بسم الله الرحمن الرحيم
السلام عليكم ورحمة الله وبركاته
لأول مرة يااخواني واخواتي اجد نفسي مضطرا للأفصاح
عما يجتاح كياني لأن الكاس قد امتلأت وفاض بها مافاض
لم اعد قادرا على الصمت فقد حان الوقت لأفجر مابداخلي
ولثقتي فيكم يااعضاء كتبت فأليكم حديثي الذي أردت
عذرا سأضع رداء اللغة الفصحى وسأكتب بالعامية
أنا شاب عمري فوق الثلاثين سنة موظف بوظيفة مرموقة ومنصب كبير
يغبطني عليه الكثير ولله الحمد والمنة الى جانب عملي الخاص
ماينقصني شئ غير الاستقرار في حياتي والبحث عن زوجة صالحة
تسعدني وبصراحة اهلي كثيرمادلوني على ناس وكلمتهم رسميا وصارت
الرؤية الشرعية لكن والله العظيم ماحركوا فيني ساكن بالرغم ان الله
منعم عليهم بالجمال الشكلي لكني ماارتحت ابدا اضافة الى اني ماكان لي شروط
خيالية يكفيني دينها وخلقها اما شئ ثاني لاوالله دائما اقول الله ابدع في
خلقه وكل شخص لايخلو من مسحة من الجمال
قلت اجل انا اللي بتولى أمري وبأبحث سعيت لنفسي لين لقيت
بنت الحلال وعرفت عنها الكثير وعن اسرتها
والحق والله يقال من أسرة محافظة جدا جدا ومن حمولة طيبة
ابوها على الرغم من مرضه مايترك ولاصلاة بالمسجد
امها تدرس بتحفيظ القران الكريم وتحفظ كثير من الاجزاء
اخوانها واخواتها ماعليهم كلام من ناحية الدين وكلهم متزوجين
بقى هذا البنت هي آخر العنقود مثل مايقولون
قبل ماابدى بأي خطوة رسمية خليت وسيط بيني وبين البنت
عشان اعرف ردة فعلها وهل انا مناسب لها من الامور اللي
تعتبر بمثابة جسر العبور للحصول على المطلوب لأنكم عارفين
كل بنت ولها نظرة للفارس المنتظر صار فيه توافق كبير بيني وبينها
في امور كثيرة عرفت عنها تقريبا اغلب الامور اللي احس انها كفيلة
ببناء أسرة سعيدة بعد توفيق الله فعلا ايقنت حينها أنها
انـثـى بـكـيـان طـفـلـه
بديت بترتيب اموري وتوكلت على الله وفاتحت أهلي بالموضوع
فكانت الصدمة اللي حقيقة ماتوقعتها ابدا الرفض طيب ليش
وش السبب ؟؟؟؟؟؟؟
ماتتخيلون وش كان السبب مو لأني أنا اللي بحثت عنها وماكان لهم
يد فيه لا ..............
لأنها مو قبيلية وهذا الشئ يعتبر عيب كبير فيها طيب دينها خلقها وين راحت
لهاالدرجة صار النسب اهم من الدين !!!!!!!!!!!!!!
صحيح أن النسب فخر لكن الدين علو وعزة
تصدقون ان خوالها من قبيلة معروفة جدا لكنهم آثروا الدين على النسب
حتى وحدة من اخواتها متزوجة قبيلي ...!!!!!!!
الـــمـــهــم
صار نقاش طويل عريض بيني وبين اهلي اقدر اوصفه بأنه كان هادئ
نوعا ما لأني اهلي من الناس اللي هادين في نقاشاتهم مو من النوع اللي يعصب
ويرفع صوته وقتها حسيت بغصة في حلقي لأني ماعمري طلبت من أهلي شئ
وهذا المرة الأولى اللي اطلبهم حتى لما بحثوا لي كان من نفسهم مو
انا اللي طلبت منهم
تعلق قلبي بها أكثر واكثر ماينقصها شئ غير القبيلة
تعبت كثير واحس عقلي شل عن التفكير كل يوم اقول ان شاء الله
بتييسر الامور وبيوافقون فكرت بطريقة اقنع اهلي فيها لكني مالقيت
والقهر ان اهلي كلهم عارفين اني لازلت ابغاها ومتمسك فيها ولاحركوا ساكن
ابغى الحلال مع زوجة صالحة تعفني عن الحرام خصوصا اني كثير مااسافر عشان
عملي الخاص
على فكرة عشان تعرفون تناقض مجتمعنا احد اقاربنا متزوج اجنبية وانا والله
ماانتقص منهم لكن وقتها ليش مافكروا بالقبيلة ولما تكون بنت البلد يكون امر ثاني
عموما اتمنى من كل شخص قرأ مشكلتي انه يدلي برأيه ويدلني على
طريقة اقدر اقنع اهلي بها ويوافقون
أو على الاقل يدعي لي بظهر الغيب فهي والله دعوة لاترد بأذنه سبحانه
رجاء ماابغى الموضوع يآخذ منحنى آخر غيرحل المشكلة اوبمعنى اصح محاولة
للوصول الى الحل ؟؟؟؟؟؟؟؟؟
06-11-2005, 07:13 AM
ضوابط المشاركة
العرض الشجري