في البداية اشكر جميع القائمين على هذا المنتدى ... ويجزاكم كل خير عن كل فائدة يحصل عليها كل عضو هنا ..
الى جميع اخواني واخواتي بالمنتدى .... حاولت اكتب هالموضوع اكثر من مره وامسحــه . .ماني عارفه وش اكتب ولا كيف اوصف الشي اللي بداخلي .... لاكن اليوم صممت اكتبة وان شاء الله اتوفق ويوصلكم مثل ما اتمنى.... المشكله اني مقدر احكي مشكلتي للي حولي لانهم راح ينتقدوني ويحملوني الذنب..
بداية تسلسل احداث المشكلة: خطبني ولد خالتي وهو نعم الرجل ...وبعدها باسبوع جاني التعيين والحمدلله لاكن بمنطقة تبعد عن اهلي 1000 كيلو ..المهم سافرت واسكنت فيها وعانيت من الغربه الكثيررررر... وبعدها
ب3 اسابيع صارت ملكتي ومرت شهرين والحين الاسبوع الجــــــــأي زواجي ....
المهم في وسط هالزحمة انا صار لي شي غريب انا فقدت الاحساااااااااااااااااس ماعاد شي يهمني ولا أي شي يبسطني او يفرحني وصار عندي تبلد وهذا والله مو طبعي ابداً .. .. كل شي صار عندي عادي ..عادي ... وكل هذا انعكس على طبيعة علاقتي بخطيبي ... احسه راح ينظلم معاي.. بصراحة ماني عارفه ايش اكتب ..مشكلتي ماني عارفه وش فيني؟؟؟؟ انا في حيرة من امري مافي أي احساااس اتجاه خطيبي .. يعني لا احبه ولا اكرهه ... ولا احس باشتياق او شوق اتجاهه ... ومايهمني اذا اتصل او لا ..بعض البنات لو ما اتصل عليها خطيبها يوم تجنن ..اما انا لو يغيب سنه عادي ما تفرق معاي... ولا اسال .. اقدر اقولكم اني انساه يعني قربه وبعده عندي عادي... ولما يتكلم معاي اغلب كلامنا يكون رسمي وعن الاهل ولا يكون عندي فضول اساله ايش يحب او ايش يكره .... واذا زارني تلقوني اتملل وانتظر متى يطلع على الرغم انه مازارني الا مرتين بسبب ظروف عملي وماعندي اجازات اقدر انزل فيها مدينتي..وكمان هو مدينة ثانية يعني الرجال متعني ونازل عشاني ..
بس والله مو طبعي كذا متغيره مدري وش اللي صابني وش هالقسوه ....مدري... . احس ان هالشي غريب عن كل البنات اللي المخطوبات هم وعرسانهم فعلاً باين عليهم الفرح اما انا !!!!!!!!..
ما احس اني فرحانه لاني عروس مثل كل بنت.. بجد مافيني فرحة العروس.. اقول دايماً هذي جنازة مو زواج. احس بهم ونكد وحزن فضييييييييع وكل يوم يزيد والود ودي هالزواج مايتم بس بداخلي في شي يردني ويقولي انه عريس مايتعوض وصفاته كل البنات تتمناها وفوق هذا كله يحبني ويتمنى رضاي وعارف ظروف عملي وموافق ومشجع... على رغم بعدي عنه ... احس اني ما استاهله هو في الشرق وانا بالغرب. اخوي يسألني وهو مقهور مني ليه ماساله عن خطيبي بما انه صاحبه ويعرفه زين يقولي احسك مغصوبه واذا فعلاً انتي كذا ليه ماتتكلمين...بس انا ماني مغصوبه انا احس نفسي مثل اللي يدفع نفسه دفع مايدري وين راح يوصل في النهايه ومحل ما يحطونه الناس بيجلس .واتمنى ان هالزواج يتاجل يصير فيه أي شي .. ..والله مدري وش فيني عمركم شفتوا عروس مو متحمسه لزواجها تصدقون حتى استعداد مافي يعني لما جهزت ..جهزت أي كلام مو مهم عندي اذا حلو او لا ...
والله ماكنت كذا.. مدري وش اللي صار طول عمري معروف عني اني احب الفرفشه والمرح اما الحين صار العكس... اول معروف عني انسانه رومانسيه لابعد الحدود وحساسه اما الحين العكس لما جا وقت الرومانسيه تبلد مشاعر ماعمري شفت مثله...نفسي اعرف وش اللي قلب حياتي ...تدرون بعض احيان ادور لنفسي الاعذار... واقول امكن انا ماثره علي الغربه والتغيرات اللي صارت بحياتي وبسرعه جات ورى بعض ما خلتني استوعبها ..فخلتني اعيش بقلق....واقول امكن ماني فرحانه بعرسي لانه برضه حياة جديده ضمن المتغيرات اللي صارت وشايله همه...مدري كل اللي اعرفه الحين ان هالاحساس مو طبيعي ابداً خايفه انه ياثر على حياتي اللي مابدت لسه ... وكوني اني مو فرحانه بعرسي مسبب لي قلق بعض احيان اقول لايكون هالزواج مو مناسب ولا هالرجال فيه شي وهذا احساس وتنبيه من الله يبيني اتراجع ...وعشان كذا حاسه بحزن...
ياليتكم تفسرون اللي انا فيه وش يطلع وهو طبيعي ولا لا وليه ماني فرحانه مثل باقي البنات بعرسي...ادري يمكن احد منكم بيقول والله ماعندها سالفه لاكن وربي..هالموضوع وهالاحساس ارهقني وسالب تفكيري وحارمني النوم..وقالقني بحياتي....والله اعلم.
ادري طولت عليكم اسفه.. . ولو ودي اكتب اكثر لاكن بوقف واترك لكم الرد


