بسم الله الرحمن الرحيم

أقول وخر شكلك من أولها معصب ورافع حاجبك وداخل على مضاربة لسة بسم الله ما صارت المرة معاك وانت تضارب مع اللي رايح والجاي هيهيهيه.. مبروك أخوي.. وهون عليك أمرك وطنش تعش تنتعش.. يعني لو أحد ضايقك خليه.. كدنا تنكد على المدام وعلى نفسك ودمك ينحرق على الفاضي ! أذا تبغى تروح مطاعم في جدة لازم تتبع النصائح التالية.. وإلا الدم يصير لين الركب.. هيهيهي


أولا: لو دخلت المطعم لا تنظر يمين أو يسار ولا على اي طاولة.. لأنك سوف تستشيط غضبا..ليش لأن في جدة لو أحد جالس في المطعم ولقي أحد داخل لازم يطالع فيه من فوق لتحت.. ويقلبوا على اللي معاك ويطالعوا من فوق لتحت.. بالنسبة لي ,انا فتاة.. لمن ادخل ما أطالع في أحد عشين ما أعصب.. ولو بالصدفة لقيت أحد بياكلني مرة ولا رجال.. أجلس أطالع فيها لين ما تقلب وجهها..كانها مو شايفة بشر !


ثانيا: وعلى ذلك.. المطعم اللي بناسبك لازم يكون فيه حاجز بين طاولة وطاولة.. والا لقيت الطاولة الثانية جالسة معاكم.. مرة أشرت لوحدة مركزة على الآخر معانا أنا وأمي وصحبتها.. اشرت للست قلت تعالي أقعدي معانا أحسن.. خافت ودارت وجهها.. وحتى لو أمي تجلس تطالع أقلها ايوة كلي الناس ولا روحي قولي ممكن اجلس معاكم شكلكم فلة !

ثالثا: لمن تلاقي طاولة على مزاجك.. حط حلقة في أذنك.. تخيل انت وجالس أنو مافي أحد غيركم في المكان وصدقني راح تنبسطوا مرة.. ليه ساعة أحش في الناس أخاف تطلع واحد من أياهم.. تجلس وما تخلي أحد عدا من قدامك الا وأكلتو فعيونك.. صدقني خطيبتك راح تعصب وتحقد عليك من جد..وتديك نظرة ايش مني مالية عينك.. يعني ركز معاها وخليك جنتل وابتسم ابتسامة رضى وعيشها في رومانسية وتسولفوا واضحكوا.. ولا كأنوا في جرسون واقف على راصك..بس أول ما تدخل خلي شكلك عصبي عشين يحسبولك حساب ويخافول منك.. ترى من جد موضوع حساس.. ويعصب.


دحين أسماء المطاعم..

يالدزلار جنب دوار البواخر ما أعرف اسم الشارع روح جهة النافورة حقة البحر وهمة يقلولك.. شوية غالي بس العمال يطفشوا يجلسوا على راصك ويوقفنوا بعيد يتكلموا عليك.. الأكل مررررررة طيب.. فإيش تسوي اذا ناوي تسوي ليلة حلوة في البيت.. اطلب من زوجتك تحضر الطاولة وشموع وتلبس أحلى فستان.. وروح انت أو ارسل السواق وكلموا من المطعم.. الأكل الخارجي يتوصوا فيه أما في المطعم يحطوا عينات والجلسة ما تسوى,, بس من جد اكلهم يفوتك.. أول خد وجة الغداء بخمسين ريال وتأكل ثلاث أنفار..

في المطعم الصيني.. تعرف الشارع اللي فيه روائع الكتبات ؟ الجهة الثانية على جوة بين البيوت في صيدلية لف يمين بعدين يسار. مطعم طيب والفلبينيين يتكلموا ولا يهمك محنا فاهمين ايش بيقولوا.. والشارع دا في مطاعم حلوة.. في مطعم ياباني.

شارع صاري.. مليان مطاعم من الجهتين


في شارع فلسطين قبل النافورة.. في شليز.. دايما زحمة.. جاي كورنر.. ونفس الشارع في كاسبر مررة حلو بس ما فيه بارتشن شبابي مرة.. فنفس الشارع بعد شليز تمسي قدام.. ترى هاذي المنطقة كلها مطاعم.. العجمي.. يلدزلار.. شيراز هدا ايراني..

ودحين القهاوي.. فيها أكل بس خفيف.. اذا من النوع اللي تعسل ينفعك أروما كافيه.. محترم وفيه حواجز وأكثر الموجودين نساء
تشربوا قهوة وتتسولفوا..

وفيي قهوة مرتبة.. في شارع التلحلية المنتره 2 الدور الثالث جلسة رومانسية والعمال طيبين فحالهم والجلسة شبه ضلام !


وفي لي مول بس القهوة مكشوفة في نص السوق بس حلوة كل واحد في حالة.


وكمان في مطاعم سمك على البحر.. جنب فن تايم بيتزا مطعم ايطالي.. ومطاعم كتيرة وفي واحد جنب الجزيرة الخضراء نسيت اسمو

بس خلاص لفينا جدة كلها تعبت.. أتمنى أن أكون قد أفدتكم..


ولله التوفيق