حقا تائهه وحائرة فساعدوني ...
لا ادري من أين ابدأ بالحديث
ولا ادري هل هي مشكلة ام ماذا بحد ذاتها
انا ابلغ من العمر 25 عاما
تعرفت الى شاب عن طريق التشات
تحدثت معه هاتفيا ولم اخرج معه ابدا
انا اعرفه من 4 سنوات ،،وهو شاب محترم جدا واخلاقه كتيير عالية وعمره ما طلعت منو كلمة هيك ولا هيك
طوال ال 4 سنوات في كل سنة يصادف بها عيد ميلاده كنت اقوم باحضار هديه له ويتم ايصالها له عن طريق غير طريقي
احيانا كنت ادعوه هو بنفسه لاستلام الهدية بعد ان اخبره عن العنوان الذي يجب الذهاب اليه
طوال هذه الاعوام
لم تصلني منه ايه هدية ابدا .......
لا اقول ان هذا موضوع كان عادي بالنسبة لي يعني بصراحة كان نفسي انو يوصلني منو شي لانو كان نفسي انو احتفظ بشي منو عندي
يعني شي من ريحته متل ما بيقولوا
بس عمرها ما صارت يعني عمره ما بعتلي شي )
المهم ....
مرت الايام وصرت احس انو انا عم بتعلق فيه يوم عن يوم اكتر
وصرت لما ما يبعتلي مسج او ما يحاكيني صرت اشعر بضيق داخلي كبير جدا
وكنت اولها كتييير عصبية معاه واحاسبة ليه ما حكي معي وليه ما بعتلي
مع العلم انو طوال الاربع سنوات نحنا اصدقاء فقط
هاي الجملة اللي كنا انكررها انا واياه لبعض او بالاحرى هاي الجملة الي هوة كان اكتر مني يسمعني اياها دائما وعند
كل موقف او عند كل مشكلة بنعملها مع بعض
مع العلم انو كنت اتخيلو انو بيوم من الايام يكون الي بس كان دايما في اشي بيحطم هالامل من جواتي وبيرميه وبيقولللي لا لا تحلمي ولا تتخيلي انو هاادا ممكن يصير
وانا لما كنت ارجع للواقع واشوفه ااقوووول والله لو شو ما صار مستحيل انو يفكر يرتبط فييي
وكنت متأكدة من هالشي وواثقة منو 100%
يعني كان لازم احط حالي عالارض وما احلم فوق بالنجوم ،،،لانو هادا الشي مستحيل ،،،،
ومرت الايام وانا صرت عم بتضايق من الوضع اللي انا فيه معاه
لانو مو دايما بيسأل مو دايما بيحكي معي
اتضايقت من تصرفه هادا المتكرر بعدم سؤاله وقررت انو نترك بعض
مع العلم انو قبل هالمرة صارت مرات كتييير ةوتركنا بعض وكنا نرجع
بس هالمرة كان القرار حازم جدا وقررت انو اتركه دون عودة لالو لو شو ما صار
وفعلا صار الحديث هيك وافترقنا ،،،
لانو كان الوضع كتييير مضايقني ،،،
المهم مرت الايام وبعتلي هوة يطمن علييي انا ما كنت ارد واووقات كنت ارد ..
يعني هيك وهيك ..
استمر الوضع هيك ل قبل اكم يوم بعتلو انا مسج من موبايلي بالغلط
بعتلي وقاللي انو انا بصراحة كنت حابب احاكيكي واطمن عليكي واسمع اخبارك من زمان
وطلب انو يحكي معي
وفعلا حكينا ،،،كانت مكالمة مطولة
بس اللي فاجاني حقيقة بهالمكالمة انو سالني سؤال ما توقعت بحياته يطلع منو او يسالني اياه
سالني لو قلتلك انو بدي ابعت الوالدة اتشوفك شو بيكون ردة فعلك ؟؟
طبعا انا نسيت كل ردود الفعل اللي ممكن تصير باي موقف بالدنيا
ما عرفت شو احكي
والتخمت
وسكتت اشوي
وقلتله انو متلك متل غيرك اهلا وسهلا فيها واللي فيه الخير الله يبعته ،،
بس هوة وضحلي انو ظروفه المادية هلا موولابد وانو هوة موعود بوظيفة منيحة هاليومين ،،،
وانو بعد فترة 3 شهور من توظيفه بهاي الوطيفة راح يبعت الوالدة
وانا متل ما قلتلكم طول هالفترة عمره ما شافني وجها لوجه
بس يعني شافني من بعيد لبعيد
وانا اللي مخوفني واللي مخليني ما بعرف انام من وقت ما حكاني لليوم هوة خوفي المستمر من انو اكون مو فتاة احلامة اللي بدو يرتبط فيها
او ما اكون متل ما بدها والدته ،،،
وبصراحة كمان المدة طولت كتييير
يعني 3 شهور فترة كتييير طويلة ،،،
وانا صرت عم بحسبها باليوم هالمدة بدي تخلص وخلص اشوف شو راح يصير
راح ارتبط فيه ولا لا
افكار بتاخدني وافكار بتجيبني
وجد تعبت
تعبت من كل شي
اتمنيت لو انو ما حكالي انو بدو يرتبط فييي
لاول مرة بيقولللي انو بدو يرتبط
كنت زمان لما افتح معاه الموضوع وااقولله شورايك اشوفلك واحدة انا بعرف بنات كتييير كويسين معاي بالشغل ،،او احاول ادله على اي واحدة كان دايما يقولللي مو وقته ومو قدرتي هلا لا ماديا ولا معنويا
بس لما حكى معي اخر مرة قاللي بدي اتزوج ...بدي اتزوج
واهلة صايرين عم بفتشولوا على بنات
يعني انا مو عارفة شو اعمل ولا كيف اتصرف ،،صرت عم استنى المسج منو ،،بس يرن الموبايل اتوقع المسج منو
ومن وقت مكالمته لهلا ما بعتلي شي
ما بعرف شو اعمل ؟؟؟
بصراحة مخي ما عم يهدى ...
يا ريت اتساعدوني وتفيدوني من خبراتكم
وخصوصا كمان انو عم بفكر وبقوول يعني معقوووول انو طول هالفترة ما سمعني كلمة منو حلوة
ولا عمره بحياته قاللي بحبك
وهلا صار بدو يرتبط فييي ؟؟؟ليش ؟؟؟؟على اي اساس ؟؟؟
ارجوانكم اتساعدوني وتخبروني شو اعمل ؟؟؟وكيف اتصرف ؟؟؟