اختكم... تــــرانيم

نقل الى عالم المقبلين على الزواج

والله مادري شواقولج

غير الله يعينج يارب

واسمحي لي

__________________
" اللهم اني اعوذ بك من الهم والحزن "



(( ربي أشرح لي صدري ويسر لي أمري ))

السلام عليكم اختي ترانيم
بالنسبة لموضوعك, انا اواجة نفس المشكلة مع بنت عمتي. حيث انو كان في حب متبادل بيننا و نظرا لظروف معينة ماقدرت اكلمها و كانت جدا رومانسية و تهتم فيا و بعد فترة صارلها نفس الي صرلك و كانت تقولي مااعرف ايش صارلي صارت ما تهتم, تقولي احيانن احبك و احيانن مااحس, الصيف الي فات اتقدمت لخطبتها وكان جميع الاهل موافقين بس هي رفضت, بعدها بفترة لاقيتها على المسنجر و بعد كلام قالتلي انها ندمانة, سألتها ايش فيكي و ايش صار بس ماتدري, هي تدرس طب اسنان و انا ادرس في الخارج. نفس ظروفك. اما ما ادري هل هي عيون او حسد و ارجو من الاخوان و الاخوات الي عندهم خبرة يساعدونا و جزاهم الله خير إن شاء الله. ابغا اسالك يااختي اذا انتي كنتي من النوع دا ( انو كنتي رومانسية و و فجأة تغيرتي)

اختي
اجلسي مع نفسك وفكري باسلوب جاد بعض الشي ........
هل هذا الرجل هو ماتمناه فعلا ؟
هل هذا الوقت مناسب لارتباطي بهذ الرجل المناسب؟
ترا مالافكار السلبيه الي تراودني عن هذا الشخص ؟
والافكار الايجابيه الي تساعدني للانجذاب لهذا الشخص؟

وبالنسبه لحالتك اختي معروووووفه ومنتشرة بكثرة وتفسير الحاله انه عند التعرض لمتاعب ومصاعب كثيره وتحمل هموم الحياه لفتره دون سابق انذار تتبلد الاحاسيس نظرا لارهاقها

