الله يوفقك اختي.. وانا اضم صوتي للبنات.. للحين باقي عندك وقت لا ووقت طويل بعد... اهم شي تكون الوجبات اللي تاكلينها متوازنة يعني كل العناصر الغذائية تكون متوافرة فيها.. واكثري من العصائر والسلطات والفواكه..

الشي الثاني لا تنسين الرياضة والمشي بمعدل نصف ساعة يوميا حتى تحافظي على رشاقتك..

إذا كنتي تستخدمين الشفرة حق ازالة الشعر,فانصحك انك تتخلصي منها.. وانتظري الشعر حتى ينمو ويصير طويل شوي وبعدين على طول شيليه بحلاوة, وبعدها ادخلي وتحممي ولما تكملين حطي على جسمك زيت بيبي جونسن يخلي الجسم روعة نعومة ولا في الخيال.. ونسيت اقولك انه تقدرين تستخدمين شي اسمه ملح الحليب يعطي الجسم نعومة ولمعان ولا في الخيال.. وهذا تلاقينه عند الحواج(العطار) واكثر الناس يمدحونه..

وبعد لا تنسين انك تروحين الصالون وتعملين بديكير ومنيكير, وتعملين الحمام المغربي,, وبالنسبة لشعرك انصحك تعملين حمام زيت كل مرة تغسلينه فيها.. وابتعدي عن السشوار عشان ما يتأذى شعرك ويصير شكله ولا احلى ليلة العرس.. ولا تنسي تقصي القليل من اطراف شعرك عشان تتخلصين من التقصف..

وعندي لك نصيحة مهمة,, لا تجربين ابدا انك تستعملي اي دواء على بشرتك في هذي الايام خوفا انه تصيدك حساسية او التهاب وتطلع لك نتايج ابدا ما تحبيها.. وخلي بشرتك صافية لا تحطي مكياج هالشهرين, وتجنبي السهر وحاولي تضبطي نومك, وانك تنامي على الأقل لمدة ست ساعات باليوم..

الأسنان.. هالله هالله بالأسنان.. ترى سر جمال العروس ابتسامتها.. اخذي لك موعد عند الطبيب عشان تعملي تنظيف اسنان.. وإذا كانت اسنانك لونها مايل للصفار حاولي قد ما تقدرين انك تستخدمين معجون مبيض للأسنان.. وانا سمعت عن جل كرست حق تبييض الأسنان بس بصراحة ما جربته.. ولا تنسين حق تنظيف الاسنان تستخدمي خيط التنظيف وبعد التفريش تستخدمي غسول الفم..

هذي الصراحة بعض الأفكار وإنشاءالله اكون ساعدتك, واي استفسار ترى حاضرة ومن عيوني..

لا تنسيني من الدعاء بالذرية الصالحة..