مساؤكم فل

عندي استفسار بخصوص البهارات
يعني بصراحة بحس حالة ملخبطة بموضوع البهارات

متى نستعمل الكزبرة الناشفة ؟؟؟؟
متى بنستعمل الثوم الناشف او الزنجبيل ,,,

الكمون لاي طبخات ؟؟؟؟
القرنفل المسمار لشو والجوزة الطيب لايش

يعني بدي باختصار طبخاتنا التقليدية مع بهاراتها المظبوطة

المقلوبة ...........
الملوخية ...........
الباميا...........
المحاشي...........
السلطات...........
الفاصولياء البيضا والخضرا ...........
الصواني ( دجاج او لحمة )...........
السمك ...........


وهكذا

يعني انا بستعمل بهارات وماشي حالي بس بدي على الاصول

اهلا اختي شكلك فلسطينية من كلامك عن الطبخات المقلوبة اكييييد انت فلسطينية اختي يعني

المهم شوفي البهارات الي انت طالباها

المقلوبة ........... بهارات المقلوبة بتكون في مرقة سلق اللحمة او الدجاج وهية كل البهارات الموجودة عندك فلفل اسود قرفة بهار ورق غار هيل حب بردوقش ممكن كمان ملح و بصل اكيد و مسمار او قرنفل والاهممممم الكركم الي بعطي المقلوبة اللون الاصفر انا بضيفو بعد سلق الدجاج قبل اضافته للرز وممكن مع السلق مش فارقة


الملوخية ........... الكزبرة الناشفة بهار خاص للملوخية او تتميز به الملوخية
بتضيفي منو لمرقة الحم او الدجاج الي بتكوني سالقاه بالبهارات السابقة برضو
ولكن لما تطبخي في الملوخية بتضيفي كزبرةناشفة
والتقلية بتدقي توم وملح وبتقليه في مقلاية فيها زيت شوية واول متبدا ريحتو تطلع قبل ميتحمر عشان مايمرر طعمه بتضيفي كمان كزبرة ناشفة وبتطشيها في الملوخية وماتخلي التوم ينحرق او يتحمر كتير يادوب يشقر والا بعمل طعم مر ومش حلو ابدا

الباميا........... برضو الكزبرة في المرقة والتقلية تنعمل كالتالي بتدقي فلفل وتوم وريحان طازة وعالنار مع زيت شوي تشويح سريع وبتحطي بعدين الكزبرة الناشفة عليهم وعالبامية عطول


المحاشي........... بالنسبة الي خلطة المحاشي مافيها شي زيادة كل البهارات كمون وفلفل و بهار وملح وقرفة
وعالملفوف كتري كمان الكمون عشان النفخة
والملفوف كمان عالوش قبل متطفي عليه بخمس دق بتدقي توم وكمون وشطة خفيف شوي بودرة يعني وبتعصري عليهم لمون وبتحطيهم عوش الملفوف وسكري عليه وبعد 5 دق قدميه

السلطات........... السلطات عالم واسع ولكن التتبيلة التقليدية للسلطة الخضرة العادية جدا هية زيت زيتون و ليمون و ملح وخل
وممكن تحطي سماق و كمون شوي

اما الفتوش نفس الشي ولكن بتدقي توم وبتحطي عليه

وطبعا في سلطات منوعة وكتيرة وكل سلطة الها تتبيلتها الخاصة ولكن حسب نوعها
زي سيزر سالاد تتبيلتها مختلفة تماما عن السلطة العادية

فهاي بدك تشوفي كل سلطة وتكتبي طريقتها وتتبيعيها

اما السلطة العادية فقلتها الك

وسلطة الدقة الي هية تدقي بصل مع فلفل حراق وعين جرادة ناشف
وتحطي البندورة و تدقيهم شوي
وبالاخر زيت زيتون عالوش
وممكن بدل البصل توم وممكن تتركي الجرادة

المهم هاي كمان سلطة الدقة الفلسطينية التقليدية


الفاصولياء البيضا والخضرا ........... الفاصوليا البيضة عادي مافي شي مميز ولكن ممكن ترشي زنجبيل بودرة حلو عالطبخات الي زي هيك
وكتري كمون برضو عشان النفخة

اما الخضرة فممكن تعملي دقة عبارة عن توم وملح و شوية نعناع اخضر او ناشف تدقيهم بالمدقة والهاون
وتحطيها عالطبيخ بالاخر خالص بدون قلي انتبهي



الصواني ( دجاج او لحمة )........... حسب نوع الصينية
بصلصة او طحينة
بهاراتهم عادية بتحطي بهار جاج او لحم و كمون وفلفل اسود و بتحطي الصلصة بالماء وعليها البهارات وبتضيفي