وافضل علاج هو نسيان الهموم وخاصه هموم الغربه وحاولي تطلعي مع خطيبك اماكن للترفيه مثلا ملاهي او مطعم فاخر وغيري جو كل يوم لفتره لا تقل عن شهر وستجدي نفسك تعودتي على عالم جديد بعيد عن تجمد الاحاسيس والكدر والهموم

تحيــــــــــــــاتي

معلوم أن كثرة المساس تقلل الإحساس وأنتي مساسك هنا ليس بخطيبك بل بمصاعب الحياة
سفر وغربة عن الأهل وملل وعمل لا أهل يتقاسمون معك المشاكل ويمكن أن تكوني بلا صديقة تسرين إليها وتسر إليك لهذا قلت احساسك بلآخرين فكان الضحية الخطيب المسكين
1 ـ اتركي التفكير في الموضوع
2 ـ فكري في الزواج والعيش بعده
3 ـ ضعي أمامكي ورقة واكتبي مميزات زوجك جمال رقة منصب غيره
4 ـ اكثري من ذكر الله فإن مع ذكر الله تطمئن القلوب
5 ـ اكثري من الدعاء في االليل

اشكـــــركم جمعياً على مروركم على الموضوع ومشاركتكم مشكلتي...
( البتول, روحي حزينه, boodi , froto, القويع )

اختي روحي حزينه..

اسعدني مرورك وطلتك تفرحني حتى لو ما كتبتي شي..
اخوي...boodi

نعم انا رومنسية بطبعي لاكن الحين تغيرت ماكاني انا ... ولما اشتكي لصحبتي المقربه لي باللي صايرلي الحين تقولي الا انتي ما اتوقع انك تكوني بعيده عن الرومانسيه لو وحده ثانية ممكن ... اذا هي مو مصدقه اجل انا شاقول؟؟؟؟

اخوي ..froto
هل هذا الرجل هو ماتمناه فعلا ؟ والله مدري ماعمري حطيت ببالي صفه معينه لرجل المستقبل؟؟؟؟
هل هذا الوقت مناسب لارتباطي بهذ الرجل المناسب؟ عندي احساس انه مو الوقت المناسب وهذا بسبب اللي حاسه فيه الحين من جفا وقسوه اتجاه خطيبي ..بجد انا بحيره...
ترا مالافكار السلبيه الي تراودني عن هذا الشخص ؟ صدقني ولا شي كأني لاغيته من تفكيري حاولت اجاوب على هالسؤال لاكن بلا فائدة!!!!
والافكار الايجابيه الي تساعدني للانجذاب لهذا الشخص؟ انه رجل بمعنى الكلمه ويحبني وكثير يقولولي ان هذا يكفي

احس اني مشتت التفكير بجد؟؟؟

اخوي القويع...
مسالة اني اترك التفكير بالموضوع حاولت بس مقدر بمجرد ما ابي انام احس عقلي بدا يشتغل ويفكر وبالتالي اهرب واحاول اشغل نفسي باي شي لاكن عبث مافي فايده والله اني ادعي ربي كل دقيقه انه يلهمني ويهدي بالي ... الله يعين

اليوم اتصل وكلمني خطيبي وطول المكالمه انا ساكته مافي كلمة طلعت مني غير مع السلامه ..حاولت اشارك باي شي ولو افتح موضوع ماله معنى بس اتكلم ... ابد ... صمت تاااااام!!!!!!!

الاخت ترانيم ............انصحك نصيحة مجربة(الغربة )تقتل احيانا الجمال بداخلنا لكن لاتستسلمي لهذا الاحساس فانا مررت به حتى اني اجلت فكرة الزواج كثيرا الا ان فرض علي الامر الواقع (الزواج)وقتها الشخص الوحيد الذي شعربي وكان عوني في الغربه والحياة هو زوجي (اللَه )لايحرمني منه..............عزيزتي أطردي هذه الافكار من راسك وقبلها استخيري ,واذا كان زوج صالح فتمسكي به وعودي كما انت واجعلي حضنه هو المكان الامن الذي تلجأين له من هموم الحياة...........................الله يوفقك في حياتك.

