زوجي فيه طبع مرة مرة صعب ومتعبني واحيانا احس بوصل للنهاية معاه بسبب هالطبع.
هو الغضب المفاجئ
لما يغضب يطلّع غضبه بنفس اللحظة ويرتاح هو بعدين
بس اللي معاه لا .
يعني مايراعي الجو العام مايراعي المناسبات الظروف .. الخ
لا ابدًا

احيانًا نكون طالعين مطعم انا وهو لوحدنا
فجاة يهاوش على موضوع بسيط
يقول كنت معصب وخلاص لا تكبرينها
بس انا نكّد علي !!وخرب جوي

ودايما كذا بكل سفرة له بصمة
وباكثر الطلعات بصمته موجودة.
واحاول. قد قد ما اقدر اتحاشى واتحمل .


لما رجع من السفر
من بكره صار موقف الشباك ، لما دخل للغرفة وحصلني فاتحة الشباك
جلس يهاوش مررة
وانا كنت حرفيا حرفيا مشاعري بالحضيض
الحين لنا اسبوع عن بعض وبعد ثلاث ساعات ماقدرت تمسك نفسك!!
طبعا صرت اتحاشاه واسوي شغلي ولا اجلس معاه
ولما ناموا الاطفال تكلمت معاه
قال انتي مكبرة الموضوع !
قلت لا مو مكبرة انت حرفيا فشلتني توك جاي ورايحة اناديك للغرفة تشوف لبسي اللي انت مشتريه لي
كذا تقوم تهزءني
طيب احشم الملابس الجديدة ع الاقل 😂
ويردد لاتكبرين خلاص مايسوى الموضوع!! تبكين عشان هالموضوع التافه؟!!

بكى ولدي ورحت له لما رجعت حصلت زوجي طالع
وانا رحت انام عشان دوامي مبكر.

ورجعت ومشينا طبيعي.


لما صار موقف الحضن الصباح وصحينا وطلعنا الصالة
انا اخذت ميزان الجسم من الدولاب وقست وزني
ورجعته مكانه .

صحى هو وجاء عندي يصرخ انتي اخذتي الميزان ؟
قلت ايوه
قال مرة ثانية تاخذينه ترجعينه لمكانه! بصراخ .
قلت طيب رجعته مكانه !
واقوم بسرعة بشوف لاني متاكدة اني مرجعته

لما وصلت للدولاب قلت شوفه بالدولاب
قال تستهبلين رجعيه زي ماكان واقف ماتحطينه بالدرج منسدح ويغطي ع شرّابي 😂 ؟!!
وتراك تسوينها كل مرة .

قلت طيب سوري ، وعدلته زي ما يبي .
قلت طيب نغير مكانه .. قال بهواش لا مكانه زي ماخترته !!!
قلت طيب اوكي .

قسم بالله هذا الحوار اللي صار 🙂 حرفيا .
وانا صرت ما اعرف هل المشكلة فيني انا او فيه هو .
يقول لازم اعيد عليك الكلام كثير .
وتروحين وتسوين نفس الاخطاء ! تعانديني ؟!!
قلت ما اعاند بس اكون ناسية
ولمّح الى اني اعاني من مشكلة بالنسيان . 😂

انا ما اعرف هل الوضع طبيعي لما يكون الزوج دقيق جدا نفس وضعي
وانا اكون انسى .. لاني ام لاطفال وموظفة وعندي مسؤوليات لراسي !

انا ما عندي اخوان
لكن مثلا اشوف ابوي ، عمره مادقق باي شيء بالبيت
امي تسوي كل شيء
من ترتيب وتنظيم ونظام .
مع ان شخصيته قوية بس مايدخل نفسه بالتفاصيل.

زوجي لا ، تفاصيل التفاصيل ، ولو نسيت منها شيء
طلعت انا وحدة من ثنتين
اما اعانده واحط راسي براسه.
او اني فاهية وعقلي مو معاي .


طبعا المهم بعد الموقف هذا اقسسسم بالله العظيم اني ماحسيت بولا شيء
ولا شعور
يعني توني صاحية ويصير هالموقف اللي مايسوى ويصير قدام الاطفال .
ردة فعلي ولا شيء
ولا زعلت ولا تأثرت واول كنت تبدا دموعي تنزل غصب عني
المرة هذي انواع التبلد
رجع سالته عن الغداء
قال ابغى ساندوتش
سويتها زي ما يبغى
وحطيت الاكل واشغل التيفي نتفرج
حرفيا مشاعري كانت زيرو .

وانا احس ان هالشيء مو صحي ولا طبيعي ولا مؤشر مبشر .

__________________
سبحان الله وبحمده ، سبحان الله العظيم