تعرفين اكتشف اليوم ان الكلام الحلو ممكن يطلع مني اذا اشوي صفيت النيه
وتابعت ما بداته اليوم .... انا ما ارفضه بس استصعبه
واليوم لما كلمته كنت غير فهو كان غير... حسيت اني سهلت له وسهلت على نفسي المناقشه...
وفتح باب الحوار... مع انه اليوم الصبح كنت اقول حق ربيعتي .. صرت ما اعرف شو اسولف مع زوجي..
كنا بالملجه واول شهور الزواج نتكلم بالساعات .. والحين دقايق
اكتشفت ان القلب او ما تقصدونه العاطفة وااااايد له دخل بالاسلوب...

اليوم عرفت ان كل شي سهل .. والكلام الحلو قريب بيدخل حياتنا ان شاء الله اذا ظليت على هالمنوال...
الله يثبتني ان شاء الله....

وبالنسبه للقرار انا سعيده وفي نفس الوقت ... تفكيري القديم مازال يلازمني... تعرفين صعب التغيير مره وحده..
عشان جذي رديت افكر بأهله .. وكيف راح يعاملوني... وكيف هو راح يعاملني لما يكون قريب منهم..
واهم شي اني بعيده عن اهلي..... احسه بيستقوي علي.. مالي حد ينقذني ويجيني بأنصاص الليول...
مال حد يحميني منه لما نتضارب... مالي حد يواسيني لما ازعل.. ما في حد يصبرني بهمومي...
صعب... صعب...
انا الان مزيج من الفرح للتغيير الحاصل بينا ... ومزيج من الخوف .... للي بيصير....
الله يعين عاللي جاي...
أحس الغربه (بالنسبه لي) بتخليني أضعف .... بتكسرني...

ما ادري ليش هالتفكير السوداوي ... بس انا من زمان أقول دبي ... صعب اسكنها....
احبها كطلعه ... احبها كتسوق.... احبها كتغيير...

بس ما اتحمل أعيش فيها...

انا ما ابى اسبق الاحداث بكره بيبين كل شي ان شاء الله...
بس ارد أقول انا قاعده اكتب بدفتر مذكراتي ... واخفف عن نفسي...

فلا تقعدون تتشكون من كثرة كلامي..