دعاوى للفرح - منتدى عالم الأسرة والمجتمع

23-08-2005, 04:23 PM

princees

من كبار شخصيات المنتدى

تاريخ التسجيل: Mar 2005

المشاركات: 2,815

دعاوى للفرح

النهارده الموضوع لذيذ قوي وبصراحة أنا شخصيا مستمتعة وأنا باكتبه لأن كله حركات وأفكار وافتكاسات وألوان وحاجات ومحتاجات...

يعني هنتكلم عن كروت الفرح بس كالعادة هيكون فيه حاجات جديدة ومبتكرة ومختلفة، وكمان هنتكلم عن هدايا ممكن تقدميها للناس في كتب الكتاب أو في الفرح نفسه، وبرضه هتكون حاجات مختلفة وجديدة...

تعالي حتى شوفي بنفسك..

يا محلا الاختلاف

نبدأ كلامنا عن الهدايا اللي ممكن تتقدم للمعازيم وخصوصاً وإنها ممكن تاخد وقت شوية في التحضير..

وحكاية الهدايا دي ظهرت بقالها فترة، الأول بدأ يبقى فيه أفكار جديدة لتقديم الشيكولاتة في كتب الكتاب، وبعدبن بدأ يبقى فيه كمان هدايا بسيطة بتتقدم للضيوف علشان تفكرهم بالزفاف.. يعني هدية تذكارية..

واللذيذ في الموضوع إن بعد انتشار الحكاية دي بدأت تظهر أفكار بجد جميلة وفعلاً موثرة، والألذ بقى إن من الأفكار دي حاجات ممكن تتنفذ بمنتهى السهولة وحاجات كمان ممكن تجيبيها بسعر معقول... شكلي كده شوقتكم.. كفاية..

تعالوا بقى نتفرج سوا....

يا محلا الرومانسية

دي فكرة بسيطة جداً بس في نفس الوقت تحسي إنها خاصة جداً وخصوصاً وإن اسمك إنت والعريس وتاريخ الفرح هيتكتب عليها...

والمطلوب ببساطة قوالب شمع، ودي بقت منتشرة في كل حتة في مصر.. والأكواب الصغيرة دي وبرضه هتلاقي منها في كل حتة ومش هتكون غالية لأن حجمها صغير ومن الزجاج العادي جداً يعني مش كريستال لا سمح الله ولا حاجة..

أما بقى الكتابة اللي عليها فدي ممكن تتعمل بطريقتين يا إما عن طريق الطبع بالليزر وده هتلاقيه في مطابع موجودة في منطقة اسمها "درب البرابرة" –منطقة جنب العتبة- أو ممكن كمان تكتبي الكلام عادي على الكمبيوتر وتطبيعيه على ورق "استيكرز" والورق ده هتلاقية عند أي مكتبة... وبعدين تقصيه وتلزقيه على الكوباية عادي خالص وفي منتهى البساطة...

يا محلا الشيكولاتة

دي فكرة لذيذة جداً لأن الموضوع فيه شيكولاتة وطبعاً مفيش اتنين ممكن يختلفوا على إن الشيكولاتة ألذ حاجة في الدنيا..

والجديد في الفكرة دي إنك مش هتوزعي عينات الشيكولاتة -الصغيرة اللي الواحد بياكل منها أربعة علشان يحس إنه يدوب داقها– لكن هتوزعي قالب كامل من الشيكولاتة وملفوف بورقة عليها اسمك واسم العريس وتاريخ الفرح..

وده برضه تنفيذه مش صعب يمكن الشيكولاتة تتكلف شوية على حسب نوعها.. لكن الغلاف مش هيتكلف كتير. المطلوب منك إنك تعملي تصميم بسيط زي اللي في الصورة وتكتبي على الوش اسمكم والتاريخ، وعلى الضهر تشكري الناس إنها حضرت وبعدين تلفى الورقة على الشيكولاتة وتلزقيها وخلاص على كده...

