اخترت صورة سيارة عشان أقرب الفكرة لأخي في الله وجنس الرجال بشكل عام

راح أعطيكم هذا السيناريو لتوضيح الفكرة لكم (رجال أو نساء):

أنا أتخيل وضعي مع زوجي كأننا في سيارة فيها من كل مالذ وطاب من الأكل والشرب ووسائل الترفيه وماسكين خط والناس حوالينا بسياراتهم .. ويأشرون لنا بنات على الخط يبون يركبون معنا وأنا أرفض.. ويقول زوجي ليه مانركبهم؟! المكان موجود يشيل ثلاثه.. انتي بتكونين معززة مكرمة قدام لوحدك والباقين وراء.. والأكل والشرب موجود ويكفينا كلنا!! وأنا أقول لاااا أبي آخذ راحتي معك وأبي كل شي في السيارة لي أنا وحدي.. يقوم يقول زوجي ليه الأنانية؟! ليه ما تتمنين لهاالبنات ماتتمنين لنفسك؟! وأرد عليه وأقول: مين يقول اني ما أتمنى لهم الخير؟!! بس فيه سيارات كثيره ماشيه في الخط أشكال وألوان قديمة وجديدة من مواليد.. أوه عفوا.. أقصد من موديلات الستينات الين الألفين.. يعني حبكت يركبون معنا في سيارتنا؟!! يقوم زوجي يسكت على مضض.. ويقول: شوفي السيارات اللي حولنا اللي راكب فيها ثلاث واللي اربع حريم.. وأقول خل عينك على الطريق ومالك شغل بسيارات الناس.. وبعدين تهقى هذول مبسوطين وهم متحاشرين في سيارة وحدة؟ قال: مدري شكلهم مبسوطين!! قلت ناظر في هذيك السيارة.. شايف كيف السواق عينه في المرايه يناظر في البنت اللي جالسه وراه اللي كاشفه وجهها وشعرها وتسوي له حركات وزوجته اللي قدام ياغافلين لكم الله؟! مانفعها ركوبها قدام بشي البلاوي تتسوى من وراها وبدون علمها.. تبي يصير فيني كذا ؟! هي كلمة وحدة.. يا أكون لوحدي في السيارة يا تنزلني منها وتخليني أشوف سيارة ثانية أكون فيها وحدي لو إن شاء الله ددسن غمارة.. وانت بكيفك لو تترس السيارة كلها بنات بدل الوحده أربع

__________________
اللهم لا تجعل الدنيا أكبر همنا ولا مبلغ علمنا ولا إلى النار مصيرنا واجعل الجنة هي دارنا وقرارنا