أشكر جميع الأعضاء رجال ونساء.....على هذه المشاركات الطيبة


تدرون وش اللي يهوِّن ويخفف علي دائما


أنا أعتقد إني فعلت جميع الأسباب او بالأصح أغلب الأسباب


والله يا أخوان ما بقى شغلة ما أشتغلتها


كل شغلة تخطر على بالكم اشتغلتها


حتى بيع الأغنام بعت


تخيلوا اوقف في عز الظهر في سوق الغنم علشان ابيع لي تيس يمكن أربح فيه 50 ريال او حتى أقل


والله ما كان همي علشان أكشخ بالفلوس ولا علشان احقق امنيات الشباب اللي دايم يتمنونها (سيارة حلوة ، ولا سفرات هنا وهناك ولا غيرها وغيرها)

ما كان همي في تجميع الفلوس إلا إني أتزوج وأعف نفسي واتوقع إن هذا مطلب حسن بل مطلب شريف


حتى إن كثير من أخوياي اتهموني بالبخل...لأني ما كنت اطلع معهم كثير ولا كنت أتعشى معهم دايم ولا كنت أبذر

كل هذه على شان أجمع لي كم قرش....

لا تحسبون إني من عائلة فقيرة

ترا أبوي وكيل وزارة سابقا

وأمي موظفة من عشرين سنة

يعني دخل أسرتي شهريا فوق 25ألف ريال


لكن



وين اللي يحس بمطالبنا

أن قلنا زوجونا قالوا : الزواج مو لعبة الزواج يبي له رجال..........يعني وش قصدكم


أنا ما أحب أمدح نفسي لكن من ناحية الرجولة فإن المجتمع اللي حولي يشهد برجولتي...رجاله ونساؤه


انا بلغت وأنا في أول متوسط ومن هذك الحين وانا اتقضى للبيت وانا المسؤول على البيت (لأن أبوي ترك اشغال البيت لي)


نست أقولكم

حتى تجارة الأسهم ودخلت فيها


بعت سيارتي ودخلت فيها .......وكل هذا علشان اتزوج

طبعا يوم جيت أبيع سيارتي سألتني امي ليش بتبيعها ؟ قلت علشان أشتري سيارة أحسن منها بعد كم شهر

والله الذي لا إله إلا هو ...إني ما كان هدفي إلا الزواج

طبعا طيحة الأسهم الماضية شملتني وخسرت فلوسي


هذا غيظ من فيظ


يعني من ناحية فعل الأسباب وفعلتها ....... ومن ناحية التوكل فحنا متوكلين على الله


حتى من ناحية الثقافة الأسرية وتثقفت

استمعت إلى اكثر من 20 شريط (طبعا كل شريط اسمعه أكثر من 4مرات علشان استوعبه)

وقرأت اكثر من 30 موضوع متعلق بالزواج


وعندي من المعلومات عن (الحياة الزوجية) و(الحياة الأسرية) و(كيفية التعامل مع الزوجة) و(طرق السعادة في الحياة الزوجية) و(وسائل طرد المشاكل عن الحياة الاسرية) عندي من المعلومات ما يفوق عن المعلومات عند اكثر المتزوجين

وها أنا الآن لازلت أعمل واكدح

حتى الويك إند(الخميس والجمعة) أشتغل فيه بالليل

والله راح شبابي وانا عمري21 سنة

الله يعوضنا خير

__________________