالفترة مهمه لتأسيس بيت سليم وراقي ، تهمني توجياتكم ونصايحكم