والله يا أختي مشكلتك كانت عندي ..

أنا بعد كان زوجي مثل زوجك ما يقول شكراً ولا شئ من أخواتها ..

وأنا على طول إذا أطلب منه شئ أبتدي بـ " لو سمحت ، إذا تفضلت ، إذا ما عليك أمر ، الخ .. "

وعقب ما يسوي اللي أبي أقول له " شكراً ، مشكور ، الله لا يخليني منك ، الخ .." وهو عمك أصمخ ..

ما يبادلني مثل هالكلمات .. وأنا على كثر القهر اللي ماخذني منه لأنه ما يبادلني الكلمات اللي تحسسني إنه مقدر

تعبي اللي أتعبه عشانه وعشان عياله والبيت .. ما توقفت عن مدحه قدام أهلي وأهله وقدام نفسي بعد .. ما سمحت

لنفسي إنها تقلل من قيمته لأنه ما يشكرني ..







وقعدت أفكر ليش ما يشكرني ؟؟؟




































لقيت إنه مو محتاج مني شئ ..

بحكم إني ربة بيت ولا عندي شغالة ..أكون متفرغة ..

على طول أغراضة جاهزه قبل ما يطلبها من أول الطبخة اللي يحبها الى ثيابه المغسولة والمكوية الى بيته وعياله اللي

مهتمة فيهم ..

فهو مو محتاج يطلب عشان يشكر !!!

ولا هو اللي يقعد معي وأنا أشتغل عشان يحس بالتعب اللي احسه ..

فقررت مرة إني أتعمد إني أهمل بعض الأغراض ما أسويها له ..

لعل وعسى يحس شوي ..

في يوم أنا أدري إنه معزوم على عرس ويبي يلبس ثوب معين .. تعمدت إني ما أكويه .. فهو يدوره في الكبت يحسب

إنه مكوي ويسأل عنه .. قلت له كنت تعبانة ولا قدرت أكويه ..

تدرين ويش صار ما سمعته إلا يقول لي .. لوسمحت تقدرين تكوينه ..

أنا من الفرحة قمت بسرعة ماني مصدقة ..

طلع إحساسي في محله وإن الغلط مني مو منه لأني كنت مو عاطيه الرجّال فرصة عشان يطلب وبعدين يشكرني ..

وقمت من فترة لفترة أسوي هالحركة وغيرها بحيث أخليه يطلب وأنا أسويله اللي يبي ..

لين ما تعوّد ..

والحين يا أختي بروحه يقول " الله يعطيك العافية ، رحم الله والديك .. ومن هالكلمات اللي تبرد القلب "..

هذي تجربتي مع زوجي ما أدري إذا كانت تناسبك أو لا ..




تقبلي تحياتي أختك أم زهراء .