أولا أشكر كل من مر وعلق بكلمات طيبة ودعوات جميلة وكذلك كل من مر ودعا بظهر الغيب دون ان يكتب شيئا ،،

اليوم الخميس 21 شعبان سأسافر للرياض في إجازة لمدة أسبوعين تقريبا وأحس ان السيناريو يتكرر ، قبل سفري من عند زوجتي لآخر مرة احتد النقاش وارتفعت الأصوات وقالت انت بس تجي تنكد علي وتروح؟! خلاص لا تجي لين تخلص بعد ثلاثة شهور! ولما سافرت بقي بيننا صمت لمدة يومين او ثلاثة ثم ارسلت لي: العيال يبون يكلمونك اتصل فيس تايم على رقم سوا (رقم سوا لها ويستخدمه ولدي الصغير للألعاب) وبعدها بكم يوم تتصل من جوالها ولكن العيال يطلعون في الصورة ثم هي تبدا تكلمني شوي شوي ، وانا طول الفترة اراسلها طبيعي واناديها بنفس الكلمات والنداءات الي بيننا كزوجين حبيبين ( حبي ) (ياعيوني) ولكن هي صارت تبدا حواراتها او كلامها معي بـ( مرحبا ) أو ( أهلين ) ولكن مو مشكلة

المشكلة هو تفكيري في المستقبل وماذا سيكون وضعنا اذا خلصت دراستي ورجعت وهذا ما يقلقني ، لذلك وضعت لي هدف استباقي وهو اني بحاول قدر الإمكان خلال هالاسبوعين القادمين وأثناء وجودي بالرياض اني اكسبها واهاديها واحاول اني ادخلها على أمها وتصلح معها على دخول رمضان بإذن الله ثم المرحلة الثانية ارجعها لجو اهلي ووالديني ، لأني مؤمن ان العودة للجو العائلي هو خطوة مهمة في الإصلاح ، لأنها وللأسف الشديد مقاطعة والديها وعائلتها ووالدها يراسلني يسأل عنها يقول اكلمها وما ترد علي! ومقاطعة اهلي ووالدي لذلك وجد عندها الفراغ الاجتماعي الي صارت تعبيه بصديقات مختلفات ويزيدون كل فترة ولما اكون مسافر واكلمها وتكون رايقه تسولف لي عن فلانة وعلانة وانا أسألها فلانة مين وش اسم عائلتها؟ تقول ما ادري بس تعرفت عليها في المرسم او الكوفي ، منهم مدخنات ومنهم من يستخدون المعسل وقد اعترفت لي زوجتي انها طلبت من وحدة من البنات انها تعلمها على المعسل وفعلا راحت واياها لمقهى وجربت! وهي تسولف علي وهي مبسوطة وتقول ودي اكرر التجربة ، وانا مصدوم واتعجب من وضعها والله كأنها مسحورة ولا تدرك وش قاعدة تشوي في نفسها وفي عيالها وفينا كلنا ،، حتى امس القريب كنت اكلمها بالفيديو وكانت جالسة في غرفة المكتب وتدخن سيجارة وتقول ياليت عندي معسل بس ، وش رايك اذا رجعت من السفر هالمرة تجيب لي هدية معسل! لا حول ولاقوة الا بالله ،، والله اني احيانا اقول ليتها ما تعلمني وش تسوي يمكن احسن واريح لبالي لكن ارجع اتساءل هل تساهلها وانفتحها بالكلام معي لأنها تحبني من داخلها ومتعطشة تبي تسولف والا تتكلم معي بهالطريقة لأنه لم يبق لي احترام ولا هيبة في نفسها ؟؟

دعواتكم لي بالثبات ولها بالهداية ،، ويمكن اغيب فترة واوافيكم بما يحدث في إجازتي بعد انتهائها وعودتي لمقر دراستي لاحقا

__________________