رد: استفسار عن الرضاعة الطبيعيه..
توج في أول الطريق يا منفردة .... لازم تطولين بالج.
أكيد بنتج راح تعاف الطبيعي إذا تعطينها في اليوم أربع أو خمس رضعات صناعي!! .... وأساساً مع هالعدد كيف صدرج بيدرّ حليب؟!!!
مثل ما قالن البنات .. استمرار الرضاعة هو الضمان لإدرار الحليب.
وعن نفسي ما كنت آخذ أي شي يدر الحليب .. اللهم إلا إني أواضب على الرضاعة الطبيعية .. وأشرب سوائل .. وشوي شوي الحليب يكثر والرضاعة تنتظم.
حتى رمضان صمته كله وحليبي ما تأثر والرضاعة كانت ممتازة .. وسوائلي كانت عبارة عن ماي وشاي بالحليب وعصير برتقال .. يعني العادي اللي أشربه حتى بدون رضاعة.
سؤالي .. بنتج تكون صاحية أساساً وقت الرضاعة؟
الرضّع غالباً ينامون خلال الرضاعة .. ولازم تحاولين تخلينها تصحصح شوي عشان ترضع زين.
الشي الثاني .. نظمي مواعيد الرضاعة .. كل ساعتين حالياً .. وكل ما كبرت شوي زيدي الفترة الفاصلة بين كل رضعة والثانية.
تنظيم الرضاعة بيرحج على المدى البعيد .. وبيخليج قادرة تنظمين باقي أمور يومج بدون ما تكون الرضاعة عائق أو تعطيل لج.
وخلي الرضعة الصناعية آخر رضعة في الليل قبل ما تنام .. عشان تنام لج طول الليل .. وبالتالي إنتي ترتاحين شوي.
طبعاً لما أقول تنام طول الليل يعني حوالي خمس ساعات في المتوسط حالياً .. لأن الرضيع ما يقدر يتم بدون حليب أكثر من جذي .... وشوي شوي وكل ما كبرت شوي نومها في الليل بيطوّل.
بشكل عام أول شهر أو شهر ونص الأمور كلها تكون مخربطة .. لكن مع الوقت والتنظيم كل شي يترتب.
بخصوص مدة الرضاعة .. عن نفسي أبدأ أفطمهم لما تبدأ أسنانهم تطلع.
غالباً على سبع شهور.
__________________
اللهم طِيبَ الأثر .. وحُسْنَ الرحيل.
التعديل الأخير تم بواسطة مهره ; 29-06-2015 الساعة 11:41 PM