السلام عليكم ورحمة الله وبركاته


اول مشاركة لي وهي مشكله مادري لمين اتكلم
لكن قلت خليني اشارك معاكم هنا اكيد بتحلون لي مشكلتي


انا لي سنه متملك >>سويت الملكه يعني وكتبنا الكتاب 😆😆

عندي مشكله عويصه ومعقده شوي
تخيلو ان خلال السنه ذي ما كلمت زوجتي الا 5 او 6 مرات بس

المشكله هي اني ادمي جرئ بس مو مع الجنس الناتم
ماعرف اتصرف مادري ليش !!!
اجمع كلام ف راسي وارتبه وانسقه بس اول ما ادق
يضيع الكلام كله 😭😭

برضو احسس انو مافي حماس من طرفها
يعني هي ترد كلمه ورد غطاها
(كيف حالك ) (الحمدلله تمام )
حتى ما تسال عن حالي !!!!!!!!!



وصلت لدرجة انو اشك انها ماتبيني وقلتلها اذا ما تبيني قولي لي عادي
قالت لا ابيك طيب ليش كذا بدون رد
صرت ما اتحمس اكلمها

اطول مكالمه دقيقه واحده فقط
ادري طولت عليكم

لكن من حر مافيني



زبدة الكلام كيف افتح كلام معها كيف اخليها تتكلم معي


كيف اصير زي اي زوجين 24 ساعه مع بعض واتس او جوال

ممكن تساعدوني

المفروض بعد الملكه تتزوج خلال شهر الى شهرين بالكثيير ، سنه تنتظر كثير جدا

انت زي اللي ابوه اشترى له سيكل ولا ساقه الا بعد سنه

طبعاً اللي اشوفه مافي مشكله ، اللهم ممكن المشاعر بينكم صارت بارده
وغلط عليك اذا حسيت مافي تجاوب من طرف الثاني تذكر سالفت شكلك انت ماتبيني .. الخ
لو ماتبيك كان رفضتك من اول

انت بادر انت الرجل ، ابدأ بسواليف وحبه حبه راح تلاحظ مشاركه من طرف الاخر

شخص عادي
اشكرك على مرورك
تاجيلي للزواج بناء على طلبها تبي تخلص الجامعه حاولت اني ابين لها اني ابي الزواج وباخليها تكمل جامعتها وهي معاي
لكن رافضه تبي تكملها عند اهلها بحكم هم في مدينه وانا في مدينه





بالنسبه يوم تقولي غلط يوم اقولها انتي تبيني


والله اني مغبون ياخي اكلمها وارسلها وادق عليها
ايام كثير ادق عليها ما ترد علي و احاول اتقرب لها واتودد لها لكن ماعرف ايش اقول لها لكن ماش مافي تجاوب منها والله لعب بي الوساس انها مجبوره علي


مادري كيف اعبر يعني اعذروني
لكن انا ابي ابادر وابي افتح سوالف لكن ماعرف ايش اقول

ايش المواضيع اللي افتحها معها
دايما احاول افتح مواضيع واخليها تسولف لكن ارسلها اليوم ترد علي بكره

سلام عليكم يوم 20 ترد علي وعليكم السلام يوم 21 😬😬😬😬

يعني حتى لو ابي افتح سوالف ماقدر
بروووود عجييييييييب

لا رد على رساله ولا رد على اتصال


غبت عنها فتره 3 شهور ماكلمتها ولا حتى ارسلت نقطه

انا مشكلتي حساس واي شي يدق معي
واي شي يسكتني
نصايحكم ❤❤❤

المفروض ماطول فترة الملكة
يكون فيها ملل وفتور
بعدين ياخو ي اخترع سوالف مو لازم
ترتب الكلام انت داخل الديوان الملكي

__________________
سبحان الله وبحمده سبحان الله العظيم

طبيعي ماهي متعوده عليك والحب ما ينبني من الباب للطاقة
أنت معترف أنه ماصار بينكم احتكاك إلا فقط 5 أو 6 مرات مكالمة من وين يجي الحب وهي حتى ماتعرفك
لا حبتك أجل فهذا حب كذبي ^^
حاول أنت تستدرجها بالكلام شويه شويه
ابدأ بالرسايل يمكن احرك أكثر من المكالمة
وخلك طبيعي وعادي لا تهول المسألة علشان الكلام يسترسل ولا يطير

- فيه ناس ما يأيدون المكالمات أو التواصل يمكن تكون من ضمنهم ماتبي احتكاك فصايرة ثقيلة.

__________________

بما انه مابينكم حب لسا
لا تسألها تبغيني ولا تحبيني ابتعد عن هاذي الاسئلة الين تشوف مؤشرات لهذا الشي وقتها تعرف من نفسك بدون اسئلة
اسألها عن الجامعه كيف ومرتاحه ؟ وشنو حابه تسوي لما تتخرج ؟ وايش تحب ؟ وايش اللي يسعدها اكيد بتتجاوب بس لا تكثر عليها الاسئله دفعه وحده شوف ردها ع كل سؤال تسأله لها ..
مثلا خذ رايها باشياء تخصك
الله يعينك فالبدايه لازم تسحب الكلام تسحيب الين تتعود عليك
موفق

حب من دقيقة مكالمة؟

نضحك على بعض؟

المبادرة تجي منك المفروض وبناء على كذا مايحق لك تلوم

وباعترافك انت مبادراتك قليلة.. الحساسية اركنها على جنب مو وقتها

__________________

اختلافي عنك لا يعني اختلافي معك

انت لو زودت المكالمات بنقول معاك حق
لكن 5. -6 مكالمات. خلال سنة
هل كانت متباعدة. او اول شهر و مليت

__________________

5 او 6 مكالمات !!


عاد لو وحدة من اهلي داقة علي مستحيل اتذكر حتى رقمها !

اكسر الحاجز ،، خلي مكالمتك كلها مرررح !



اسألها عن اخبارها وامززح ،، لما تخلص ولا سألتك عن اخبارك

قول لها بمزح والحلوة م تسأل عن اخبارنا ؟!



مدة عقد قراني كانت 10 شهور وبما انو زوجي كان مغترب امضيناها مكالمات


3 مرات يوميا 😁،، بدون الواتس

__________________




ربِ هب لي من لدنك ذرية طيبة أنك سميع الدعاء

للامانه انا ماطلبت حب على قولتكم
بالعقل الحب يجي مع الايام مع المواقف
لكني حاولت اني اكون لين معها وسهل ومرح شوي لكن للاسف مافي تجاوب منها
كل كلامها مجرد رد لكلامي حتى ما ترد زي الناس يعني كلمه وتقفلها ف وجهي

بالنسبه للمكالمات يوم تشرهون علي 5 او 6 مرات فقط


قسسسم بالله ايام كثير ادق كثثير مازترد علي
القاها مشغول وانتظر بعدين ادق وماترد علي 😢😢😢😢😢😢😢😢😢
مرررراااات كثيييير تصير
علما انها قريبه من اختي يعني اخذ علومها من اختي او من امي
يعني احيان ادقدق عليها كم مكالمه ماترد حتى ماتعتذر وتقول كنت مشغوله او كنت برى حتى لو برساله


يعني الواحد اذا جا بيعطي لازم يحس انو في اخذ وعطا ولا لا