في حالة لو عايزة توفري شوية فممكن تستخدمي الحجم ده من الشيكولاتة وممكن كمان بدل ما تقلقي نفسك في عمل تصميم خاص ليكِ... فممكن تجيبي صورة جاهزة ليها علاقة بالزفاف وتطبعيها على الغلاف بتاع الشيكولاتة وممكن بقى لو عندك شوية فراغ إنت والعريس ياريت بقى تمسكوا الشيكولاتة واحدة واحدة وتكتبوا عليها أسماءكم بإيديكم.. ده هيضيف شيء من الخصوصية على الموضوع..

وكمان ممكن تستغلي نفس الفكرة بتاعة الشيكولاتة دي كنوع من أنواع التنظيم في القاعة، يعني كل واحد داخل القاعة ياخد معاه شيكولاتة مكتوب عليها رقم الترابيزة بتاعته.. يعني يكون فيه خانة لاسم المعزوم وخانة لرقم الترابيزة وبرضه يبقى عليها اسمك واسمه وتاريخ الفرح...

يا محلا الملاحظات

دي برضه فكرة بسيطة جداً عبارة عن نوتة صغيرة عادية خالص بس مطبوع عليها من بره اسمكم وتاريخ الفرح وبرضه الطباعة دي موجودة في أي مطبعة في الدنيا.. وطبعاً الهدية دي هتفكر الضيف دايماً بالفرح كل ما ييجي يدون ملاحظة ولا حاجة...

يا محلا الحلويات

دي فكرة شكلها مختلف جداً.. عبارة عن جرادل صغيرة مرشوشة بألوان زاهية مختلفة وجواها بونبون ملفوف في قماش اسمه "تُل" ومربوط بشريطة ساتان.. الجرادل ممكن تلاقيها في المحلات وفي منطقة اسمها "الرويعي"، والدوكو اللي بتترش بيه موجود عند بتاع البوية، والتُل موجود عن الخردواتي، والبونبون هتلاقيه عند الحلواني..

دعوة مفتكسة

ننتقل دلوقتي لدعوة الفرح
ونقول إنها طبعاً مهمة جداً ولازم تفكري فيها قبل الفرح بفترة مناسبة وخلي بالك ساعات كتير ممكن تنسي إنك تدعي أشخاص مهمين جداً، وطبعاً ده ممكن يسبب لك مشاكل كتيرة...

علشان كده حاولي لما تيجي تكتبي أسماء المدعوين ماتكونيش مشغولة بأي حاجة تانية، وتكتبي إنت لوحدك والعريس يكتب لوحده، وبعدين تقعدوا مع بعض علشان تراجعوا الأسماء، وتفكروا بعض بالأسماء اللي ممكن تكونوا ناسيينيها وبرضه للاحتياط خلي معاكِ دايماً ورقة تكتبي فيها أي اسم تفتكريه في أي لحظة..

نتفرج بقى على شوية أفكار مختلفة لدعوة الفرح...

دعوة للمغامرة

الدعوة دي من الدعاوي اللي أول ما تشوفها هتتخيل واحد واقف على شط جزيرة مهجورة وبيحدف في البحر زجاجة فيها رسالة طلب للنجدة.. بس الحقيقة بقى إن دي تقليعة جديدة من تقليعات دعاوي الزفاف.. وبتكون عبارة عن زجاجة زي اللي في الصورة دي وجواها ورقة قديمة مكتوب عليها دعوة الزفاف وملفوفة ومربوطة بخيط عادي، وبتتملي الزجاجة بأي حاجة زي مثلاً ورد مجفف أو شوية زلط ملون أو حتى شوية خرز.. الفكرة بسيطة وتنفيذها سهل قوي... لأن الورق القديم هيطبع في أي مطبعة والزجاج موجود في أي حتة في البلد ونفس الكلام بالنسبة للخيط...

