بسمة رضا

فعلا نحتاج لتوعيه مو شرط العمر انا مو صغيره بس احس معلوماتي عن الزواج وقدسيته ومعاملة الزوج
عندي صفر هناك اشياء كثير استفدتها منكم وتعلمتها عن طريقكم
ودعواتكم لي بتطبيقها على احسن وجه

عزيزتي بسمة انا ما اشن حرب على عمله
هي مره علقت عليها بعصبيه هذي المره بس
ويمكن لو عرفتي السبب تعذريني ويمكن كعادتي اكبر الموضوع

السالفه انه لما كان يستعد عشان يروح دبي
انتبهت انه ماخذ لبس وايد وانا ما شكيت ابدا انه في شي
انا بالي راح ليوم الجمعه وانه مو ناوي يرجع حسب الاتفاق
فسألته كفضول ليش ماخذ كل هاللبس؟ قال: عشان اوديه الدوبي(المصبغة)!!!
قلت اوكي صدقته وما شكيت بشيء وزيادة حرص قلت له
ترى الجمعة عندي، قال: يصير خير
وهو كان رايح سيده عالكليه لما طلع كلمني وهو في طريقه لبيتهم
قال ترى عندي لك خبر وحسيته متشقق... او يتهيء لي ما ادري
يقول ان عندي دورة بدبي
هنا رجعت تذكرت انه كان مسوي احتياطاته وانه كان يعرف بس ما قال لي
وماله اي عذر انه ما يخبرني بوقته لاني جذي ولا جذي ما اقدر امنعه
بالعكس يمكن كنا نقدر نتفاهم بهدوء بدون ما احس انه خطط لوراي...!!!..

واما انج تقولين هذا شغله ويخصه
اسمحي لي ما اوفقج على هالشيء لان دايما الواحد يبى الاحسن وانا اعرف انه من النوع اللي يمشي حاله
وانا اذا عن نفسي ما سكت مع انه فنظري ما سويت مجهود عشان المصروف
فكيف لما شي يخص ولدي لازم افكر فيه وبمستقبله
وانا ما ارضى انه يعيشه على قد حالنا ... ابى يكون مستوانا مقبول
مو يقولي ما اقد اجيبله هالشيء هالشهر خليه الشهر الياي
هذا ولدي وما في شي بيصبرني ويخليني ابخل عليه
احس اني برد لعادتي واطلب من اهلي وهالشيء يزعله
وانا معاه لانه مسؤوليته بس لما ما اشوف جهد منه اكيد بسوي اللي اقدر عليه


اما عن الاعتراضات اعذريني فأنت ادرى ببنات جيلك ونحن مو متعودين على العذاب والتقصير
فزمن احسه زمن دلع ورفاهيه .. يمكن لان ما قد قصر علي أحد قبل..
فطبيعي انصدم وبالتالي اعترض لانه صعب بعد 21 سنه اتقبل وضع جديد بسهوله
وكل شيء يجي مع الوقت..

وبالنسبه لك عوضك الله خيرا ان شاء الله
صدمتيني مو لانك مطلقه لاني من البدايه ما حسيت انج انسانه ناقصها شيء..
كنت متخيلتج انسانه متزوجه ومرتاحه بحياتها الزوجيه ... لانه ما شاء الله الاسلوب
ما يدل ابدا عن حقد وكراهيه الله يحفظج ... أبى اصير مثلك ومثل الباقين
أبى يصير قلبي ابيض ... اقدر اسامح.. واقدر انسى... واقدر اعتذر بكل سهوله...
والله لو تدرون التأنيب اللي احس به لما اغلط عليه ما راح تصدقوني
انا ادري انكم رسمتوا انطباع عني اني بليده المشاعر وكريهة المعشر ...
بس انا اهون علي اتعذب بس ما اعتذر والسبب نفسه ... الكرامة....