يعني أسيبه يا أخت بحرينية و لكن ؟؟؟؟
صدقيني فكرت إننا نسيب بعض لأنها فعلاً حكاية معقدة و مش نافعه من أي جهة ،، أنا بحبه و هو كمان بيحبني لكن البعد اللي ما بيني و ما بينه خلا المشاكل اللي ما بينا تزيد و خلانا نتضايق من بعض كتير و خايفه من كتر البعد يجي اليوم اللي فعلاً مش نحب إننا نكمل مع بعض ...
و 3 سنين مش شوية ،، و الله يا أخت بحرينية إني شفت في السنه اللي فاتت سواد و الله و هم و غم و تعرضنا لموضوع الطلاق تقريباً فوق الـ 10 مرات مرة منه و مرة مني بسبب كتر المشاكل ،،، أنا فعلاً تعبانه من اللي أنا فيه
أقعد أستنه 3 سنين كمان و يمكن قبل ما يكملو أكون انفصلت عنه بسبب المشاكل ؟؟؟ و يبقى ضيعت من عمري السنين على قلة فايده ، أنا مش ببص بنظرة مادية لكن أنا فعلاً تعبانه من المشاكل و مش عارفه إيه اللي ممكن يجرى
خايفة أخيره ما بيني و ما بين أهله ،،، أنا ما أرضاش بكده و أخاف من ربنا مش يباركلي في حياتي معاه إذا اتزوجنا بغير رضاهم و في نفس الوقت مش يرضي ربنا إني أفضل مرهونة بالطريقة دي لإنسان حتى مش عارفه نهايتي هتكون معاه إيه ؟؟؟
نفسي أقولهم بنات الناس مش لعبة معاكم تعملوا فيهم كده ،، لكني محافظة على هدوئي و احترامي ليهم و مش بحاول أخليهم حتى يحسوا إن الموضوع ده مدايقني
يا أخت بحرينية ده حتى مش بينزل أجازات منتظمة علشان أقدر أشوفه أنا عدت عليه سنة و شهر دلوقتي من غير ما أشوفه و محتمل كمان إني أستنى كمان سنه من غير ما أشوفه من غير ما أحس بأي تغيير حصل في حياتي إني بقيت دلوقتي في عصمة راجل ممكن يحتضني بدفء و حنان ،،، و مش عاوزة أحكيلك عن مدى الجفاء اللي بيحصل في مكالمات التليفون و أكيد زي ما بيقولوا البعيد عن العين بعيد عن القلب و أنا نفسي أحس بحب الإنسان اللي اتجوزته
أقولك على حاجه كمان يا أختي ،،، أنا اتخطبت لجوزي من غير ما أشوفه و قعدت مخطوبة لمدة سنة كاملة من غير ما أشوفه و لما رجع من السفر قعد معايا شهر و اتكتب كتابنا و سافر بعدها بإسبوع يعني مش حسيت بأي شئ من الحب في حياتي غير لمدة شهر و بعد كده انقطاع لمدة سنة و احتمال يكملو سنتين و ياريتهم بيعدوا بأمان و هدوء لأ ده كمان بيعدوا بمشاكل و خناقات
أنا و الله آسفه يا أخت بحرينية إني طولت عليكي و أثقلت كاهلك بالأحزان و المتاعب لكن و الله إن اللي في القلب كتيييييييييييييييييييييير و مش بتكلم و لا أحكي مع أي حد و زي ما تقولي ما صدقت حد يسمعني و يحس باللي أنا فيه
ربنا يجزيك عني كل خير و والله زي ما بتقولوا مشكورة و ما قصرتي يكفي بس إنك اهتميتي و رديتي عليه و حسيت إنك حاسة باللي أنا فيه
و جزاك الله كل خير