السلام عليكم جميعا
في مووضع شاغل بالي وبشدة تعبانة من نفسيا ارجو ان تشورون عليي بالحل ماعليكم امر قبل كلشي بقوليكم اني تقريبا محبوبة من الكل لان طيبة ومتفهمة واحب الكل وما عندي عداوات مع ايااحد وقبل خطبتي حذرني زوجي من اخته الكبيرة بالذات لان مشكلجية مع كل افراد عائلتهم وكنت اقول لا بكون وياها طيبة والطيب يغلب الطبيب وقمت اتبادل وياها الهدايا والاحاديث ومرت الايام على زواجي 6شهور حاليا...
اسكن في غرفة فقط في بيت زوجي واستخدم الحمام الخارجي المشترك مع باقي العائلة قبل اسبوعين تقريبا نسيت بعض من ملابسي الداخلية بالحمام عزكم الله بالغلط شكلي نسيت واصلا مادري شلون نسيت شكلي كان مشغول بالي من شي المهم اخته استخدمت الحمام مباشرة وشافت حاجاتي وما جت كلمتني بشكل خاص عشان انتبهني ما اعيد هالتصرف مرة ثانية قامت سوت منشورات بكل البيت ولصقتهم والكل درى اني المقصودة من الشباب والبنات وكل العايلة وا فضحيتاه وطبعا لما انحرجت والكل درى عني طبعا زيدت شوي توابل للسالفة وقالت تقول للكل مواول مرة اني اسوي جدي مع ان والله انها المرة الاولى واني شديدة واخد كل حذري خصوصا الحمام مو ملكي الخاص .
ولما الكل درى اني صار ويهي كلش مو مستوعبة اللي صار والتصرف الي خدته ضدي كلمتها وقلت لها ان مو قصدي وجدي واسفة ومفروض بيني وبينش ايكون الكلام قالت لي ما تستحين وجدي ويانه شباب والحمام مشترك وقامت تغلط عليي واني ما اتقبلت وبادلتها نفس الاسلوب وغلطت عليها مع العلم ان قامت تعلمني الحياء والذرابة واخدت مني موقف وتهمجت عليي بالكلام مع ان مو قصدي كان ومع لعلم انها مو محتشمة في منزلها تخرج من الحمام شبه عارية امام الجميع وملابسها خليعة وتكلمني عن الحياء بسبب غلطة صغيرة
المطلوب مني شسوي احين اصالحها او اخليها بحالها مابي احد ياخد مني موقف من العايلة واجد قاعدة افكر ومتعبني هالشي او اتجاهلها وابدي كرامتي عليها علشان تتعلم شلون تعامل الناس ؟؟؟ لا تبخلون عليي بالرد رحم الله والديكم