او الطحينة

انا بحكي عن صنية البطاطا بالجاج او اللحمة

ازا قصدك اشي تاني احكي


السمك ...........
تتبيلة السمك التقليدية

بعد تنظيف السمك
كمون وملح وليمون وفلفل اسود وممكن كزبرة ناشفة
ينحطو عالسمك وتنقعيهم قبل بليلة بعدين تقليهم تغمسيهم بالطحين او البقصماط وتقلي

ولو شوي ممكن تحشي السمكة بدقة
توم وفلفل حراق و ملح وكمون و كزبرة ناشفة او خضرة

وتحشي السمكة وممكن هاي الحشوة للقلي كمان

هاي التقليدية وفي اكيد خلطات مبتكرة اخرى


وخلص ايدي تعبت من الكيبورد بس ادعيلي كتير بظهر الغيب الله يسهل اموري ويرزق زوجي عمل حلال ورزق واسع عاجلا غير اجل والله يسهل حملي واقوم بالسلامة


ولو احتجتي شيش ماتترددي

__________________

اهلين اختي ملك
يشهد الله اني احبك في الله واحب مشاركاتك وطريقة طرحها

تخمينك نص صحيح يعني انا من شرق النهر وانتي من غربه انا عزيزتي من الاردن
طبعا كلنا واحد المهم اننا عرب ومسلمين وقضيتنا وحده


اه نسيت بالنسبة للبهارات انا بعرف فيها نص نص بس بحس الناس اللي حولي بتعقد الامور شوي

يعني انا تقريبا اتعمالاتي 90% زي ما انتي كتبت بس لما يكون في حكي عن البهارات بسم الله ماشاء الله بيصيروا كل اللي بعرفهم عالمات في بحر البهارات وهذا بيجوز خلطه مع هاد وبهارات تانية اذا خلطية يمكن يصير عندك قنبلة نووية بتفجر المطبخ لحتى شككوني بمعلوماتي


الله يجزيك الخير وطمنيني عن زوجك شو صار بشغله على كلا اذا بتخلي زوجك يبحث على النت في كتيير مكاتب توظيف جادة ممكن تفيده

مبروك الحمل عزيزتي وان شاء الله ربنا يرزقكو برزقه امين يا رب

الله يسعدكم والله

السؤال واجابته افادتني كثير

بالنهاية كل واحدة لها نفس بالمطبخ ولها لمستها الخاصة وانا منك يا احلام ابين للناس انه خلطتي سرية ومافيش منها بالعالم

__________________

بكر الشايب
نفسي اعرف معنى اسمك ؟؟ ( حشورة )

بالنسبة للبهارات بحس انو سر الاكل كلو

بس بصراحة في ناس بتعقد الامور بس بصراحه ملك شادي ما قصرت اوجزت ووفت

وبتمنى مشاركات اخرى للاستفادة لاني عملت سيرش على النت وما طلع الا خلطات واسماء علمية ما طلع اشي عملي ابدا



شاكرة مرورك حبيبتي

معنى اسمي اخاف اكتبه وتجينها كلمة من المشرفين بس اوعدك رح انزل فيه موضوع مستقل قريبا

بما انك من الاردن سؤال عن بهارات المنسف !

انا استعمل بهارات سلق اللحمة العادية طبعا .. لكن في شي اخضر مثل النعنع الناشف بس مو نعنع اكيد يحطونه في الجميد عندي اياه لكن قرب يخلص ومحتاجة اسمه علشان اشتريه !

__________________

انا مثلك مااعرف واستفدت من الاخت ملك الشادي ...يابكر الشايب اتوقع واخمن ان معنى لقبك انتي اكبر ابناء ابوك ...مدري صح ولالا اخااف تظربيني على هالخمين ههههه

بصراحة احنا بنفضل المنسف بدون بهارات بس لعيونك بحثت في النت وطلع معي

عشبة الحندقوق او ما يطلق عليها بحوايج السمن
المكون الاساسي وهو عشبة الحندقوق ويعرف أيضا باسم (اكليل الملك)، الكزبرة ، البقدونس ، عريف الديك ، الزعتر ، الزعتر البري الفارسي ، كزبرة ، بابونج ، نعنع سيل ، نعنع عادي ، الشومر ، السمينة ، المحيلبة ، والرشاد.