دعوة يدوية

كنوع من أنواع التجديد فبدل استخدام الورق في الطباعة ففي الدعوة دي الدعوة بتطبع على قماش مش ورق وكمان مش بتطبع دي بتكتب بخط اليد عند الخطاط بألوان القماش... أعتقد إنها فكرة جميلة وكمان شكلها قيم وهيبان إنك باذلة مجهود فيها.. وطبعاً ممكن تنوعي في ألوان القماش اللي هستخدميه وكمان ممكن تزودي شرايط من الساتان أو التطريز أو تشتريه قماش مطبوع عليه أصلاً بدل ما تدفعي فلوس زيادة للخطاط علشان يرسم كمان، يعني ممكن تخلي الخطاط يكتب الصيغة بس وتقومي إنت بتزيين قطعة القماش...

شوية رفاهية

ممكن الدعوة دي تكون مستفزة شوية علشان شكلها مكلف.. لكن هي مش مكلفة ولا حاجة بس محتاجة منك شوية مجهود في إنك تلاقي واحد بتاع زجاج ابن حلال تعرفي تفاصلي معاه علشان تجيبي سعر حلو... وطبعاً والحمد لله ولاد الحلال كتير.. وكمان بتوع الليزر اللي هيحفروا الكلام على الزجاج برضه كتير.. بس فعلاً الدعوة دي محتاجة مجهود شوية بس..

دعوة إليكترونية

دي بقى فكرة ممش مكلفة خالص ولا فيها أي مشاكل وتنفيذها سهل جداً كل المطلوب إن يكون عندك حد بيعرف يشتغل على برنامج PowerPoint ويعمل لك عرض بسيط كده بتظهر فيه مجموعة من الصور ليكِ وللعريس من أيام الطفولة لغاية الفرح وبعدين نص دعوة الزفاف وبعدين يطبع ده على CD وتطبعي غلاف لطيف ليها وبس على كده.

دعوة ع الحيطة...

تخيلي تروحي تزوري صاحبتك بعد 10 سنين من زواجك وتلاقي دعوة فرحك متعلقة على الحيطة...؟ والله هيكون شيء لطيف.. الموضوع ببساطة هو إنك تطبعي الدعوة عادي خالص بس تتحط في برواز لطيف.. وخلاص على كده..

__________________

التعديل الأخير تم بواسطة princees ; 23-08-2005 الساعة 04:30 PM

23-08-2005, 04:25 PM

princees

من كبار شخصيات المنتدى

تاريخ التسجيل: Mar 2005

المشاركات: 2,815

أكتب إيه في الدعوة؟!!

الكلام في الدعوة بقى تقليدي جداً والناس عادة بقت بتبص على الأسماء وخلاص.. علشان كده بدأت تظهر بعض الأفكار الخاصة بصيغ الكلام اللي في الدعوة زي مثلاً الصيغ دي:

دعــــوة(1)

عندما ترسم شمس الأصيل لوحة الشروق الجميل على صفحة السماء إيذانا بدخول يوم-------- الموافق --/--/2005
تنطلق أضواء الفرح والسعادة لتملأ صالة ------ بفندق -------
بقدوم عروستنا --- ثم يزداد الفرح عندما تدق الدفوف معلنة وصول عريسها -----
وتزداد الصالة بأبهى صورة بتشريفكم حفلنا؛ حيث ينشر الفرح والمحبة ويطيب الحفل
في تمام الساعة -------
ملاحظة: جنة الأطفال منازلهم فنوما هنيئا

دعـــــوة(2)

مع غروب شمس يوم الموافق ---------- تعم البهجة وتنير الفرحة أرجاء البلد وذلك بمناسبة زفاف ابننا الشاب ------ على كريمة ----------- وستبدأ مراسم الزفاف إيذانا بوصول العروس لتزف إلى عريسها لتنير ساحة قاعة--------------وسط فرحة الأهل والأصدقاء.
ونزداد فرحاً بتشريفكم لنا وتناول طعام العشاء
والعاقبة لديكم في المسرات..

