مشكورين اخواني على الردود

بس انا احس ان زوجي ما تمشي معاه حركات الدلع .... اصلا مافي وقت للدلع ... انا مااقعد معاه الا وقت النوم وعلى الفراش ... الظهر يرجع من الشغل يبي ينام ... والمغرب على طول يصلي ويطلع والساعه 11 بالليل يجي وعلى طول على السرير .... واذا حاولت انوم العيال بدري يقول لي خليني العب معاهم انا ماشايفهم ...واذا قلت له تعال اتعشى ... يجي يتعشى ويغسل يدع وعلى طول تحت في مجلس الشباب او عند امه وابوه تحت لان مايشوفهم الا اخر الليل مع ان احنا ساكنين معاهم ...

وعلى فكره ... زوجي يطلب مني المبادره .... بس اذا هو مابادر يعني هو مش مشتهي ومش رايق .... يعني انا بادرت والا لا واحد .... حتى لو حاول يجاملني في النهايه يقول لي انا تعبان ... الوقت اتأخر ... ويتعذر ... الا اذا كان هو اللي امبادر...

زوجي كلش مش رومنسي واللي مش رومنسي ماتنفع معاه حركات الدلع ...

ابوه صار له اربع ايام في المستشفى وبالليل ينام عنده ويرجع الصبح البيت وينام لين العصر وبعدين يقعد عند التلفزيون ولا كأنه تاركنا طول اليوم ... ما يحسسنس انه مشتاق ... ما يقول قاصركم شي... واذا قلت له يقول لي الحين بروح المستشفى ... ويطلع من المستشفى على الساعه ثمان يروح عند ربعه في المجلس لان مستحيل يمر اليوم من غير ما يسير عليهم وانا وعياله ولا يفكر فينا

زوجي مايهتم في هالسوالف ولا يفكر ان احنا محتاجين له وان احنا مشتاقين يعني عادي يمر اليوم بطوله من غير ما يشوفنا .... ما يفكر اذا كنت متضايقه يطلعني او يونسني باي شي ... وانا حاسه ان هالاشياء الواحد يتعلمها من تربيته ومن حياته ويمكن طبيعة البيت اللي هو عايش فيه ما خلته يعرف هالأشياء بس انا شسوي اشذمبي ... احاول اقول له عمدا عن مواقف حلوه لاخواني او صديقاتي مع ازواجهم عشان يتعلم ... بس هو يعتبر هذا كله دلع ومصاخه

اتمنى فهمتوني اكثر

ومشكورين