وتبين الدكتورة ردينة بطارسة الفوائد الفعلية لهذا البهار: لقد قامت الجدات والأمهات قديما باضافة نكهات خاصة الى اللبن (الرشوف) المرافق للمنسف ، تضاف أثناء الطهو ، بهدف اعطائه مذاقا لذيذا ومميزا في نفس الوقت ، ولذلك عمدن الى تقليد سنوي يمارسنه في كل ربيع من السنة ، وهو عادة جمع بعض أنواع النباتات والأعشاب البرية التي تنبت خلال أشهر الربيع ، من ثم يقمن بتجفيفها وطحنها على شكل خلطة بهارات خاصة بالمنسف دون ، ومن أهم مكونات هذه الخلطة المميزة الأعشاب التالية: عشبة الحندقوق ويعرف أيضا باسم (اكليل الملك) ، وتمتاز هذه النبته بفعالية طبية حيث أنها لاتحتوي على مادة الكومارين التي تسكن الآلام وتفتت الأورام وتطريها ، يمكن شرب المستحلب منها لتسكين أنواع المغص ومعالجة النزلات الشعبية ، وتحتوي الخلطة أيضا عشبة الكزبرة البرية والتي تمتاز برائحة مميزة والجزء المستخدم منها في الخلطة هو البذور فقط والتي تمتاز بفعالية عالية لمنع تكوين الغازات المعوية ، كما تحتوي الخلطة على نبتة الشومر و هي عشبة ذات رائحة عطرة وتحتوي بعض المواد الطبية الفعالة منها زيت طيار مع مادة الأنيتول والفانشون وهي مادة مقشعة ومثيرة لافرازات الغدد وطاردة للغازات ومسكنة للتشنجات ولها خاصية في معالجة نوبات الربو والسعال الديكي والتهاب الحنجرة وكذلك فعالة في علاج التهابات المسالك البولية ، خاصة عند الأطفال والشيوخ ، كذلك يفيد للمرأة الحامل في القضاء على الاضطرابات الهضمية ويزيد من ادرار الحليب عن المرضعات ، كما تحتوي الخلطة على عشبة العصفر (الكركم) والذي يعطي اللبن اللون الأصفر المميز لشراب المنسف والذي يحوي مادة الجفانين المانعة للتشنجات المعوية ، ومن المكونات أيضا زهرة الأقحوان الصفراء أو ما يعرف شعبيا بنبتة البسباس ويعرف في مصر باسم (زهرة الذهب) ، وهي من فصيلة نبات الأقحوان الذي يمتلك العديد من الخصائص الطبية ومنها احتوائها على زيت طيار مع التوجون ومواد طاردة للديدان المعوية ومسكنة لآلام أعضاء الحوض الصغير (المثانة والبروستات عند الرجال ، والمبيض والرحم عند النساء) ، كما يمتلك فعالية في تقوية الدم وتحتوي الخلطة أيضا نباتات وأعشاب أخرى لم تعرف بعد فوائدها الطبية مثل عشبة عرف الديك وغيرها من الأعشاب ، هذا ومن ناحية أخرى نقول أنه ومع تقدم العلم ووجودنا في زمن الأنترنت الا أنه لا يمكن في أي حال من الأحوال أن يصبح منسفنا وجبة سريعة يحضر بالميكروويف..،،.

بصراحة المنسف عندنا بالبيت الو بروتوكولات يجب احترامها
كل جمعة لازم منسف وعلى اصوله جميد مش لبن خبز شراك لوز وبقدونس على الوجه صحن بصل اخضر وفجل وجرجير ومخلل و هجووووووووووم

يا سلام عليك يا أحلام

تسلم الأيادي


رح ادور عليها مع اني اشك القاها بالسوبرماركت .. يعني لازم مشوار للعطار

تسلمي حبيبة قلبي

__________________

خبز شراك ما عندي بستعمل بداله خبز رقاق (قريب منه لكنه اعتقد اخف) وطبعا البقدونس واللوز والكماليات هذه كلها موجودة

صار المنسف برغم انه مش من اكلنا من اطباقي المميزة وزوجي ما يعزم إلا عليه ماشاء الله

لكن عندي مشكله بالجميد .. ما القاه دائما .. وهالايام استخدم جميد الكسيح السائل .. للاسف كان عندي جميد كركي وخلص ! وانتظر حد يروح للأردن يشتري لي


بالنسبة لاسمي صح انه يعني اني بكر الشايب (والدي) ولكن المعنى المطلوب فيه اسمي يعود على زوجي وليس ابي (بكرة الشايب - هي ناقة مفضلة عند راعي الحلال لا يمسها أحد سواه - و سماني زوجي بكر الشايب حتى اضع الاسم في المنتدى الخاص فينا ولا يكلمني ا حد من الشباب (البدو يعرفون معنى بكر الشايب جيدا ولا يتجرأون على محادثتي) -

بس خلصت القصه

__________________