دعــــــوة(3)

في ليلة من ليالي البدر تزداد أمانينا ويحلو اللقاء في صـــــــحبة أهالـــــينا
فيا أحباب زورونا ليله من ليالي--------- تشـــــع تهانينا
تزف شموع موكب عــــــــــروستنا ------- علـى الشاب ------- عريـــــــــس ليلتنا
في------ من ---------- تقـــــــام حفلتنا بصالة ---------- تـــــــــتلألأ فرحتنا
ويا من بكل الحب شارك مســـــرتنا فبوجودكم تطيب بهــــــــــــــجة مودتنا
ولكم من ----------- والد عـــروستنا ومن --------- والد عريسنا
شرف الضيافة وأهلا بمن لبى دعوتنا

بس خلاص كده... ده كلامنا عن الدعاوي والأفكار والحاجات...أتمنى تكونوا كلكم بتستفيدوا من الأعداد دي عن العروسة... يعني لو كنتِ مش عروسة فاعملي حساب المستقبل... ولو كنتِ اتجوزتِ خلاص فبرضه خدي فكرة علشان تفيدي البنات اللي حواليكِ... ولو كنتِ عروسة يبقى خير وبركة... المهم بجد أتمنى تكونوا بتستفيدوا وكمان أتمنى إنكم تشاركوا برأيكم دايماً ....

مستنين كلامكم

__________________

23-08-2005, 04:43 PM

سيدرا

كبار شخصيات المنتدى

تاريخ التسجيل: Mar 2005

المشاركات: 1,590

جميل جدا جدا

أقول إيه أكتر من كدة بس الأفكار حلوة وخطيرة

__________________

23-08-2005, 08:05 PM

princees

من كبار شخصيات المنتدى

تاريخ التسجيل: Mar 2005

المشاركات: 2,815

اقتباس:

المشاركة الأصلية كتبت بواسطة سيدرا

جميل جدا جدا

أقول إيه أكتر من كدة بس الأفكار حلوة وخطيرة

اشكرك اختى الغالية على مرورك الكريم ومشاركتك المتميزة

مع حبى

__________________

24-08-2005, 12:56 AM

mayamoon

عضو جديد

تاريخ التسجيل: Jul 2005

المشاركات: 10

تسلمي princees vbmenu_register("postmenu_498899", true);
الله يعطيك العافيه افكار تجنن
ومرررررررررره شكرا

24-08-2005, 01:37 AM

shorooog

عضو متألق

تاريخ التسجيل: Mar 2004

المشاركات: 395

تسلمين على هالأفكار

__________________

استغفر الله الذي لا اله إلا هو الحي القيوم وأتوب إليه

24-08-2005, 11:46 AM

احمد شوبير

من كبار شخصيات المنتدى

تاريخ التسجيل: Dec 2003

المشاركات: 9,213

افكار جيده وتبعث على الامل والحب بين المخطوبين والمتزوجين

شكرا على طرحك وشكرا على تميزك

تحياتى اختى الفاضله

__________________
لا يوجد شىء اسمه صعب ، ولا يوجد شىء اسمه مستحيل ... نحن من نصنع الصعب والمستحيل

25-08-2005, 03:07 AM

وجه الخير

عضو المنتدى الفخري

تاريخ التسجيل: Nov 2003

المشاركات: 10,270

ماشاء الله
ملف شامل ومميز ، مشكورة اختي الكريمة
بارك الله فيكِ
خالص احترامي

25-08-2005, 03:57 AM

koky_khores

عضو نشيط

تاريخ التسجيل: Jan 2004

المشاركات: 139

بجد مش عارفة اقولك اية
فعلا افكار ولا فى الخيال وجميلة جدااااااااااااااا
وعمرها ما تختر على فكر حد ولذيذة موتتتتتتتتت
بجد بجد انا سعيدة جدا
وكمان انك من مصر
مرسى ليكى كتييييييييييييييييييييير
اختكkoky

26-08-2005, 10:59 PM

#10

وحيدة

قلم أسرة مميز

تاريخ التسجيل: Oct 2003

المشاركات: 2,391

واااااو

موضوع راااااااااااااااااااااااااااااااائع

و افكار تجنن

شكرا حبيبتي على هذا المجهود

و بانتظار المزيد

__________________
[img]

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه