الحركات الصغيرة هي أحلى شي
1) يعني حاول مثلا تلاحظ الأشياء اللي هي تحبه (شي صغير مثلا نوع عصير أو كاكاو) و بين وقت و ثاني فاجأها فيه بس بدوووووون ما تتكلم يعني مثلا حطه لها على كرسي السيارة و لما هي تشوفه انت ولا كأنك مسوي شي
2) افتح لها الباب (أنا أتشقق لما زوجي مدري خطيبي (مدري مع وقف التنفيذ على قولك) يفتح لي الباب
3) اذا وصلتها لبيتهم انتظر لحد ما تطمن انها دخلت (يعني مو ما تصدق على الله هي تنزل من السيارة و انت تدوس بنزين) حتى لو انكم زعلانين من بعض تأكد انها دخلت كذا هي تحس انك تخاف عليها
4) لما تتركها كذا بعد 5 دقايق دق عليها قول لها وحشتيني أو مثلا تصبحي على خير
5) خلال النهار (مثلا لما تكون في الدوام) كل ما تجي على بالك ارسل لها مسج و قول لها (أنا بالنسبة لي المسجات اللي زوجي يكتبها أفضلها 50000000 مرة على المسجات اللي الناس تتبادلها حتى لو كانت مسجات زوجي محاولات شعرية طفولية أستانس فيها لأن أعرف ان هو كاتبها لي بس)
6) اسمعها اذا تكلمت (ترا هذا شي مررررررررة مهم بس للأسف كثير رجال بس يقولون ايه ايه و هم بالهم في مكان ثاني

)
7) إذا كانت طالبه اهتم في درجاتها و كذا يعني اذا عندها اختبار اتصل عليها أو ارسل لها مسج قول لها بالتوفيق حبيبتي و اطلب منها انها تدق عليك تطمنك اذا خلصت
8) اهتم في علاقتك مع اهلها (يعني كون ولد لأمها و أبوها و أخ لاخوانها و خواتها....أنا أستانس لما مثلا أمي تبي تروح مشوار و السواق مثلا مشغول و زوجي موجود و يقول لها أنا أوصلج خالة..أو لما يوعد اخواني بطلعة و يطلعهم و كذا...أو لما يكون مثلا عند أبوي ضيوف هو يستقبلهم مع ابوي كأنه واحد من اخواني)
9) لما تكونون في السيارة و هي سرحانة مثلا امسك يدها و بوسها (إذا قدام الناس ممكن هي تقلب أحمر بس صدقني بتستانس)
10) كون صداقة معها...أدري ممكن هالشي سخيف بس أنا في رايي مرة مهم..أعرف ناس كثير مملكين و متزوجين حتى و ما هم أصدقاء...هو ممكن يعتمد على شخصية الفرد و كذا بس أنا بالنسبة لي زوجي هو أعز أصدقائي و أنا أدري اني بالنسبة له نفس الشي..مو لأننا متشابهين بالعكس بيننا كثير متناقضات بس يمكن هذا هو الشي ان كل واحد فينا يعطي الثاني وجهة نظر هو ما كان شايفها...يعني جد ما أحس بالحرج اني أتكلم معاه بأي موضوع...و هذا يجيبني لنقطة 11) خل القنوات بينكم مفتوحه...يعني بلاها حركات اللف و الدوران و الثقل و مدري أيش (يعني حلو بحدود بس وقت الجد لازم تعرفون ان كل واحد فيكم يقدر يتكلم بصراحة و الطرف الثاني راح يفهم أو على الأقل يحاول يتفهم...يعني مثلا إذا إنت سويت شي يضايقها إذا هي عارفة انها ممكن تكون صريحة معاك و قالت لك انت ضايقتني لأنك سويت "....." إنت إذا سمعتها و بعدين بينت لها موقفك و قلت لها مثلا انك ما قصدت بهالشكل أو إنك سويت هذا الشي كرد فعل لشي هي سوته كذا في النهاية كل واحد يشوف وجهة نظر الثاني و إذا شاف انه غلطان يعتذر و خلاص يا دار ما دخلك شر...عكس لو هي لفت و دارت و مدت لك بوز و توقعت ان انت بشطارتك تكتشف انها زعلانة من شي انت سويته بدون قصد ولا جاء على بالك انها راح تزعل منه..كذا هي راح تضل زعلانه و انت راح تنرفز و تنقلب ليلتكم ليلة غم
هذا اللي جاء في بالي الحين ..... و على فكرة كله تجارب شخصية (يعني مجرب و مضمون

)...إذا تذكرت شي ممكن أضيفه بعدين

و بالتوفيق أخوي و الله يهنيكم