مع مشاكل الحياة و عدم وقوف الاهل بعض الاحيان خاصة إذا كانت الفتاة هي من سوف يتزوج يكون سبب من الاسباب الى حدوث هذة الاحاسيس المتبلدة لدى معظم الفتيات.... انا بالنسبة لموضوعي مع بنت عمتي( هي تقول انو ماصارت تعرف نفسها و انها ماتدري , قي نفس الوقت تبغاني زوج لها بس تقولي في نفس الوقت مااضغط عليها مع العلم اني انا ما ضغط عليها, انا الصيف الي فات تقدمت لخطبتها لكنها رفضت و بعدها قالتلي انها ندمانة, اخواني واخواتي لااادري هل من الصح اني اتقدملها مرة تانيا اذا هي اتقبلت الموضوع, ولا مايصير عشان لاتحس البنت اني رامي نفسي عليها... انا احبها و اتمناها زوجة ليا لاني الرا فيها الزوجة الصالحة بس المشكلة انها بتمر بنفس ظروف اختي ترانيم الي هيا تبلد في الاحاسيس مع انو هيا ماكانت كدا, هل تتوقعو انها تكون عين ولا تكون ضغوط الحياة بسبب دراستها للطب. مني عارف كيف اقدر ارجعلها احاسيسها زي زمان و افكها من الضغوط الي هيا فيها... اخواني و اخواتي الرجاء ممن لديه الخبرة ان يتفضل عليا و يقولي ايش ممكن اسوي وادعولي انة ربنا يلين قلبها و ترجع تحبني زي زمان.. جزاكم الله خير... مع العلم اني انا اعيش في غربة بسبب الدراسة. و البنسبة لكي اختي ترانيم انصحك نصيحة لوجة الله إاذا كان خطيبك يحبك مرة وانتي حاسة انو مستحيل تلاقي زيو لازم تقدري النعمة الي اعطاكي هيا ربي و تحافظي عليها لاانو في هادا الزمن صعب انو الواحد يلاقي حب طاهر و صافي و يلاقي احد يحبو.. اتركي هموم الدنيا و قرفها و عيشي حياتك و إن شاء الله ربنا يلين قلبك لحب خطيبك و تصيري تحبي اكتر ماهو يحبك.. عليكي بالدعاء باان الله يثبت قلبك و يلينو و إن شاء الله كل شي يصير تماام و تحسي بخطيبك.. بس فكري في حياتك الجايا, ولاتنسينا من دعائك يااختي...

اختي مهــواي...
اشكرك كثير على نصيحتك واللي بالتاكيد راح احطها في عين الاعتبار ... والله يعطيك العافية بينتيلي ان في احد عانى مثلي من التشتت اللي انا فيه الحين ....

اما اخوي ...boodi

اتمنى اخوي انك تعطي بنت عمك فرصة اخرى ... طالما هي تحبك وانت تحبها ... صدقني اذا هي تمر بنفس ظروفي .. ترى والله ماهي عارفه ايش قاعده تسوي .. تلقاها بتخطي خطوات بدون حساب ..اوقف جنبها وساعدها وبين لها انك حتكون معاها وفاهم الظغوط اللي عليها ... خليها تعرف انك معاها بكل الاحوال ..هذا راح يساعدها كثير .. وطيب منها انها صارحتك باللي بداخلها هي احسن مني انا ما اقدر اقول لخطيبي احساسي اخاف اجرحه وهذا اللي ما ابغاه...
اخطبها واغمرها بحنانك .. وخليها تحس انك جنبها وبعدين في فترة خطوبه وهذا راح يساعدكم انتو الاثنين ... وبعدين مافي شي اسمه انت رامي نفسك عليها ..البنت قالت لك انها ندمانه .. مو صح

الله يوفق الجميع اشكر لكم مروركم..