لول كأنها أنا
تحصل لي ساعات مواقف مثل كذا و صراحه أنقهر و ممكن أعصب...مع اني في داخلي عارفه ان مو بيده
قبل كم يوم زوجي كان عنده نايت شفت (دوام بالليل) و كل ما أدق عليه يقول لي مشغول بأدق عليك إذا فضيت ...هذا الكلام من العصر إلى الليل..الساعه 12 كلمته بالبدايه كلمني شوي عادي بعدين أنا سمعت عنده أصوات فقلت له مشغول؟ قال لي ايه قلت له موب مشكله بس اذا حسيت فضيت دقيقه ولا دقيقتين دق علي طمني عليك قال لي ان شاء الله و أنا صرت استنى منه مكالمه
جت الساعه 2 و هو ما دق..قلت خل ادق عليه أشوف..دقيت و تخيلي رد علي واحد يقول لي هاااا؟؟؟ و صوته فيه النوم تتخيلي موقفي لحظتها؟؟؟ طاح وجهي سألته نمت؟؟ قال لي ايه نايم ليش؟ طبعا انا كان ودي أعصب و أزعل بس مدري الله هداني في هذيك اللحظه قلت له لا سلامتك خلاص ارجع نام......و تصدقين انه رجع نام؟؟؟؟؟ و أنا لسه على الخط أستنى تصبحين على خير ولا شي بس لا حياة لمن تنادي قفلت السماعه و جد يعني كنت حاسه ودي أصرخ ودي أصيح ودي شي....كان ودي أكلمه بس أزعجه و إذا رد أقفل و اتركه شوي لحد ما ينام مره ثانيه و ارد أكلمه ولا القهر بس في نفس الوقت قلبي مو مطاوعني (بيني و بينك لو ما كان مداوم كان قلبي طاوعني و نص بس قلت مسكين دوام و مشغول و كذا) ...في النهايه رسلت له مسج قلت له ما حبيت هالحركه منك و أنا لما قلت لك كلمني ما كنت ناويه أدق سواليف بس كان ودي اسمع صوتك و مدري أيش
بعد ساعه هو رسل لي مسج فيها كلام ---> فأنا دقيت عليه قلت له صحيت؟؟ قال لي ايه قلت له صح النوم ببرود طبعا..قال لي آسف قلت له طيب ضحك و قعد يقول لي كلمتين كذا و كذا بعدين قال لي بس من جد و الله آسف و بدأ يبرر لي بس أنا وقتها حسيت إني موب محتاجه المبررات لأني أعرفهم فقلت له خلاص حصل خير بس عاد مره ثانيه اذا وعدتني تكلمني كلمني بس قول لي تصبحين على خير و خلاص قال لي ان شاء الله :14:

المهم أدري طولتها بس تذكرت الموقف الحين
المهم أنا رأيي إنتي كلمي ولد عمك قولي له يجيب لها وردة و يفاجئها بشي و يدلعها شوي و ان شاء الله هي راح ترضى
هي بس حست انها قطعت طلعتها على شانه و لبست له و جلست تنتظر و بعدين قال ما يقدر يجي
و لما قال راح يكلمها قال ما يقدر يكلمها
بصراحة قهر يعني حتى لو في داخلها تدري ان مو ذنبه فيه جزء منها يقول بس مين أهم أنا ولا هم؟؟؟؟؟؟؟؟؟
بعدين انتي قلتي ان هي قالت ما راح تكلمه يومين علشان يتأدب يعني هي بس تتدلع تثقل عليه..لو تبي تهاوش هاوشت ..هي تتدلع و تبي من يدلعها...و اذا هو فعلا معاها مثل ما تقولين ما راح يقصر في هالناحيه