الحمدلله انا اليوم مستبشرة و سعيدة جداً
انزاح عني حمل و هم ثقيل ..

أخبرت صديقاتي بنات المعهد اني مطلقة من ٤ أشهر .

لأني كنت اتكلم عن (أبو بناتي) عادي جداً و اتذكر مواقفه الحلوة و اضحك
حسيت اني كأني أكذب
و ان هالشي ما يتخبى
و اني لازم اتقبل واقعي
و اتقبل بعد اني ما تجاوزت الطلاق و لا تجاوزت شعوري تجاه ابو بناتي

فقلت لهم : بنات انا بقولكم شي اخفيته عنكم
انا مطلقة من ٤ اشهر
طلعت من العدة من شهر
اتكلم عن ابو بناتي عادي جداً و يبدو انه التبس عليكم و ظنيتوني لسه متزوجة
و كل ما طالت الايام و كثر الكلام تعقد الموضوع اكثر
و انا ماحب كذا
لازم اتقبل واقعي
و اتقبل حقيقة اني اتكلم عنه بكل حب و خير لاني لازلت أحمل له مشاعر
و احنا انفصلنا ومافي مجال نرجع لبعض نهائيا
و كتمت عنكم لاني ماعرفت افاتحكم بهالشي لأن الطلاق شي الواحد ما يبشر فيه

سألوني ليش:
قلت اختلاف اطباع
فيه اطباع الواحد ما يقدر يتكيف معها
و تجر اشياء اخرى .

و انا دخلت المعهد عشان اقوي عقيدتي و ايماني بالله
و ادور جو ايماني
و ربي ما يقدر قضاء الا وهو خير و أسآل الله اني اكون من الصابرين

..
تفاجئوا جداً من كلامي
ماتوقعوا اني كنت بهالوضع كل هالفترة
قالوا لي انتي متفائلة و قوية و ايجابيه و مو باين عليك
قلت كله بفضل الله و رحمته فيني

تأثرت جداً لما شفت وحدة منهم بكت و انا اتكلم ..

لكن الحمدلله انا احس براحة نفسية و شجاعة كبيرة لما تكلمت

__________________

الحمدلله على قضاء يقربني من الله عز و جل.