اليوم السادس

ذهبنا إلى وادي دربات





وطلعنا الجبل اللى فيه الشلالات بس للأسف قال لنا السائق لسه ماجرى الشلال وبيجري يمكن بعد أسبوع بس نحن كان باقي لنا يوم ونغادر






وسبحان الله شفنا أثر حفر الشلالات في الجبل والمنظر جدا رائع


*******

ونسيت ماأقولكم إننا رحنا منتزه سمهرم ماأدري في أي يوم وإنبسطنا فيه وتغدينا في مطعم بن عتيق وأشترينا حلوى من المحل إللي بجواره ...وكانت سااااخنة ولذيذة جدااااااا .










اليوم الأخير

قال زوجي وين بنروح :خلاص خلصنا الأماكن خلونا نجلس في الفندق
قلت له لا خلينا نطلع ونقول للسائق مشينا على كيفك.

المهم طلعنا وركبنا السيارة وقبل مانتكلم لقينا السائق يقول لنا : اليوم أنا عازمكم و طلعتكم عليّ بوديكم مكان ماتنسونه أبدا
ولقيناه مجهز في السيارة قدر الرز واللحم وكيس فواكه كبير جدا وكأننا عيلة كبيرة ومجهز الله يجزيه كل أغراض الرحلة

لا وبعد أعطى زوجي هدية عبارة عن علبة فيها العود العماني البخور وقال له هذه هدية لأم جمانة

بصراحة أحرجنا جداااااااا بكرمه الفياض

وتصدقون حتى فلوس البنزين للسيارة كانوا مايوافقوا نحن ندفعها.

كرم حاتمي الله يبارك لهم

المهم فعلاً طلعنا جبل صحنوت

ونحن ذهبنا له أول يوم لنا بس ماجلسنا إلا شوي لإننا ماكنّا مجهزين معانا شيء

والطريق بصراحة كان خيال كله خضار من اليمين والشمال وزوجي يقول صوري صوري ...وأنا أصور وأقول له كل الأماكن حلوة وشكلي مابقفل الكاميرا

والطريق مثل هذا




بس تصدقون أول صورة نجحت في تنزيلها للمنتدى كانت صورة عزيمة الغداء والسائق وزوجي وعيالي يتغدون.......مع إني ماكنت أبغاها تنزل ....بس لإني حاولت عدة مرات في البداية أتعلم التنزيل وماعرفت وقلت خليني أجرب هذه ......ونزلت مع إني ماكنت أبغاها بس يالله نصيبكم تشوفونها


وطبعاً واضح منهو زوجي من السائق بالزي السعودي والعماني
وشايفين كيف مو بايين من كثر الضباب والرذاذ

وشوفوا عيالي بجنبهم حلاوة شعر البنات والطيارة الورقية وتغدوا وطيروها وانبسطنا وماودنا نرجع وجلسنا إلى قريب المغرب


ورجعنا ونحن نقول للسائق بصراحة خليت رحلتنا ختامها مسك بالطلعة الخيالية هذه


وألف ألف ألف ألف ألف مليار شكر لأهل صلالة الطيبين القبائل أهل النخوة والشهامة والرجولة.

وبهذا إنتهت رحلتنا ولله الحمد




































واليوم الثاني توجهنا من صلالة لمسقط وحبينا نجلس فيها يومين قلنا عيب نعدي على العاصمة ومانشوفها


وياريتنا مارحنااااااااااااا كان قضينا اليومين في صلالة أبرك لنا .....بس الحمد لله على كل حال

والله تذكرت لحظتها كلام أختي (عاشقة اللودي) لماقالت لي ليش تضيعين يومين في مسقط خليكِ في صلالة أحسن..................بس لقافة فينا رحنا


بصراحة حر فظيييييييييييييييييييييييع ويلفح وجهك من شدته

بس أروع مافي مسقط إنّنا سكنا في فندق فااااااااااااااخر وهو (قصرالبستان)

وهذه صورة شاطيء الفندق

شايفين هذه الصورة إللى فوقكم .منظر وبس....والله ماقدرنا نجلس من كثر الحر
مجرد مافطرنا في مطعم الفندق وفتحنا الباب المؤدي للشاطيء علشان نتمتع بالشاطيء
إلا وحر يلفح وجهك وتحس كأنك تنشوي ....ولاشعورياً تقول .....يالطيف الله يجيرنا من نار جهنم
حتى الرمل ماتقدر تدوسه من الحر والألعاب حديدها ساخن

والخواجات زرافات ووحدانا يروحون على الشاطيء وفرحانيين بالشمس والحر وشايلين عدتهم للسباحة ولركوب الأمواج.......وقلت في نفسي روحوا أنشوا في الدنيا قبل الأخرة

وقلت الحمد لله خليكم هنا في الحر ولا تعتبون صلالة

المهم هربنا وطلعنا للفندق ...والله حتى بلكونة الفندق ماتقدر تفتحها من الحر


وقلنا آه وين كنّا أمس ووين صرنا اليوم أمس كنا في مطر ومانعرف الشمس أبد واليوم

وفي الظهر رحنا لمركز حلو راقي وتغدينا ولعب عيالنا ورجعنا للفندق وقلت لزوجي مابطلع ولا مكان إلا للمطار

وحللنا الفندق لإنه كان يغني عن الطلعة كان جناح ملكي توهقنا فيه وفي سعره لإن ماكان فيه غرف مفتوحة على بعض بس جلسنا يومين وكأننا من الأسرة المالكة
وتجينا الضيافة عبارة عن ثلاثة أدوار من الأطباق فيها مالذ وطاب من الفواكه
وصحن الشكولاتة وصحن التمر.


وثاني يوم خرجنا نصف ساعة ونحن نلهث من الحر وأشترينا الزي العماني لعيالنا وبخور عماني ولبان
من سوق مطرح
وحلوى عمانية هدية للأهل
ونحن في الطريق شفنا المنتزهات ونحن نقول ...بالله مين بيجلس فيها؟؟؟

ورجعنا الفندق

صورة سوق مطرح



وفي الصباح عدنا بسلامة الله وحفظه لأرض الوطن الحبيب




أم جمانة