السلام عليكم ورحمة الله وبركاته
انا عضوه جديده وحبيت استشيركم بموضوع
انا فتاه عمري 30 سنه لم يسبق لي الزواج تقدم لي رجل مطلق مرتين وعنده طفلين بصراحه انا مقتنعه بالرجل من ناحية الاخلاق بسس سمعت كلام مو زين من اهل طليقته الثانيه وخفت
صليت استخاره وارتحت
وفي شي مهم انا من النوع اللي اتأثر بكلام الناس يعني لو قالوا كيف تقبل بواحد مطلق مرتين مدري وش اقول كيف اواجههم واوقفهم عند حدهم لاني بكون شغلهم الشاغل
بربرتي كثيره بس ياليت احد يريحني ويقويني

استخيري كثير يا عزيزتي ..
كثفي الإستخارة حتى لو بعد كل ساعة , لازمي على الإستغفار .
وحدة من صديقاتي انخطبت و جلست خمس شهور مخطوبة لواحد حبته وتعلقت فيه كثير
هم عاداتهم الملكة بنفس يوم الزواج ..
قبل الزواج بيومين فقط صارت مشكلة و تفركش الزواج بالكامل ..
وهي كانت تستخير كثير إلى أن خلصها الله منه وبإقتناع تاام منها وتحمد الله انه ما ارتبطت فيه

ف يا قليبي ما نقدر نقولك ارفضيه أو خوذيه .. لكن دامك مرتاحه له وتبينه
مبدئيا وافقي عليه و ضلي على إستخاره دائمة لله عز وجل
ومع الوقت ان تيسرت معاك كان بها , وإن لا .. ثقي أن ربنا كله خير
الله ييسر أمورك ..

__________________

‏
الوعي هو الملاذ ..

أستغفر الله العظيم ؛
( الفردوس غايتي )

عزيزتي وغاليتي يعطيك الف عافيه والله ردك ريحنني
جزيتي الفردوس الاعلى

اغلب المطلقين يكون وراهم بلا يوم يطلقو
اذا كان رجال سوي كان قدر انه حرمته الاولى تحملته
الله ييسر لك

لا أستطيع لا أنا ولا غيري من الأعضاء أن يقولك أرفضيه وإلا وافق عليه
والمسألة مجرد قناعات .. يعني أنا بقولك رأيي وهو مبني على قناعاتي الخاصة
وبحطك مكان أختي وبقولك رأيي

الرجال أنواع وفي نوع منهم عنده الزواج والطلاق مثل شربة الموية
واي عقبة تواجه بالحياة أو ضيق من حياته الزوجيه على الطول يرمي الكلمة ثلاث مرات ويصير حر طليق
وأنا شخصياً أعرف واحد من هذه النوعية ..كان متزوج وحدة كل النساء يمدحوا بأخلاقها وأدبها وبيوم وليلة
طلقها لأنه حس إنها نحيفة وقال ما عجبتني!!!! وراح أخذ غيرها

وكمان أعرف رجال طلق مرتين أو ثلاث مرات "ما أتذكر كم بالضبط" ولكنه نعم الرجل
محترم وأخلاق وراعي مواقف والكل يمدح ويشيد فيه وكان مشكلته إنه ما توفق بإختيار الزوجة
وطيبته هي إلي تطيحه من زوجة رديئة إلى زوجة أردى والحين الحمدلله تزوج ومبسوط

فنصيحتي لك لا تستعجلي بالقرار وإسألو عنه زين ولا تخلي موضوع العمر هو إلي يقرر عنك
وتقولي عمري 30 ويمكن ما يجي نصيب ومن هذا الكلام البايخ.. لأن لو فكرتي كذا راح توافقي
عليه حتى لو كان غير مناسب لك وراح تندمي على قرارك والله يكتب لك إلي فيه الخير

حبر سائل
ردك فيه من الصحه مليون بالميه مو على كل الرجال تنطبق نظرية انه مطلق يعني كويس او مو كويس
ترجع للشخص نفسه وخليني اقولك عن موضوع العمر مجتمعنا البنت لما تكبر تتنازل عن اشياء كثيره ومنها العمر والمطلق وابناءه كثيره هذا واقع وتعايشته مع بنات أهلي وصديقاتي اككيد عن نفسي مابتكون الفكره اني بتزوج لمجرد الزواج بسس لا طبعا فكرت واستخرت وربي يقدم اللي فيه الخير

عليك بالسوءال المكثف والإستخارة

وعموما..لا تبني موافقتك على أساس عمــرك..بل ابنيها لمن يستحق أن تفدينه بعمــرك.

بالتوفيق..

أختي .. أنتي بنت بكر .. ولكِ الحق تأخذي من يناسبك... سواء عازب أو مطلق أو أرمل .. مو مهم كبر السن وصغره .. المهم يكون اختيارك له مبني على دين وخلق .. اسألي كثير عنه .. وإذا تقدري تخلي وحده تعرف أهل طليقته الثانيه .. تسأل طليقته على انفراد بشكل غير مباشر .. لو طلب طليقها يراجعها ترجع؟؟... وشوفي ردها .. إذا جاوبت بنعم .. تعرفي إن الرجل فيه الخير ولا ما كان رضيت ترجع له .. إما إذا لا ..تستدرجها ... ليه؟؟ وهو مذكور بالخير؟؟ ... ومنها ممكن تعرفي الإسباب ... لإنها كانت زوجته وهي أدرى به من العشره معه ... وكمان نصيحه لكِ.. لا تعطي الرد لهم إلا على الأقل بعد شهرين تقدري تسألي فيه عنه .. وخلي اخوانك يختلطوا فيه في هذي الفتره .. حتى تكوني صوره عنه من خلال مواقفه معهم .. واكثري من الدعاء في السجود .. والاستخاره والاستشاره .. والله يكتب لكِ إللي فيه الخير

عندي مداخله في نقطه طليقته من وجهة نظري المرأه لما تطلب الطلاق تكون مقتنعه فيه مافي وحده تحب تكون مطلقه بتصبر وتتحمل عشان اطفالها بس هي ماقدرت وانا سمعت انه مو ناوي يطلقها بس هي عندت وتبي تتطلق يعني البلا فيها
اما فتره شهرين اسأل عنه قوية ربي يكتب اللي فيه الخير