للأسف عدت لأني محملة بقدر عظيم من القهر والعصبية 😔

وضعي الأشهر الماضية عال العال
علاقتي مع زوجي جيدة
ونزلت سقف توقعاتي معاه جدًا
والزعل محيته من قاموسي بصراحة ماعاد يهمني الموضوع ولا أحس يسوى إنه يتناقش فيه..
ايوه وصلت للمرحلة هذي
بدون عتاب بدون شرهة بدون اي شيء
وحياتنا ماشية ..

سافر زوجي انتداب لنفس الدولة اسبوعين
وحطيت ببطني بطيخة صيفي
ولا مرة كلمته ، نتواصل كتابي كل كم يوم
ومريحة راسي من الوساوس والهواجيس..
رجع وانبسطنا سوا ولهينا بحياتنا


اللي استجد ومخليني معصبة جدًا انه استغفلني
ما اعرف ليه هالمرة بس مو راضية امشيها .. ما اقدر
مع اني مشيت مشكلة جدا جدا كبيرة

صارت مشكلة وصرخ علي باعلى صوت وكلام سيء امام اهله
استوعب وحاول بعدين انه يفهمني وجهة نظره - لوحدنا -
ولا اي تعليق مني مشيت وتركته.
كنت مصدومة ومقهورة .. مشاعري حرفيا كانت غضب
من انت ؟ عفوا من انت عشان تعاملني هالمعاملة
طبعا انا افوق زوجي كعائلة، وماديًا اهلي افضل
وجمال
ونسب
وخطبني 3 مرات
كان ميت يبغى يخطبني
وبصراحة وقتها كثير كثير خطبوني بس سبحان الله ما اعرف ليه انا واهلي ملنا له
وظيفيًا جيد لكن مو ممتاز جدا !
كنت طمعانة يكون زي ابوه
ابوه انسان جدا جدا جدا جدا رائع مع عائلته
وكنت متأكدة بيكون زي ابوه
بس للاسف ماطلع زيه.

وصار فيه فرق شاسع بيني وبين اخواتي
ماديًا
يعني لسان حالي يقول وش اللي حادني !
بيني وبين نفسي تجيني هالافكار
لا اسلوب ولا فلوس تقول مغرقني ..
مادري جالسة امشّي
اسلوبه مرة سيء
مرة مايتحمل
ويرفع صوته ع ابسط شيء
بعكسه انا مرة رقيقة وصوتي هادي واحاول انتقي الفاظي انتقاءً .
لما يكون مع اهلي دايم يعلق بمزح عن التعدد عن الزوجات الخ
لما يكون برضو مع اهله
دايم يحاول انه يمدح بهالشي او يمدح نساء معينات وما الى ذلك
عمري ماحسيت بمشاعر انه يتباهى بي انا شخصيا .
بعكس اخواتي
امهات ازواجهم يتصلون ع امي شخصيا يمدحون
ازواجهم يمدحونهم امامهم وامام اهلي
اشوف مشاعر السعادة بعيون امي لما تعلق ايش قال فلان عن اختي تحس بفخر وسعادة
عمري ماحسيت بهالشعور
ما احد ما يبي يسمع كلام حلو
بالعكس ،


دايما امشي
وسممحة دايم كل شيء اوكي
ما اعاند
اللي يبيه يصير
احيانا مايمشي زي مايبي
يقول انتي عنيدة!
وين العناد بالضبط


كنت لما يسوي شيء يزعلني او يرفع صوته
كنت ازعل
واجلس بالايام زعلانة
ماكنت وصلت للنضج العقلي الكافي اني اتناقش واخذ واعطي معاه
تزوجته وعمري 19
بعد سنوات صرت ارسل مسج بمشاعري
وايش الاشياء اللي عملها
بالسنوات الاخيرة لا
صرنا نطلع بالسيارة ونتناقش ، زي أي بالغين
بعيد عن الأطفال
نتحيّن وقت ونطلع نتكلم ونبرر ونصفي النفوس ونرجع .

الآن حتى هذا تركته
صرت امشي كل شيء

لما رفع صوته بآخر مشكلة
سكرت علي. غرفتي مو زعل بس ماكنت اصلاً ابغى اشوف وجهه
كنت باجازة ، اودي الاطفال لمدارسهم وانا اطلع
كل يوم اختار لي مقهى اجلس فيه ..
مع جوالي
ارجع اجيبهم اجلس معاهم سوا

قبل وقت رجعته ادخل الغرفة انام شوي
واطلع اذا دخل هو ينام
اذاكرلهم اشتري لهم الناقص نطلع لو فيه موعد لو فيه شيء
اول مايصحى المغرب نبدا نستعد للنوم
يروحون غرفتهم واروح معاهم نسكرّ علينا
اقص لهم ونتكلم ونسولف عن المدرسة
بعدها يأذن العشاء اطلع غرفتي اصلي واسكر علي
وما اخفيك كنت مستمتعة
اشبك سماعاتي و ع جهازي
بديت بمسلسل اللي جديد
اشوفه الى 11 بعدها انام .
ريحته راسي كم يوم
واسترخيت
وبعدها طلعت

هو انصدم لما رجع شافني بالصالة
بس انا كنت مقررة اني امشي
ولا كلمة عتب او شيء
احط الغداء؟
ياللا حطيه

ويحاول يحاول يفتح مواضيع
وانا ارد عادي
كم يوم
ومشت الامور


قبل مانتهاوش الظهر قلت له ابغى مجفف شعر مرة حلو ولايضر الشعر
قال لي لا غالي
كنت متوقعة انه يجيبه بصراحة ، كتعبير الي ن الأسف
بس ماجاب
وانا تقبلت بصراحة

انا مو من اولويات زوجي ، وزعلي ورضاي ما يعني له الشيء الكثير
فقدامي خيارين
اما اني احاول احصل ع الاهتمام والمشاعر بأي طريقة
واستنزف البيت واطفالي واسوي جو سيء بالبيت واهدم ذكريات طفولتهم

او اني اتعايش مع هالشيء ، واترك زوجي مو من اولوياتي ..

وهذا اللي جالسة احاول اني اسويه
نتعامل باحترام
ظاهري وداخلي

احترمني واحترمك ونبني بيتنا بالاحترام ونعيّش اطفالنا حياة طبيعية هادية .

__________________
سبحان الله وبحمده ، سبحان الله العظيم